Salmu
Pa diretor di múzika. Pa kunpanha ku instrumentu di kórda. Un múzika di Davidi.
4 Ó nha Deus ki é justu, óras ki N txoma-u, responde-m.
Óras ki N sta frontadu, da-m un saída.
Ten péna di mi i obi nha orason.
2 Anhos ki é fidju di ómi, ti ki ténpu nhos ta umilha-m envês di da-m ónra?
Ti ki ténpu nhos ta ama kes kuza ki ka ten valor i nhos ta djobe kes kuza ki é falsu? (Selá)
3 Nhos fika ta sabe ma Jeová ta trata di manera spesial kel algen ki é lial pa el.*
Jeová ta ben obi-m óras ki N txoma-l.
4 Nhos fika xatiadu, má ka nhos peka.
Nhos pâpia déntu di nhos, riba di nhos kama i nhos fika kaladu. (Selá)
5 Oferese bu sakrifisiu ku un korason sinseru
I kunfia na Jeová.
6 Ten txeu algen ki ta fla: “Ken ki ta ben mostra-nu algun kuza ki é bon?”
Ó Jeová, mostra ma bu sta kontenti ku nos.*
7 Bu intxi nha korason di alegria,
Bu pô-m ta fika más kontenti di ki kes algen ki ten txeu kodjéta di serial i vinhu novu.
8 N ta deta i N ta durmi na pas,
Pamodi é sô bo, ó Jeová, ki ta pô-m ta xinti suguru.