Jó
22 Elifás, kel temanita, responde:
2 “Deus meste algen pa algun kuza?
Un algen ki ten sabedoria pode djuda-l na algun kuza?
3 Deus Tudu-Poderozu ta inporta* si bo é justu?
Bu ta atxa ma el ta ganha algun kuza pamodi bu lialdadi?
4 Si bu ten grandi ruspetu pa Deus, el ta kastiga-u?
El ta leba-u pa julgamentu?
5 É ka pamodi bu maldadi é grandi dimás
I bus éru ka ten fin?
6 Pamodi bu ta iziji un garantia di bus irmon sen ninhun motivu,
I bu ta tra ropa di otus algen i bu ta dexa-s nú.*
7 Bu ka ta da agu pa kes algen ki sta kansadu
I bu ta nega da pon pa kes algen ki sta ku fómi.
8 Téra é di kes algen poderozu,
I ken ki ten priviléjiu ta mora na el.
9 Má bu manda kes viúva pa bai ses kaminhu ku mô vaziu,
I bu kebra brasu di kes mininu ki ka ten pai.*
10 É pur isu ki bu sta serkadu di armadilha,*
I disgrasa ki bu ka sta spera ta pô-u ku medu.
11 É pur isu ki sukuru ka ta dexa-u odja,
I un monti agu ta kubri-u.
12 Deus ka sta la riba na séu?
I odja modi ki tudu kes stréla sta altu.
13 Má bu fla: ‘Deus sabe kuzê ki sta kontise na téra?
Núven sukuru ta dexa-l odja pa el julga?
14 Núvens ta kubri-l pa el ka odja
Timenti el sta anda na séu.’*
15 Pur akazu bu ta ben sigi kes kaminhu antigu
Pa undi kes algen mau ta andaba?
16 Mórti leba-s* antis di ténpu,
Sima alisérsi di un kaza ki bai na txeia.*
17 Es ta flaba Deus verdaderu: ‘Dexa-nu en pas!
Kuzê ki kel Tudu-Poderozu pode faze-nu?’
18 Má, é El ki intxi ses kaza ku bons kuza.
(Kel pensamentu mau li sta lonji di mi.)
19 Algen justu ta ben odja ses distruison i es ta ben fika kontenti,
I algen inosenti ta ben ri di es, ta fla:
20 ‘Nos inimigu dja distruídu,
I un lumi ta ben kema kes kuza di ses ki resta.’
21 Konxe Deus dretu i bu ta ben ten pas.
Nton, kuzas dretu ta ben kontise ku bo.
22 Obi ku lei di Deus,
I guarda ses palavra na bu korason.
23 Si bu volta pa Deus Tudu-Poderozu, kuzas ta torna kóre dretu ku bo.
Si bu afasta injustisa di bu ténda,
24 Si bu bota bu oru* na txon
I oru di Ofir na meiu di kes rótxa di vali,*
25 Nton, Deus Tudu-Poderozu ta ser bu oru,
I bu midjór prata.
26 Bu ta ben fika kontenti pamodi Tudu-Poderozu,
I bu ta ben labanta bu róstu pa Deus.
27 Bu ta ben pidi-l ajuda i el ta ben obi-u.
Bu ta ben kunpri bus votu.
28 Kalker kuza ki bu disidi faze ta kóre dretu,
I lus ta ben brilha na bu kaminhu.
29 Pamodi óras ki bu pâpia ku orgulhu, bu ta ben ser umilhadu,
Má el ta ben salva kel algen umildi.*
30 El ta ben salva algen inosenti.
Asi si bu mô sta linpu, di serteza bu ta ben ser salvu.”