Nunbru

6 Tanbê, Jeová fla Muizés: 2 “Fla israelitas: ‘Si un ómi ô un mudjer faze un votu spesial pa vive sima un nazireu* pa Jeová, 3 el debe fika lonji di vinhu i di otus bebida alkólika. El ka debe bebe vinagri di vinhu i nen vinagri di nada ki ten alkól. El ka debe bebe ninhun bebida ki fazedu di uva i nen el ka debe kume uva, nen frésku nen séku. 4 Duránti tudu se ténpu di nazireu el ka debe kume nada ki ta ben di pé di uva, désdi uva verdi ti kaska.

5 “‘Duránti tudu ténpu di se votu di nazireu el ka debe pasa nabadja na se kabésa. El debe dexa se kabelu kria ti ki tirmina kes dia ki el sta siparadu pa Jeová, asi pa el pode kontinua santu. 6 El ka debe txiga pértu di un algen mortu* duránti tudu kes dia ki el sta siparadu pa Jeová. 7 Sikrê se pai, se mai, se irmon ô se irman móre, el ka pode fika inpuru, pamodi pa se Deus el tene un sinal di nazireu na se kabésa.

8 “‘El é santu pa Jeová duránti tudu kes dia ki el é nazireu. 9 Má, si un algen móre dirapenti na se ladu i se kabelu ki ta reprizenta ma el sta siparadu pa Deus bira inpuru,* el debe rapa se kabésa na dia di se purifikason. El debe rapa-l na sétimu dia. 10 I na oitavu dia el debe leba pa saserdóti dôs rola ô dôs ponba novu na entrada di ténda di runion. 11 Saserdóti ta oferese un pa ser oférta pa pekadu i kel otu pa ser oférta kemadu, pa el ten perdon di pekadu, pamodi el peka kantu el txiga pértu di un algen mortu. Nton, kel nazireu ta santifika se kabésa na kel dia li. 12 I el debe sipara otu bês pa Jeová, asi pa el torna kumesa ta konta kes dia di se nazireu, i el ta leba un karnerinhu na primeru anu di vida pa ser oférta pa kulpa. Má, ka ta kontadu kes dia ki dja pasa pamodi el bira inpuru timenti el staba nazireu.

13 “‘É kel-li ki é lei sobri nazireu: óras ki el konpleta kes dia di se nazireu, el ta lebadu ti entrada di ténda di runion. 14 La, el debe aprizenta se oférta pa Jeová: un karnerinhu sen difeitu na primeru anu di vida pa ser oférta kemadu, un ovelha pikinoti sen difeitu na primeru anu di vida pa ser oférta pa pekadu, un karneru sen difeitu pa ser sakrifisiu di pas, 15 un sestu di pon ku fórma di anel sen fermentu ki fazedu ku farinha finu misturadu ku azeti i pon finu* sen fermentu untadu ku azeti, i ses oférta di serial i ses oférta di bebida. 16 Saserdóti ta aprizenta-s dianti di Jeová i el ta faze kel oférta pa pekadu i kel oférta kemadu. 17 El ta oferese Jeová kel karneru pa ser sakrifisiu di pas, djuntu ku kel sestu di pon sen fermentu, i saserdóti ta oferese ses oférta di serial i ses oférta di bebida.

18 “‘Nton, kel nazireu debe rapa kabelu di se kabésa na entrada di ténda di runion, dipôs el ta panha kel kabelu di se kabésa ki kria duránti kel ténpu ki el staba nazireu i el ta pô-l na kel lumi ki sta dibaxu di kel sakrifisiu di pas. 19 I saserdóti debe panha kel onbru di karneru ki kuzinhadu, un pon ku fórma di anel, sen fermentu, ki tradu di sestu i un pon finu, sen fermentu, i pô-s na palma di mô di nazireu dipôs ki el rapa se kabésa. 20 I kel saserdóti debe balansa-s di un ladu pa kel otu, sima un oférta balansadu dianti di Jeová. El é un kuza sagradu pa saserdóti djuntu ku kel petu di oférta balansadu i kel pérna di kontribuison. Dipôs di kel-la, kel nazireu pode bebe vinhu.

21 “‘É kel-li ki é lei pa kel nazireu ki faze un votu: si el faze un votu di faze un oférta pa Jeová más ki kel ki ta izijidu pa el ser nazireu i el ta pode faze-l, el debe kunpri se votu pa ruspeta lei di se nazireu.’”

22 Nton, Jeová fla Muizés: 23 “Fla Aron i ses fidju: ‘É si ki nhos debe abênsua povu di Israel. Nhos fla-s:

24 “Pa Jeová abensua-u i proteje-u.

25 Pa Jeová poi se róstu ta límia riba di bo i pa el djuda-u.

26 Pa Jeová djobe pa bo ku bondadi* i pa el da-u pas.”’

27 I es debe uza nha nómi pa abênsua povu di Israel, asi pa N pode abensua-s.”