Jó
42 Nton, Jó responde Jeová:
2 “Gósi N sabe ma bu ta konsigi faze tudu kuza
I ma ka ten nada ki bu sta pensa na el ki bu ka ta pode faze.
3 Bu fla: ‘Ken ki é es algen ki sta ta distorse nhas konsedju sen konhisimentu?’
É verdadi, N pâpia sen intende dretu
Sobri kuzas ki é grandi dimás pa mi, kuzas ki N ka konxe.
4 Bu fla: ‘Obi favor, N ta ben pâpia.
N ta ben faze-u pergunta i bu ta ben responde-m.’
5 N obi ta papiadu sobri bo,
Má gósi N sta ta odja-u ku nha própi odju.
6 Pur isu, N ta tra kel ki N fla,
I N ta ben xinta na téra i sinza pa N mostra nha rapendimentu.”
7 Dipôs ki Jeová fla Jó kes palavra li, Jeová fla Elifás, kel temanita:
“N sta txeu xatiadu ku bo i ku bus dôs amigu pamodi nhos ka fla verdadi sobri mi, sima nha sérvu Jó faze. 8 Pur isu, nhos panha 7 toru i 7 karneru i nhos bai atxa nha sérvu Jó, i nhos faze oférta di un sakrifisiu kemadu pa nhos. I nha sérvu Jó ta ben faze orason pa nhos. Di serteza N ta ben obi se pididu* pa N ka kastiga nhos di akordu ku nhos falta di juís, pamodi nhos ka fla verdadi sobri mi, sima nha sérvu Jó faze.”
9 Nton Elifás, kel temanita, Bildade kel suíta, i Zofar, kel namatita, bai i es faze kuzê ki Jeová manda-s. I Jeová obi orason di Jó.
10 Dipôs ki Jó faze orason pa ses amigu, Jeová kaba ku sufrimentu di Jó i el torna da-l se rikéza.* Jeová da-l dobru di tudu kuza ki el tinha antis. 11 Tudu ses irmon i ses irman i tudu kes algen ki antis éra se amigu ba vizita-l i es kume djuntu ku el na se kaza. Es xinti péna di el i es konsola-l pamodi tudu disgrasa ki Jeová dexa kontise ku el. Kada un di es da-l un pésa di prata* i un argóla di oru.
12 Jeová abênsua kel últimu párti di vida di Jó más di ki kel primeru párti di se vida. Jó pasa ta ten 14 mil ovelha, 6 mil kamelu, 2 mil* vaka i mil buru. 13 Tanbê el ben ten más 7 fidju matxu i más três fidju-fémia. 14 Kel primeru fidju-fémia, el pô-l nómi di Jemima, kel sugundu Kézia i kel tirseru Keren-Apuki. 15 Na kel país interu ka tinha ninhun mudjer más bunita ki kes fidju-fémia di Jó. Ses pai da-s un eransa djuntu ku ses irmon.
16 Dipôs di kel-li, Jó vive más 140 anu, i el odja ses fidju i ses nétu, ti kel kuartu jerason. 17 Nton, Jó móre dipôs di un vida kunpridu i sábi.