Jó
10 “N ta ôdia* nha vida.
N sta ben dizabafa nhas kexa.
N sta ben pâpia di nha disgostu!*
2 N ta ben fla Deus: ‘Ka bu fla ma mi é kulpadu.
Fla-m pamodi ki bu sta luta kóntra mi.
3 Bu ta ganha algun kuza na maltrata-m,
Na dispreza trabadju di bu mô?
Pamodi ki bu sta kontenti ku planu di kes algen mau?
4 Bu ten odju di ómi?*
Ô bu ta odja sima un sinplis ómi ta odja?
5 Bus dia é sima dia di un algen ki ta móre?
Ô bus anu é sima kes anu di un ómi,
6 Pa bu tenta atxa nha éru
I pa bu kontinua ta djobe nha pekadu?
7 Bu sabe ma mi é ka kulpadu
I ningen ka ta konsigi salva-m di bu mô.
8 É bu mô ki faze-m i da-m fórma,
Má gósi bu krê kaba ku mi.
9 Favor, lenbra ma bu faze-m di baru.
Má gósi bu ta pô-m ta volta pa téra.
10 Bu ka baza-m sima leti
I bu ka kua-m sima keju?
11 Bu bisti-m ku péli i karni,
I bu forma-m ku osu i tendon.
12 Bu da-m vida i bu mostra-m amor lial.
Bu proteje-m* i bu kuida di mi.
13 Má sukundidu, bu pensa na faze kuzas pa prujudika-m.*
N sabe ma kes kuza li ben di bo.
14 Si N pekaba, bu ta odjaba mi,
I bu ka ta purduaba nha éru.
15 Si mi é kulpadu, ai di mi!
I mésmu ki mi é inosenti, N ka ta pode labanta nha kabésa,
Pamodi N sta xeiu di dizónra i frónta.
16 Si N labanta kabésa, bu ta kasa-m sima un lion
I bu ta mostra bu puder kóntra mi otu bês.
17 Bu ta traze novus tistimunha kóntra mi
I bu ta fika inda más xatiadu ku mi,
Timenti prublémas ta ben riba di mi un tras di kel otu.
18 Nton, pamodi ki bu pô-m ta sai di bariga di nha mai?
Éra pa N moreba antis di un algen odjaba mi.
19 Ta sérba sima si nunka N ka izistiba.
Es ta lebaba mi di bariga di nha mai dirétu pa sipultura.’