Salmu
Un múzika di Davidi. Kántiku pa inaugurason di se kaza.*
30 Ó Jeová, N ta lova-u pamodi bu labanta-m;*
Bu ka dexa pa nhas inimigu fika kontenti na nha kusta.
2 Ó Jeová, nha Deus, N grita ta pidi-u ajuda i bu kura-m.
3 Ó Jeová, bu tra-m* di Sipultura.*
É bo ki tene-m ku vida. Bu ka dexa-m dixi pa kóba.*
4 Anhos ki é lial pa el, nhos kanta pa lova* Jeová,
Nhos agradese pa se nómi santu.*
5 Pamodi se raiba ta dura sô pa poku ténpu,
Má se bondadi ta dura pa vida interu.
Di noti talvês ta ten txoru, má di palmanhan ta ten gritu di alegria.
6 Kantu N staba ta vive trankuilu, N fla:
“Nada mariadu ka ta ben kontise ku mi.”*
7 Ó Jeová, kantu bu staba kontenti ku mi, bu pô-m ta bira fórti sima un monti.
Má kantu bu sukundi bu róstu, medu toma kónta di mi.
8 Ó Jeová, é bo ki N kontinua ta txoma.
I é na Jeová ki N kontinua ta pidi ajuda.
9 Kuzê ki ta ganhadu ku nha mórti,* si N dixi pa kóba?*
Pur akazu puera ta lova-u? El ta fla ma bo é fiel?
10 Ó Jeová, obi-m i ten péna di mi.
Ó Jeová, é sô bo ki ta djuda-m.
11 Bu bira nha tristéza na badju di alegria.
Bu tra-m nha panu di saku* i bu bisti-m di alegria,
12 Asi pa N* kanta pa N lova-u i pa N ka fika kaladu.
Ó Jeová, nha Deus, N ta lova-u pa tudu ténpu.