Jó
12 Nton, Jó responde:
2 “Di serteza, nhos é kes ki ten konhisimentu,*
I sabedoria ta ben móre ku nhos!
3 Má ami tanbê N ten intendimentu.*
Anhos é ka midjór di ki mi.
Ken ki ka sabe kes kuza li?
4 Nhas amigu sta ta faze-m trósa,
Ami, ki é un algen ki sta pidi Deus un respósta.
Un ómi ki é justu i sen kulpa sta fazedu trósa.
5 Kel algen ki ka ta preokupa ta dispreza disgrasa,
El ta pensa ma disgrasa ta kontise sô ku kes algen ki ses pé sta ta skorega.
6 Kes ladron ta vive na pas na ses ténda,
I kes ki ta provoka Deus ta vive na suguransa,
Sima kes algen ki tene ses deus falsu na ses mô.
7 Má, favor, pergunta kes animal i es ta inxina-u.
Tanbê pergunta kes pasu na séu i es ta fla-u.
8 Ô presta atenson na* téra, i el ta inxina-u,
I kes pexi di mar ta konta-u.
9 Kal di es ki ka sabe
Ma é mô di Jeová ki faze-s?
11 Obidu ka ta prova palavra
Sima língua* ta sprimenta gostu di kumida?
12 Sabedoria ka ta atxadu na meiu di kes algen di idadi,
I un vida kunpridu ka ta traze intendimentu?
13 El ten sabedoria i puder,
El ten konsedju i intendimentu.
14 Óras ki el bota algun kuza na txon, kel kuza ka ta pode fazedu otu bês.
Kuzê ki el fitxa, ninhun ómi ka ta pode abri.
15 Óras ki el ka ta dexa txuba kai, tudu kuza ta seka.
Óras ki el ta manda txuba, el ta intxi téra.
16 El é fórti i el ten sabedoria.
Na se mô, sta ken ki ta disvia i ken ki ta disvia otus.
17 El ta poi kes konsedjeru ta anda sen sapatu,
I el ta poi kes juís ta aji sima dodu.
18 El ta tra kes korenti ki kes rei poi,
I el ta mara un kórda na ses sintura.
19 El ta poi kes saserdóti ta anda sen sapatu,
I el ta bota na txon kes ki sta firmi na puder.
20 El ta kala kes konsedjeru di kunfiansa.
El ta tra kes ómi di idadi* kapasidadi di toma bons disizon.
21 El ta baza disprézu riba di kes ómi inportanti
I el ta poi kes poderozu ta fika fraku.*
22 El ta mostra kes kuza profundu ki staba na sukuru,
I el ta poi lus ta límia na sukuru.
23 El ta poi kes nason ta bira poderozu, pa el distrui-s.
El ta poi kes nason ta bira grandi, pa el leba-s prézu.
24 El ta tra kes líder di povu intendimentu*
I el ta pô-s ta anda atoa na dizértu.
25 Es ta anda ta palpa na sukuru, undi ki ka ten lus.
El ta pô-s ta anda atoa sima un ómi moku.