Salmu
ל [lamede]
10 Ó Jeová, pamodi ki bu sta mutu lonji?
Pamodi ki bu sta sukundi na ténpu di frónta?
2 Pamodi orgulhu, kes algen mau ta pirsigi kes ki sta dizanparadu,
Má es ta ben kai na kes armadilha ki es faze.
3 Pamodi ken ki é mau ta ingaba di ses dizeju mariadu*
I el ta abênsua ken ki é ganansiozu.*
נ [nune]
El ka ta ruspeta Jeová.
4 Kes algen ki é mau é orgulhozu, pamodi es ka ta djobe Deus.
Sénpri es ta pensa: “Deus ka ta izisti.”
5 Es ta ten bons rezultadu na tudu kuza ki es ta faze,
Má bus lei é grandi dimás pa es intende.
Es ta faze trósa di* tudu ses inimigu.
6 Es ta fla na ses korason: “Nunka N ka ta ben kai.
Jerason ta bai jerason ta ben,
Nunka ka ta ben kontise ninhun disgrasa ku mi.”
פ [pê]
7 Ses bóka sta xeiu di maldison, mintira i amiasa.
Baxu di ses língua sta disgrasa i maldadi.
8 Es ta sukundi pértu di kes vila pa es ataka algen.
Es ta sai di kel lugar ki es sukundi pa es mata algen inosenti.
ע [aine]
Ses odju sta ta djobe algen pa es ataka.
9 Es ta fika ta spera na ses lugar di sukundi sima un lion na se braku.
Es ta fika ta spera pa es kasa kel ki sta dizanparadu.
Es ta kasa kel ki sta dizanparadu óras ki es ta fitxa ses redi.
10 Es ta dispadasa-l i es ta bota-l na txon.
Kel koitadu ta kai na ses mô.
11 Es ta fla na ses korason: “Deus dja skese.
Dja el vira se róstu pa la.
Nunka el ka ta odja nada.”
ק [kofe]
12 Ó Jeová, labanta. Ó Deus, aji.
Ka bu skese di kes ki sta dizanparadu.
13 Pamodi ki kes algen mau ka ta ruspeta Deus?
Es ta fla na ses korason: “Deus ka ta pidi-m pa N presta kónta.”
ר [rexe]
14 Má bu ta odja disgrasa i frónta.
Bu ta odja i bu ta poi kel asuntu na bu mô.
Kel ki sta sufri ta volta pa bo.
É bo ki ta djuda kes ki ka ten pai.*
ש [xin]
15 Kebra brasu di kes ómi mau i runhu,
Asi, pa óras ki bu djobe ses maldadi,
Bu ka ta atxa-s más.
16 Jeová é Rei pa tudu ténpu.
Pur isu kes nason dizaparse di téra.
ת [tau]
17 Ó Jeová, bu ta ben obi pididu di kes algen mansu.
Bu ta ben bira ses korason fórti i bu ta ben obi-s ku txeu atenson.
18 Bu ta ben faze justisa pa kes ki ka ten pai i pa kes algen ki sta sufri,
Asi pa ninhun ómi li na téra ka pô-s ta xinti medu más.