Jó
9 Jó responde:
2 “Na verdadi N sabe ma é si.
Má modi ki un sinplis ómi pode ten razon na un kazu kóntra Deus?
3 Si un algen krê diskutiba ku El,*
El ka ta konsigiba responde nen un di kes mil pergunta ki El ta fazeba el.
4 El ten un korason ki ten sabedoria i txeu puder.
Ken ki ta pode infrenta-l i ka fika prujudikadu?
5 El ta muda* kes montanha di lugar sen ningen sabe.
El ta distrui-s na se raiba.
6 El ta poi téra ta sakudi i ta sai di se lugar,
I kes pilar di téra ta treme.
7 El ta manda sol pa ka brilha
I el ta blokia lus di stréla.
8 El ta stende séu el sô,
I el ta anda riba di kes óndia grandi di mar.
9 El faze kes stréla* di Ás,* di Kezil* i di Kima,*
I kes stréla di sul.
10 El ta faze kuzas grandi, ki ka ta da pa intende,
Kuzas ki ta dexa algen dimiradu, ki ka ta da pa konta.
11 El ta pasa na mi, má N ka ta konsigi odja-l.
El ta pasa pértu mi, má N ka ta da kónta di kel-li.
12 Óras ki el ta toma un kuza, ken ki ta pode inpidi-l?
Ken ki ta pode fla-l: ‘Kuzê ki bu sta ta faze?’
13 Deus ka ta ivita se raiba.
Ti kes ajudanti di Raabe* ta inbaxa se dianti.
14 Inda más ami si N respondeba el!
N tinha ki skodjeba nhas palavra ku kuidadu pa N pâpia ku el.
15 Sikrê N tinha razon, N ka ta respondeba el.
Sô N ta pidiba nha juís* pa ten mizerikórdia.
16 Si N txoma-l, el ta responde-m?
N ka ta kridita ma el ta obi nha vós,
17 Pamodi el ta prutxi-m ku un tenporal
I el ta bira nhas frida más txeu sen ninhun motivu.
18 El ka ta dexa-m rekupera folgu
I el ta intxi-m di kuzas margós.
19 Si é pamodi puder, el é kel poderozu.
Si é pamodi justisa, el ta fla: ‘Ken ki pode txoma-m pa N presta kónta?’*
20 Si N tinha razon, nha própi bóka ta kondenaba mi.
Mésmu si N mante nha lialdadi,* el ta ben fla ma mi é kulpadu.
21 Mésmu si N mante nha lialdadi, N ka sabe kuzê ki ta ben kontise ku mi.*
N ta nega* kel vida di meu li.
22 Ka ta faze ninhun diferénsa. É pur isu ki N ta fla:
‘El ta distrui kes algen inosenti* i kes algen mau tanbê.’
23 Si un txeia mataba algen dirapenti,
El ta fazeba trósa di dizusperu di kes inosenti.
24 El intrega téra na mô di kes algen mau.
El ta tapa odju* di kes juís.
Si é ka el, nton, é kenha?
25 Gósi, nhas dia sta pasa más rápidu ki un algen ki sta kóre.
Es ta fuji sen odja kel ki é bon.
26 Es ta disliza sima barku di kana,
Sima ágia ta dixi pa el kasa un animal.
27 Si N flaba: ‘N ta ben skese di nha kexa,
N ta ben konpo nha róstu i N ta ben fika kontenti.’
28 Simé N ta fikaba ku medu pamodi tudu nha dór,
I N sabe ma bu ka ta flaba ma mi é inosenti.
29 Ta fladu ma mi é kulpadu.*
Nton, pakê ki N ta luta atoa?
30 Si N lababa ku agu di névi ki derete,
I N purifikaba nha mô ku sabon,*
31 Bu ta murgudjaba mi na un pósa di lama,
Di manera ki ti nhas ropa ta odiaba mi.
32 Pamodi el é ka un ómi sima mi pa N responde-l,
Ô pa N leba-l pa tribunal.
34 Si el paraba di sota-m*
I si el ka dexaba se raiba pô-m ta xinti medu,
35 Nton, N ta papiaba ku el sen medu,
Pamodi ami é ka kel tipu di algen ki ta pâpia ku medu.