Jó
36 Eliú kontinua ta fla:
2 “Ten un bokadinhu más di paxénxa ku mi timenti N ta splika,
Pamodi inda N tene alguns kuza di fla pa N difende Deus.
3 N ta ben fla tudu kel ki N sabe,
Pa prova ma nha Kriador é justu.
4 Na verdadi, nhas palavra é ka falsu.
Kel ki N ta fla ta ben di Kel algen ki ten konhisimentu perfeitu.
5 Deus é poderozu i el ka ta nega ningen.
Se kapasidadi di intende* é grandi.
6 El ka ta proteje vida di kes algen mau,
Má el ta faze justisa pa kes algen ki sta ta sufri.
7 El ta kontinua ta odja pa kes algen justu.
El ta pô-s ta xinta na tronu ku kes rei,* i el ta da-s ónra pa tudu ténpu.
8 Má si es podu prézu ku korenti
I es maradu ku kórda di sufrimentu,
9 El ta mostra-s kuzê ki es faze,
Ses pekadu é pamodi ses orgulhu.
10 El ta abri ses obidu pa el koriji-s
I el ta fla-s pa es fika lonji di kuzas mariadu.
11 Si es obi ku Deus i es sirbi-l,
Tudu kuza ta ben kóre dretu ku es pa réstu di ses vida,
I ses vida ta ben ser sábi.
12 Má, si es ka obi ku el, spada* ta ben mata-s
I es ta ben móre sen konhisimentu.
13 Kes algen ki ka ten ruspetu pa Deus* ta guarda rankor.
Es ka ta grita pa ajuda sikrê óras ki Deus kastiga-s.
15 Má Deus* ta salva kes algen ki sta sufri duránti ses frónta.
El ta djuda-s obi ku el óras ki es ta maltratadu.
16 El ta libra-u di mô di frónta
I el ta leba-u pa un lugar trankuilu, livri di sufrimentu,
Undi bu ta konsoladu ku kel midjór kumida na bu méza.
17 Nton, bu ta ben fika kontenti ku julgamentu di kes algen mau,
Óras ki dadu senténsa i fazedu justisa.
18 Má, toma kuidadu pa raiba ka pô-u ta aji ku rankor*
I ka bu dexa un grandi subornu disvia-u.
19 Pur akazu, bu gritu pa pidi ajuda
Ô bu sforsu duru ta ben libra-u di bu sufrimentu?
20 Ka bu dizeja pa noti txiga,
Óras ki pesoas ta dizaparse di ses lugar.
21 Toma kuidadu pa bu ka kumesa ta faze maldadi,
Aguenta sufrimentu envês di skodje faze maldadi.
22 Odja! Deus é grandi pamodi se puder.
Ki instrutor é sima el?
23 Ken ki pode fla Deus kuzê ki el ten ki faze?*
Ken ki pode fla-l: ‘Kuzê ki bu faze sta mariadu’?
24 Lenbra di lova Deus pa tudu kuza ki el ta faze,
Kes kuza ki pesoas ta kanta sobri el.
25 Tudu algen ta odja kes óbra di Deus,
Es ta odja-s di lonji.
26 Deus é mutu más grandi di ki kel ki nu ta pode intende.
Ses anu ka ta da pa konta.
27 Deus ta puxa pa riba kes góta di agu,
Kel vapor ta bira agu pa forma txuba.
28 Nton, kes núven ta baza kel agu,
Es ta dispija-l riba di tudu algen.
29 Algen ta pode intende modi ki kes núven ta spadja?
Algen ta pode intende kes barudju di strubada ki ta sai di se ténda?*
31 Di kel manera li, Deus ta kuida* di pesoas,
El ta da-s kumida avontádi.
32 El ta sukundi relánpagu na se mô,
I el ta pô-l ta bai pa undi ki el krê.
33 Ses strubada ta aviza ma el sta ta ben,
Ti mésmu ribanhu ta aviza ken* ki sta ta ben.