Jó

 2 “N ta gostaba di volta pa kes mês ki dja pasa,

Pa kes dia ki Deus ta kuidaba di mi,

 3 Kantu el ta poba se lánpida ta brilha riba di nha kabésa,

Kantu el ta limiaba nha kaminhu na sukuru,

 4 Kantu N staba xeiu di forsa,

I N ta xintiba amizadi di Deus na nha ténda,

 5 Kantu Deus Tudu-Poderozu inda staba ku mi,

Kantu tudu nhas fidju* staba na nha vólta,

 6 Kantu N ta lababa nha pé na mantega,

I rótxa ta bazaba txeu azeti pa mi.

 7 Kantu N ta baba pa porton di sidadi

I N ta xintaba na nha lugar, na prasa,

 8 Kantu kes jóven ta odjaba mi i es ta saíba di kaminhu* pa N pasaba,

I ti kes algen di idadi ta labantaba i es ta fikaba di pé.

 9 Kes prínsipi ta fikaba kaladu.

Es ta tapaba bóka ku ses mô.

10 Kes ómi inportanti ta fikaba kaladu,

Ses língua ta kolaba na séu di bóka.

11 Ken ki ta obiba mi ta papiaba ben di mi,

I kes ki ta odjaba mi ta daba bon tistimunhu di mi.

12 Pamodi N ta salvaba algen póbri ki ta gritaba pa ajuda,

I tanbê kes mininu ki ka tinha pai* i kalker algen ki ka tinha ningen pa djuda-l.

13 Algen ki staba kuazi ta móre ta abensuaba mi,

I N ta poba korason di viúva ta fikaba kontenti.

14 N ta bistiba justisa sima nha ropa,

Nha retidon éra sima un ropa* i un turbanti.*

15 Ami éra odju pa algen ségu

I pé pa algen manku.

16 Ami éra un pai pa algen póbri.

N ta djudaba algen ki N ka konxeba pa tinha un julgamentu justu.

17 N ta kebraba kexada di kes algen mau,

I N ta libertaba kes algen ki es kasa ku denti.

18 N ta kustuma flaba: ‘N ta ben móre na nha própi kaza,*

I nhas dia ta ben ser txeu sima gran di areia.

19 Nha raís ta ben spadja ti txiga na agu,

I orbadju ta ben pasa noti interu riba di nhas ramu.

20 Nha glória ta kontinua ta bira novu,

I kel arku* na nha mô ta kontinua ta da ku flexa.’

21 Pesoas ta obiba mi ku atenson,

Es ta speraba kaladu pa nha konsedju.

22 Dipôs ki N tirminaba di pâpia, es ka ta tinha más nada pa fla.

Nhas palavra ta entraba suavi* na ses obidu.

23 Es ta speraba pa mi sima ta speradu pa txuba.

Es ta abriba ses bóka dretu sima si éra pa bebe txuba di primavéra.

24 Óras ki N ta daba es un surizu, es ka ta krê kriditaba.

Lus di nha róstu ta dexaba es trankuilu.*

25 N ta daba es orientason sima si mi éra ses xéfi,

I N ta viveba sima un rei na meiu di ses trópa,

Sima ken ki ta konsola kes ki ta txora.