Jó
24 “Pamodi ki Deus Tudu-Poderozu ka ta marka un ténpu pa faze julgamentu?
Pamodi ki kes ki konxe-l ka ta odja se dia?*
2 Ten algen ki ta muda kes sinal ki ta marka txon di otu algen.
Es ta furta animal i es ta leba-s pa ses kanpu.
3 Es ta leba buru di kes mininu ki ka ten pai*
I es ta fika ku toru di viúva pa sirbi di garantia pa kuza ki el inprista.
4 Es ta obriga kes algen póbri pa sai di kaminhu.
Kes algen dizanparadu meste sukundi di es.
5 Kes algen póbri ta bai djobe kumida sima buru brabu na dizértu.
Na dizértu, es ta djobe kumida pa ses fidju.
6 Es meste faze kodjéta na txon di otus algen
I panha réstu di uva na txon di algen mau.
7 Es ta pasa noti nú, sen ropa.
Es ka ten nada pa kubri óras ki faze friu.
8 Es sta modjadu pamodi txuba di montanha.
Es ta fika na rótxa pamodi es ka ten lugar di mora.
9 Kes mininu ki ka ten pai ta tradu di petu di ses mai.
I ropa di algen póbri ta lebadu pa sirbi di garantia di kuza ki el inprista.
10 Es ta obrigadu anda nú, sen ropa.
I ku fómi, es ta karega kes fexu di serial.
11 Es ta trabadja duru* déntu sol kenti, na meiu di kes paredi di pédra.
Es ta piza uva pa faze vinhu, má simé es ta fika ku sedi.
12 Kes ki sta ta móre ta kontinua ta jeme na sidadi.
Kes ki sta ku pankada ki ta mata, ta grita ta pidi ajuda.
Má Deus ka sta preokupadu ku kel-li.*
13 Ten algen ki ta ôdia lus.
Es ka konxe kaminhu di lus,
Nen es ka ta anda na se kaminhu.
14 Un asasinu ta labanta di palmanhan,
El ta mata kes algen dizanparadu i póbri,
I di noti el ta furta.
15 Algen ki ta faze adultériu ta spera pa fika noti.
El ta fla: ‘Ningen ka ta odja-m!’
I el ta kubri se róstu.
16 Na sukuru, kes ómi ta invadi* kaza di algen.
Di dia, es ta fika trankadu.
Es ta ivita lus.
17 Es ten medu di palmanhan sima otus algen ten medu di sukuru.
Má es sta kustumadu ku kes kuza ki ta poi pesoas ku medu na sukuru.
18 Má agu ta leba-s faxi.
Ses txon ta ben ser maldisuadu.
Es ka ta ben volta pa ses plantason di uva.
19 Sima séka i kalor ta leba névi ki derete,
É si tanbê ki Sipultura* ta leba kes ki peka!
20 Ses mai* ta ben skese di es. Bitxu ta ben kume-s ku gostu.
Nunka más ka ta ben lenbradu di es.
I injustisa ta ben botadu na txon sima un arvi.
21 Es ta splora mudjer ki ka ta ten fidju,
I es ta maltrata viúva.
22 Deus* ta ben uza se forsa pa distrui kes algen poderozu.
Enbóra es ta engrandese ses kabésa, ses vida é ka suguru.
23 Deus ta dexa-s pa es kontinua ta kunfia na es mê i pa es xinti suguru,
Má el ta odja tudu kuza ki es ta faze.
24 Es ta engrandesedu pa poku ténpu i dipôs es ta dexa di izisti.
Es é sima spiga di serial ki ta kortadu i ki ta djuntadu.
Es ta rabaxadu i es ta móre sima tudu algen.
25 Nton, ken ki ta pode prova ma mi é mintirozu
Ô prova ma N ka ten razon?”