Jó
41 “Bu ta pode pega Leviatan* ku un anzol
Ô mara se língua ku un kórda?
3 El ta ben pidi-u txeu bês pa bu ten péna di el?
El ta ben pâpia mansu ku bo?
4 El ta ben faze un kontratu ku bo
Pa el bira bu skravu pa vida interu?
5 Bu ta brinka ku el sima si el é un pasu?
Bu ta pô-l un kolera pa bus fidju-fémia divirti ku el?
6 Pur akazu, kes piskador ta bende-l?
Es ta dividi-l pa kes algen ki ta faze nogósiu?
7 Bu ta konsigi fra se péli ku txeu arpon?*
Bu ta pode fra se kabésa ku lansa di péska?
8 Poi mô riba di el.
Bu ka ta skese di kel géra i nunka más bu ka ta faze-l otu bês!
9 Kalker speransa di domina-l é atoa.
Sô di odja-l bu ta fika paralizadu.*
10 Ningen ka ta tenta provoka-l.
Nton, ken ki pode infrenta-m?
11 Ken ki da-m algun kuza antis, ki gósi N ten ki rekonpensa-l?
Tudu kuza dibaxu di séu é di meu.
12 N ka ta dexa di pâpia di ses pérna,
Di se forsa i di se korpu ben formadu.
13 Ken ki dja konsigi tra se péli?
Ken ki dja pasa na meiu di se bóka?
14 Ken ki ta konsigi abri pórta di se bóka?*
Kes denti na se vólta ta da algen medu.
15 Na se kósta ten fila di skama*
Ki sta ben koladu na kunpanheru.
16 Kada un di es ta inkaxa dretu na kunpanheru
Ki nen ar ka ta pode entra na ses meiu.
17 Es sta prézu na kunpanheru.
Es ta pega na kunpanheru i es ka ta pode siparadu.
18 Óras ki el ta spira, ta sai faíska di lus.
Se odju é sima raiu di lus di palmanhan.
19 Relánpagu ta sai di se bóka.
Faíska di lumi ta sai di se bóka.
20 Di se narís, ta sai fumu,
Sima un fornadja ki sta ta kema padja.
21 Se folgu ta sende lumi na braza,
I un lumi ta sai di se bóka.
22 Se piskós é fórti dimás,
I tudu ken ki inkontra ku el ta fika xeiu di medu.
23 Kes dóbra di se péli sta ben ligadu na kunpanheru.
Es sta firmi, sima un plaka di metal riba di el ki ka ta pode rinkadu.
24 Se korason é duru sima pédra,
Duru sima pédra di muinhu.
25 Óras ki el ta labanta, ti kes algen fórti ta fika ku medu.
Óras ki el ta sakudi se korpu, ta da algen medu.
26 Ninhun spada ka ta faze-l nada,
Nen lansa, nen dardu, nen pónta di flexa.
27 Pa el, féru é sima padja
I kóbri é sima madera podri.
28 Un flexa ka ta pô-l ta fuji.
Pa el, kes pédra di funda é sima padja.
29 Pó é sima padja pa el.
El ta ri di barudju di dardu.
30 Se bariga é moladu sima padás di vazu di baru kebradu.
El ta pasa riba di lama sima tábua di digudja.*
31 El ta poi agu ta ferbe sima agu na un panéla.
El ta poi mar ajitadu sima óliu na un panéla.
32 Óras ki el ta nada el ta dexa marka di skuma se tras.
El ta poi agu ta parse sima si el tene kabelu branku.
33 Ka ten nada sima el na téra.
El é un animal ki fazedu pa ka xinti medu.
34 El ta djobe sen medu pa tudu kes animal ki é orgulhozu.
El é rei di tudu kes animal selvajen i fórti.”