Jó
39 “Bu sabe na ki ténpu ki kes kabra di montanha ta ten fidju?
Dja bu kustuma odja kórsa ta ten fidju?
2 Bu sabe kantu mês ki el ta fika ku fidju na bariga?
Bu sabe ki ténpu ki el ta pari?
3 Es ta inbaxa pa ten fidju,
I ses dór di ten fidju ta kaba.
4 Ses fidju ta fika fórti i es ta kria na kanpu.
Es ta bai ses kaminhu i es ka ta volta más.
5 Ken ki da buru brabu* liberdadi?
I ken ki dismara kes kórda di buru brabu?
6 N pô-l ta mora na dizértu
I ta vive na téra salgadu.
7 El ta dispreza barudju di sidadi.
El ka ta obi vós di kes algen ki ta poi animal ta trabadja.
8 Es ta fika ta anda na kes monti ta djobe kumida,
Ta djobe tudu tipu di planta verdi.
9 Pur akazu toru brabu ta krê trabadja pa bo?
El ta pasa noti na bu kural?*
10 Bu ta pode mara un toru brabu na aradu ku un kórda?
Ô el ta bai bu tras pa trabadja txon?
11 Bu ta kunfia na se forsa
I bu ta dexa-l faze kes trabadju pizadu pa bo?
13 Avestrus ta da ku aza kontenti,
Má se aza i se péna ta konparadu ku kel di sigónha?
14 El ta dexa ses ovu na txon,
I el ta kenta-s na téra.
15 El ta skese ma un algen pode piza-s,
Ô ma un animal selvajen pode pila-s ku pé.
16 El ta trata ses fidju di manera duru, sima si es é ka di sel.
El ka ta inporta si se trabadju fika atoa.
17 Pamodi Deus ka da-l* sabedoria
I el ka da-l intendimentu.
18 Má óras ki avestrus ta labanta i el ta da ku aza pa kóre,
El ta ri di kabalu i di kel algen ki sta montadu na el.
19 É bo ki ta da kabalu forsa?
I ki ta bisti se piskôs ku kel kabelu ki ta balansa na béntu?
20 Bu ta pode pô-l ta salta sima un gafanhotu?
Kel barudju fórti ki el ta faze ku narís ta da algen medu.
21 El ta koba txon di vali ku se pé i el ta fika txeu kontenti.
El ta sai ta kóre pa géra.*
22 El ta faze trósa di medu i el ka ta spanta ku nada.
Spada ka ta pô-l ta volta pa tras.
23 Saku di flexa ta sakudi riba di el timenti el ta kóre,
I lansa ku dardu ta brilha.
25 Óras ki tokadu buzina é sima si el ta fla: ‘Nu bai!’
Di lonji el ta xinti txeru di géra
I el ta obi gritu di kes komandanti i gritu di géra.
26 É bo ki inxina falkon modi ki el ta bua?
É bo ki inxina-l bua na direson di sul?
27 Ô é bo ki ta manda ágia pa bua pa riba
I faze se ninhu na kes lugar altu?
28 El ta pasa noti na un rótxa,
El ta vive na un lugar suguru na un rótxa.*
29 Di la, el ta djobe kumida.
Se odju ta odja di lonji.
30 Ses fidju ta bebe sangi.
Na kalker lugar ki sta algun kuza mortu, el ta sta la.”