Jó
4 Nton Elifás, kel temanita, responde:
2 “Si algen tenta pâpia ku bo, bu ta perde paxénxa?
Pamodi ken ki ta pode fika kaladu?
3 É verdadi, bu ta korijiba txeu algen,
I bu ta daba forsa pa kes mô ki staba fraku.
4 Bus palavra ta labantaba kes ki ta tropesaba,
I bu ta biraba firmi kes juelhu ki staba ta fadja.
5 Má gósi ki kes kuza li kontise ku bo, bu ta fika tristi.*
Dja es txiga na bo i bu fika dizanimadu.
6 Bu grandi ruspetu pa Deus ka ta da-u kunfiansa?
Bu kaminhu di lialdadi ka ta da-u speransa?
7 Bu ta lenbra di algun inosenti ki móre?
Ki ténpu ki kes algen justu distruídu?
8 N ten stadu ta odja ma kes ki ta planta* maldadi
I kes ki ta símia disgrasa tanbê ta kodje mésmu kuza.
9 Es ta móre óras ki Deus ta sopra-s,
I ses fin ta txiga óras ki el sopra se raiba riba di es.
10 Lion pode ruji i pode obidu barudju di un lion novu,
Má ti denti di un lion novu ta kebradu.
11 Lion ta móre pamodi falta di kumida,
I kes fidju di lion ta spadjadu.
12 N fladu un palavra na segredu,
I un algen koxixa-m na obidu.
13 Di noti, na kes óra ki algen ta sta na sónu pizadu,
N tevi uns vizon ki perturba-m nha menti.
14 N kumesa ta treme dimás,
I nhas osu intxi di medu.
15 Un spritu pasa pa frenti di nha róstu
I kabelu rapia-m na korpu.
16 Nton, el para,
Má N ka konsigi odja modi ki el éra.
Tinha un vultu dianti di nhas odju.
Faze un silénsiu, i dipôs N obi un vós ta fla:
17 ‘Pur akazu un sinplis ómi pode ser más justu di ki Deus?
Un ómi pode ser más santu di ki se Kriador?’
18 Odja! El ka ta kunfia na ses sérvu,
I el ta atxa fadja na ses anju.*
19 Inda más kes ki ta mora na kaza di baru,
Ki ten alisérsi na téra,
Ki ta piladu faxi sima un bitxu!
20 Es ta piladu tudu, di dia pa noti.
Es ta dizaparse pa tudu ténpu i ningen ka ta repara.
21 Es é ka sima un ténda ki tradu se kórda?
Es ta móre sen sabedoria.