Jó
8 Nton, Bildade, kel suíta, responde:
2 “Ti ki ténpu bu ta kontinua ta pâpia si?
Kes palavra di bu bóka ka ta pasa di un béntu fórti!
3 Pur akazu Deus ta faze justisa mariadu?
Deus Tudu-Poderozu ka ta faze kel ki é dretu?
4 Si bus fidju peka kóntra el,
El dexa-s kastigadu pamodi es foi rebéldi.*
5 Má si bu buskaba Deus
I bu inploraba Tudu-Poderozu pa djuda-u,
6 I si na verdadi bo éra puru i justu,
El ta prestaba atenson na bo
I el ta daba bo kel lugar ki bu ten direitu.
7 I enbóra bu komésu foi pikinoti,
Bu futuru ta sérba grandi.
8 Favor, pergunta kel jerason ki pasa,
I presta atenson na kes kuza ki ses pai diskubri.
9 Pamodi é sô onti ki nu nase, i nu ka sabe di nada,
Dja ki nos dia na téra é sima un sónbra.
10 Pur akazu, es ka ta inxina-u
I es ka ta fla-u kuzê ki es sabe?*
11 Pur akazu, papiru ta kria na lugar ki ka ten agu?
Kana* ta kria grandi sen agu?
12 Timenti inda el sta ta flora, antis di el rinkadu, el ta seka,
Antis di kalker otu planta.
13 É kel-li ki é fin* di tudu kes ki ta skese di Deus,
Pamodi speransa di kes ki ka ten ruspetu pa Deus* ta ben kaba,
14 Ses kunfiansa é atoa
I ses suguransa é frájil sima un teia* di aranha.
15 El ta apoia na se kaza, má se kaza ka ta fika di pé.
El ta tenta pega na el, má se kaza ka ta dura.
16 El é sima un planta verdi na sol,
I ses ramu ta spadja na jardin.
17 Ses raís ta transa na kunpanheru, na un monti di pédra.
El ta djobe un kaza na meiu di kes pédra.*
18 Má óras ki el rinkadu* di se lugar,
Kel lugar ka ta rekonhese-l i el ta fla-l: ‘Nunka N ka odjaba bo’.
19 É si ki el ta ben dizaparse.*
Nton, otus algen ta ben parse na se lugar, sima planta ta nase di txon.
20 Di serteza, Deus ka ta ben nega kes ki ta mante lial,*
Nen el ka ta ben apoia* kes ki é mau.
21 El ta ben pô-u ta ri
I ta grita di alegria otu bês.
22 Kes ki ta odia-u ta ben bistidu di vergónha,
I ténda di kes algen mau ka ta ben izisti más.”