Salmu
Un múzika di Davidi, kantu el staba ta fuji di se fidju Absalon.
3 Ó Jeová, pamodi ki N ten txeu inimigu si?
Pamodi ki txeu algen sta kóntra mi?
2 Txeu algen sta ta fla kel-li di mi:*
“Deus ka ta salva-l.” (Selá)*
3 Má abo, ó Jeová, bo é un skudu ki ta proteje-m na nha vólta,
Bu ta torna da-m nha glória i bu ta labanta nha kabésa.
4 N ta ben txoma Jeová ku vós altu,
I el ta ben responde-m la di se monti santu. (Selá)
5 N ta ba deta i N ta durmi.
N ta korda i N ta xinti protejidu,
Pamodi Jeová ta kontinua ta djuda-m.
6 N ka ta xinti medu di kes monti di algen
Ki sta kóntra mi pa tudu ladu.
7 Ó Jeová, labanta! Ó nha Deus, salva-m!
Pamodi bu ta ben da tudu nhas inimigu soku na róstu.
Bu ta ben kebra denti di tudu kes algen mau.
8 Salvason ta ben di Jeová.
Bu benson sta riba di bu povu. (Selá)