Jó
35 Eliú kontinua ta fla:
2 “Bu sta tantu konvensidu ma bu ten razon, ki bu fla:
‘Ami é más justu di ki Deus’?
3 Bu fla: ‘Kuzê ki ta inporta pa bo* si N faze kel ki é dretu?
Si N ka pekaba, N ta staba na un situason midjór?’
4 N ta ben responde-u abo
I bus amigu.
5 Labanta róstu pa séu i odja,
Djobe kes núven ki sta mutu más altu di ki bo.
6 Si bu peka, modi ki bu ta prujudikaba Deus?
Si bus fadja bira txeu, kuzê ki bu ta fazeba el?
7 Si bo é justu, kuzê ki bu ta da-l?
Kuzê ki el ta resebe di bo?
8 Bu maldadi ta prujudika sô algen sima bo,
I bu justisa ta djuda sô pesoas.
9 Pesoas ta grita pa ajuda pamodi pézu di frónta.
Es ta inplora pa alíviu pamodi kes kuza ki kes algen poderozu ta faze-s.
10 Má ningen ka ta fla: ‘Undi ki Deus sta, kel Grandiozu ki faze-nu,
Kel ki ta poi pesoas ta kanta kántiku di lovor di noti?’
11 El ta inxina-nu pa nu ten más sabedoria di ki kes animal di téra,
I el ta pô-nu ta ten más sabedoria di ki kes pasu di séu.
12 Pesoas ta grita pa ajuda, má el ka ta responde,
Pamodi orgulhu di kes algen mau.
13 Di serteza Deus ka ta obi kes gritu ki é ka sinseru.*
Deus Tudu-Poderozu ka ta presta atenson na kel-li.
14 Mutu ménus inda óras ki bu ta kexa ma bu ka ta odja-l!
Bu kazu sta se dianti, pur isu bu debe spera pa el.
15 Deus ka fika ku raiba di bo i nen el ka iziji pa bu presta kónta.
El ka leba en kónta kes palavra ki bu fla sen sentidu.
16 Jó ta abri bóka atoa,
El ta pâpia txeu sen konhisimentu.”