Jó
37 “Pamodi kel-li, nha korason sta ta bate fórti
I el sta ta salta déntu di nha petu.
2 Nhos obi barudju fórti di se vós* ku atenson
I strubon ki ta sai di se bóka.
3 El ta manda se strubada la di séu
I el ta manda ses relánpagu ti kes párti más lonji di téra.
4 Dipôs ta obidu un barudju fórti.
Vós di Deus é sima son di strubada,
Ki ta kontinua ta faze relánpagu timenti el sta ta pâpia.
5 Ku se vós sima strubada, Deus ta dexa algen dimiradu.
El ta faze kuzas grandi ki nu ka ta konsigi intende.
6 Pamodi el ta fla névi: ‘Kai riba téra’,
I el ta fla txuba: ‘Kai ku tudu bu forsa.’
7 Deus ta para tudu kuza ki algen ta faze,*
Asi pa tudu algen konxe Se trabadju.
8 Kes animal selvajen ta entra na ses braku
I es ta fika na ses lugar di sukundi.
9 Tenporal ta sai di se lugar,
I kes béntu di nórti ta traze friu.
10 Deus ta sopra i ta faze jélu,
I agu ta fika konjeladu.
11 Deus ta intxi núvens ku umidadi,
El ta spadja ses relánpagu na núvens.
12 Núvens ta anda na sirklu sima Deus ta orienta-s,
Na téra interu, es ta faze tudu kuza ki el ta manda-s.
13 Deus ta uza núvens pa traze kastigu* pa rega téra
Ô pa mostra se amor lial.
14 Jó, obi kel-li.
Para i pensa na kes kuza bunitu ki Deus faze.
15 Pur akazu bu sabe modi ki Deus ta kontrola* núven?
I modi ki el ta poi relánpagu ta brilha la di se núven?
16 Bu sabe pamodi ki núvens ka ta kai?
Kes-li é kes kuza bunitu di kel Algen ki ten konhisimentu perfeitu.
17 Pamodi ki bus ropa ta fika kenti
Óras ki téra sta kalmu pamodi béntu sul?
18 El stende séu i el bira-l firmi sima un spedju di metal.
Pur akazu, bu ta pode faze mésmu kuza?
19 Fla-nu kuzê ki nu pode fla-l.
Nu ka sabe modi ki nu ta responde-l pamodi nu sta na sukuru.
20 N debe aviza Deus ma N krê pâpia ku el?
Ten algun kuza ki pesoas fla ki Deus debe sabe?
21 Enbóra sol* ta brilha na séu,
Si núven sukundi-l, nu ka ta konsigi odja-l klaru,
Ti ki béntu sopra kes núven i séu fika linpu.
22 Di nórti, ta ben un lus ki ta brilha sima oru.
Glória di Deus ta dexa algen txeu dimiradu.
23 Nunka nu ka ta pode sabe tudu kuza sobri kel Deus Tudu-Poderozu.
El ten txeu puder,
I sénpri el ta faze kel ki é justu i dretu.
24 Pur isu, pesoas debe ten grandi ruspetu pa el.
Pamodi el ka ta djuda kes algen ki ta atxa ma es ten sabedoria.”