Salmu
Un múzika di tristéza ki Davidi kanta pa Jeová pamodi kes palavra di Kuxe, kel benjaminita.
7 Ó Jeová, nha Deus, N djobe proteson na bo.
Salva-m di tudu kes ki sta pirsigi-m i libra-m di ses mô.
2 Sinon, es ta dispadasa-m* sima lion ta faze.
Es ta panha-m, es ta leba-m i ka ta ten ningen ki ta libra-m.
3 Ó Jeová, nha Deus, si N faze algun kuza mariadu,
Si N aji ku injustisa,
4 Si N trata mariadu kel ki trata-m dretu,
Ô si sen razon N toma nha inimigu ses kuza,*
5 Nton pa un inimigu pirsigi-m i pega-m.*
Pa el da-m na txon i pa el piza-m ku pé,*
I pa el poi nha glória ta kaba na nada sima puera. (Selá)
6 Ó Jeová, mostra ma bu sta ku raiba.
Faze algun kuza, infrenta nhas inimigu ki sta ku raiba.
Ben djuda-m i da órdi pa fazedu justisa.
7 Dexa kes nason fika na bu vólta,
I bu ta ben aji kóntra es la di séu.
8 Jeová ta ben julga kes povu.
Ó Jeová, óras ki bu julga-m lenbra di nha lialdadi
I di tudu kes kuza justu ki N faze.
9 Favor, kaba ku maldadi di kes algen mau.
Má djuda kes algen justu fika firmi,
Pamodi abo é un Deus justu ki ta izamina korason i kes sentimentu más fundu.*
10 Deus é nha skudu, kel ki ta salva kes ki ten korason sinseru.
11 Deus é un Juís justu,
I tudu dia el ta fla ses julgamentu kóntra* kes algen mau.
12 Si un algen ka rapende, Deus ta mola se spada,
El ta panha se arku i el ta pô-l prontu.
13 El ta pripara se arma ki ta mata.
El ta pripara se flexa ki ten lumi.
14 Odja! Ten algen ki sta ta faze planu pa faze kuzas mariadu.
El ta faze planu pa faze maldadi i el ta konta mintira.*
15 El ta faze un braku i el ta koba-l fundu,
Má el ta kai na kel kóba ki el faze.
16 Kel prubléma ki el ta ben ranja ta kai riba di se própi kabésa.
Kes kuza violéntu ki el ta ben faze ta kai riba di se kabésa.
17 N ta ben lova Jeová pa se justisa:
N ta ben kanta* pa lova nómi di Jeová, kel Deus Más Grandi.