Salmu
148 Nhos lova Jeová!*
Nhos ki sta na séu, nhos lova Jeová.
Nhos ki sta na kes lugar más altu, nhos lova-l.
2 Tudu ses anju, nhos lova-l.
Tudu se izérsitu, nhos lova-l.
3 Sol i lua, nhos lova-l.
Tudu stréla ki ta brilha, nhos lova-l.
4 Kel séu más altu,* nhos lova-l.
Kes núven di séu, nhos lova-l.
5 Pa tudu es lova nómi di Jeová,
Pamodi el da órdi i es kriadu.
6 El pô-s na ses lugar pa tudu ténpu.
El da un lei ki ka pode anuladu.
7 Nhos lova Jeová na téra,
Kes kriatura grandi ki sta na mar i tudu kes agu fundu,
8 Relánpagu i granizu, névi i kes núven sukuru,
I tanbê tenporal, ki ta kunpri se palavra, nhos lova-l,
9 Tudu kes monti grandi ku pikinoti,
Kes arvi ki ta da fruta i tudu sédru, nhos lova-l.
10 Kes animal selvajen i tudu kes animal doméstiku,
Kes animal ki ta rasta i kes pasu, nhos lova-l.
11 Kes rei di téra i tudu kes nason,
Kes prínsipi i tudu kes juís di téra, nhos lova-l.
Algen di idadi ku jóvens, nhos lova-l tudu djuntu.
13 Pa tudu es lova nómi di Jeová,
Pamodi é sô se nómi ki é más grandi di ki tudu kes otu nómi.
Se glória é más altu di ki séu ku téra.
14 El ta da se povu más forsa,*
Pa tudu ses sérvu lial pode lovadu,
Ki é kes fidju di Israel, kel povu ki ten un amizadi fórti ku el.
Nhos lova Jeová!