Jó
23 Jó responde:
2 “Ti inda N ta kexa pamodi N ka seta nha situason.
Nha forsa dja kaba pamodi N sta ta jeme.
3 Ai si N sabeba undi ki N ta atxa Deus!
N ta baba ti undi ki el ta mora.
4 N ta aprizentaba nha kazu se dianti
I N ta provaba el ma mi é inosenti.
5 N ta fikaba ta sabe kuzê ki el ta respondeba mi
I N ta prestaba atenson na kuzê ki el ta flaba mi.
6 Pur akazu, Deus ta uzaba se grandi puder kóntra mi?
Nau, N ten serteza ma el ta obiba mi.
7 La, un algen justu ta rezolveba se kazu dianti di Deus.
Nha Juís ta flaba ma mi é inosenti.*
8 Má si N bai pa lésti, el ka sta la.
I si N volta, N ka ta konsigi atxa-l.
9 Óras ki el sta ta trabadja na skerda, N ka ta konsigi odja-l.
Nton, el ta disvia pa direita, má tanbê N ka ta konsigi odja-l.
10 Má el konxe kaminhu ki N ta anda.
Dipôs ki el pô-m na próva, N ta ben sai sima oru ki refinadu.
11 Nha pé sigi ses pasu di manera fiel.
N ka disvia di se kaminhu.
12 Sénpri N kunpri ses mandamentu, N guarda ses palavra na korason.
N faze más di ki kel ki el iziji di mi.
13 Óras ki el ta toma un disizon, ken ki ta pode inpidi-l?
Óras ki el* krê faze algun kuza, el ta faze.
14 Pamodi el ta ben kunpri tudu kel ki el disidi faze pa mi,
I el ta pensa faze más kuza.
15 É pur isu ki N ta xinti perturbadu pamodi el.
Óras ki N ta pensa na el, N ta xinti más medu di el.
16 Deus pô-m ta fika dizanimadu,
I kel Tudu-Poderozu pô-m ta fika ku medu.
17 Sikrê sukuru tapa-m nha róstu,
N ka ta ben fika kaladu.