Jó
16 Jó responde:
2 “Dja N obi txeu kuza sima kes-li.
Envês di nhos konsola-m nhos sta ta pô-m ta sufri más inda!
3 Kes palavra vaziu* li ka ta ten fin?
Kuzê ki sta ta pô-u ta pâpia si?
4 Mi tanbê N podia papiaba sima nhos.
5 Má envês di faze kel-li, N ta daba nhos forsa ku palavras di nha bóka,
N ta konsolaba nhos i N ta aliviaba nhos dór.
6 Si N pâpia, nha dór ka ta fria,
Si N fika kaladu, nha dór ka ta bira más poku.
7 Má Deus kaba ku nha forsa.
El distrui tudu algen di nha kaza.*
8 N sta ta sufri na se mô, i pesoas sta ta odja kel-li klaru,
I pamodi N sta magru kel-li sta da tistimunhu kóntra mi.
9 Se raiba dja dispadasa-m, i el ta odia-m.
El ta rintxa* denti kóntra mi.
El ta odja-m ku raiba sima si el é nha inimigu.
10 Pesoas ta abri bóka largu kóntra mi,
I es ta da-m bafatada ku disprézu.
Es ta djunta na un grupu grandi kóntra mi.
11 Deus intrega-m na un grupu di jóven pa es ataka-m,
I el intrega-m na mô di kes algen mau.
12 N staba trankuilu, má Deus distrui nha vida.
É sima si el pega-m na piskôs i el kebra-m.
El poi ses flexa ta ben kóntra mi.
14 El ta ben kóntra mi sima un trópa.
Mi é sima un paredi ki el ta kebra monti bês.
16 Nha róstu sta brumedju sô di txora,
Na vólta di nhas odju dja fika prétu.*
17 Nha mô nunka ka faze ninhun violénsia,
I nha orason é sinseru.
18 Ô téra, ka bu kubri nha sangi!
I pa nhas gritu ka atxa ninhun lugar di diskansu!
19 N tene tistimunha na séu ki pode prova ma mi é inosenti.
Kel ki sta na séu pode difende-m.
20 Nhas amigu ta faze trósa di mi
Timenti nha odju ta baza lágua* pa Deus.
21 Pa algen julga entri un ómi i Deus,
Sima ta kontise entri un ómi i se prósimu.
22 Pamodi kes anu ki sta falta-m é poku,
I N sta ta bai pa kel kaminhu ki ka ten vólta.