Salmu
Pa diretor di múzika. Pa toka na ton di múzika di mute-labén.* Un múzika di Davidi.
א [alefe]
9 Ó Jeová, N ta ben lova-u di tudu nha korason.
N ta ben pâpia di tudu kes kuza bunitu ki bu faze.
2 Ó Deus, kel Más Grandi, N ta fika kontenti i filís pamodi bo.
N ta kanta pa N lova* bu nómi.
ב [bete]
3 Óras ki nhas inimigu fuji di mi,
Es ta ben tropesa i es ta móre bu dianti.
4 Pamodi bu ta difende-m pa N fazedu justisa.
Bu ta xinta na bu tronu i bu ta julga ku justisa.
ג [gimel]
5 Bu koriji kes nason i bu distrui kes algen mau.
Bu paga ses nómi pa tudu ténpu.
6 Kes inimigu distruídu pa tudu ténpu.
Bu distrui ses sidadi,
I ka ta lenbradu di ninhun di es más.
ה [hê]
7 Má Jeová sta na se tronu pa tudu ténpu.
El poi se tronu ta fika firmi pa el faze justisa.
8 El ta ben julga téra interu ku justisa.
El ta ben julga nason di akordu ku kel ki é justu.
ו [vau]
9 Jeová ta ben bira un proteson suguru* pa kes ki sta ta sufri.
Un proteson suguru na ténpus di frónta.
10 Kes ki konxe bu nómi ta ben kunfia na bo.
Ó Jeová, nunka bu ka ta bandona kes ki ta djobe-u.
ז [zaine]
11 Nhos kanta lovor pa Jeová, ki ta mora na Sion.
I nhos dexa tudu povu sabe kes kuza ki el faze.
12 Deus ta ben lenbra di kes ki maltratadu i el ta ben vinga di kes ki mata-s.
El ka ta skese di ses pididu di ajuda.
ח [ete]
13 Ó Jeová, ten péna di mi. Odja kuzê ki kes algen ki ta odia-m sta ta faze ku mi,
Abo é kel ki ta salva-m di mórti,*
14 Pa N pode pâpia na kes porton di sidadi* di Sion, di kes kuza ki bu faze i ki merese lovor
I pa N fika kontenti pamodi bu salva-m.
ט [tete]
15 Kes nason kai déntu di un kóba ki es koba.
Ses pé fika prézu na kel redi ki es sukundi.
16 Pesoas ta konxe Jeová pa kes julgamentu ki el ta faze.
Kes algen mau kai na kes armadilha ki es faze ku ses própi mô.
Igaion.* (Selá)
י [iode]
17 Kes algen mau ta bai pa Sipultura,*
É pa la ki tudu kes nason ki ta skese di Deus ta bai.
18 Má Deus ka ta ben skese di kes algen póbri pa tudu ténpu,
I speransa di kes algen mansu ta ben realiza.
כ [kafe]
19 Ó Jeová, labanta! Julga kes nason.
Ka bu dexa ómi vense-u.
20 Ó Jeová, pô-s ta xinti txeu medu.
Dexa tudu kes nason li sabe ma es é ka nada. (Selá)