Jó
38 Nton, Jeová responde Jó di meiu di tenporal i el fla-l:
2 “Ken ki é es algen ki sta ta distorse nhas konsedju
I ki sta ta pâpia sen konhisimentu?
3 Favor, pripara sima un ómi.
N ta ben faze-u pergunta i bu ta ben responde-m.
4 Undi ki bu staba kantu N lansa alisérsi di téra?
Responde-m, si bu ta atxa ma bu sabe.
5 Bu sabe kenha ki fíksa medida di téra
Ô kenha ki stika linha pa midi téra?
6 Riba di kuzê ki se alisérsi sta finkadu,
I kenha ki poi se pédra di kantu,
7 Na kel ténpu ki kes stréla di palmanhan staba ta grita di alegria tudu djuntu,
I tudu kes fidju di Deus* staba ta grita di alegria?
8 Ken ki fitxa pórta di mar kantu el sai di bariga?
Ken ki pô-l un limiti kantu el staba ta nase?
9 Undi bu staba kantu N bisti mar ku núven
I kantu N inbrudja-l ku núven sukuru?
10 Undi bu staba kantu N pô-l un limiti
I kantu N pô-l pórta i tranka?
11 Undi bu staba kantu N fla-l: ‘Bu pode txiga ti li, má bu ka pode bai más pa la.
É li ki bus óndia altu* ta para’?
12 Algun bês bu da palmanhan órdi
Ô bu mostra sol undi ki el ta nase?
13 É bo ki ta fla lus di palmanhan pa el bai pa kes párti más lonji di téra
I pa el sakudi kes algen mau?
14 Téra ta transforma sima baru baxu di un sélu,
I tudu kuza ki ten na el ta parse klaru sima infeitus di un ropa.
15 Má kes algen mau ta fika sen lus,
I ses brasu fórti* ta kebradu.
16 Dja bu dixi pa fundu di* mar
Ô dja bu splora kes agu fundu?
17 Algen dja mostra-u kes porton di mórti,
Ô dja bu odja kes porton di kes lugar sukuru dimás?*
18 Bu ten ideia di modi ki téra é grandi?
Responde-m, si bu sabe tudu kes kuza li.
19 Bu sabe undi ki lus ta mora?
I undi ki sukuru ta sta?
20 Bu ta pode leba-l pa lugar ki el sta?
Bu konxe kaminhu di se kaza?
21 Bu sabe kel-li pamodi dja bu naseba
Ô pamodi dja bu ten txeu anu na mundu?
22 Pur akazu, dja bu entra na kes armazén di névi?
Ô bu txiga di odja kes armazén di granizu
23 Ki N tene guardadu pa ténpu di frónta
I pa dia di géra?
24 Di undi ki lus* ta ben?
I di undi ki béntu lésti ta sopra na téra?
25 Ken ki abri un kanal di agu na séu pa txuba fórti kai?
I ken ki faze un kaminhu pa núven di tenpistadi i strubada?
26 Ken ki ta poi txuba ta kai undi ki ka ta mora ningen?
Ken ki ta poi txuba ta kai na dizértu, undi ki ka ten ningen?
27 Ken ki ta poi txuba ta kai riba di kes lugar distruídu i dizértu
I ken ki ta poi padja ta nase?
28 Txuba ten pai?
Ken ki é pai di orbadju?
29 Ken ki é mai di jélu?
I ken ki ta poi jiada ta kai di séu?
30 Ken ki ta kubri agu sima si el sta kubértu ku pédra?
I ken ki ta sukundi kes agu ki sta fundu, baxu di jélu?
31 Bu ta konsigi mara kes kórda di kes stréla di Kima?*
Bu ta konsigi dismara kes kórda di stréla di Kezil?*
32 Bu ta pode poi un grupu di stréla* ta parse na se ténpu sértu,
Ô gia kes stréla di Ás* ku ses fidju?
33 Pur akazu, bu konxe kes lei ki ta governa séu,
Ô bu ta pode pô-s* ta governa téra?
34 Bu ta pode da núven órdi
Pa es txobe fórti riba bo?
35 Bu ta pode manda raiu pa sai?
Pur akazu, es ta ben i es ta fla-u: ‘Ale-nu li!’?
37 Ken ki ten sabedoria pa konta núven?
Ô ken ki pode dispija kes jaru di agu di séu,
38 Asi pa téra bira lama
I pa kes padás di téra kola na kunpanheru?
39 Bu ta pode kasa animal pa lion kume?
Ô bu ta pode farta ses fidju,
40 Óras ki es ta fika sukundidu na ses braku
Ô óras ki es ta fika detadu ta spera pa es ataka?
41 Ken ki ta da korvu kumida
Óras ki ses fidju ta pidi Deus ajuda
I es ta anda atoa pamodi es ka ten nada pa kume?