Jó
40 Jeová kontinua ta responde Jó:
2 “Un algen debe kritika Deus Tudu-Poderozu sima si el faze algun kuza mariadu?
Si algen krê koriji Deus, pa el pâpia gósi.”
3 Jó responde Jeová:
4 “Ken ki é mi?
Kuzê ki N pode responde-u?
N ta tapa nha bóka ku mô.
5 N pâpia un bês ti dôs bês, má N ka ta ben pâpia más.
N ka ta ben fla más nada.”
6 Nton, Jeová responde Jó di meiu di un tenporal:
7 “Favor, pripara sima un ómi.
N ta ben faze-u pergunta i bu ta ben responde-m.
8 Bu sta tenta prova ma mi é ka justu?
Bu sta kondena-m pa mostra ma bu ten razon?
9 Bu brasu é poderozu sima brasu di Deus verdaderu?
Bu vós ta faze barudju di son di strubada sima vós di Deus?
10 Favor, mostra bu glória i puder.
Mostra ma bo é grandi i ma bu merese ónra.
11 Liberta tudu raiba ki bu ten déntu di bo.
Odja pa tudu algen orgulhozu i rabaxa-s.
12 Odja pa tudu kes algen orgulhozu i umilha-s,
Piza kes algen mau undi ki es sta.
13 Sukundi-s tudu na téra.
Prende-s* na un lugar sukundidu,
14 Asi, ti mi N ta rekonhese*
Ma bu mô direita pode salva-u.
15 Odja Biemote,* ki N faze sima N faze-u.
El ta kume padja sima toru.
16 Odja modi ki ses anka é fórti
I odja forsa di musklu di se bariga!
17 El ta poi se rabu ta bira riju sima sédru.
Kes tendon di se koxa sta transadu na kunpanheru.
18 Ses osu é sima tubu di kóbri.
Ses pérna é sima kes bara di féru.
19 Entri kes animal di se tipu, el é kel primeru* óbra grandi ki Deus faze.
É sô se Kriador ki ta pode txiga pértu di el ku un spada.
20 Se kumida ta nase na monti,
Undi tudu animal selvajen ta brinka.
21 El ta deta baxu di spinheru,*
El ta sukundi na kes planta ki ta kria na agu.
22 Kes pé di spinhu ta kubri-l ku se sónbra,
I kes arvi di rubera* ta serka-l.
23 Óras ki riu ta fika ajitadu, el ka ta fadiga.
El ta fika trankuilu, sikrê kes agu di Jurdon ben ku forsa kóntra se róstu.
24 Algen ta pode kasa-l timenti el sta ta odja kel algen?
Ô fra-l se narís ku un ganxu?*