Jó
11 Zofar, kel namatita, responde:
2 “Tudu kes palavra li ta ben fika sen respósta?
Pâpia txeu ta da algen razon?*
3 Pur akazu, bu ta ben poi pesoas ta kala pamodi bu konbérsu sen pé sen kabésa?
Ningen ka ta ben koriji-u pamodi bus palavra di trósa?
4 Pamodi bu ta fla: ‘Kel ki N ta inxina é puru,
I Deus sabe ma mi é inosenti.’
5 Dja N kreba pa Deus papiaba
I pa el abriba se bóka pa responde-u!
6 Nton, el ta kontaba bo kes segredu di sabedoria,
Pamodi sabedoria di verdadi ta involve txeu kuza.
I bu ta intendeba ma Deus ta skese alguns di bus éru.
7 Bu ta pode diskubri kes kuza profundu di Deus?
Ô diskubri tudu sobri* kel Tudu-Poderozu?
8 El* é más altu di ki séu. Kuzê ki bu ta pode faze?
El é más fundu di ki Sipultura.* Kuzê ki bu ta pode sabe?
9 El é más largu di ki téra
I más grandi di ki mar.
10 Si el ben prende un algen i el leba-l pa tribuna-l,
Ken ki ta pode inpidi-l?
11 Pamodi el sabe si un ómi é falsu.
Óras ki el ta odja maldadi, el ka ta presta atenson?
12 Má un ómi sen juís sô ta ganha intendimentu
Óras ki un buru brabu pari un ómi.*
13 Bu devia priparaba bu korason
I stikaba bu mô pa Deus.
14 Si bu mô sta faze algun kuza mariadu, pô-l lonji di bo,
I ka bu dexa ninhun injustisa mora na bus ténda.
15 Nton, bu ta pode labanta kabésa sen ten vergónha.
Bu ta pode fika firmi, sen ten medu.
16 Pamodi bu ta ben skese di bu disgrasa.
Bu ta ben lenbra di el sima si é kes agu ki dja pasa.
17 Bu vida ta ben bira más klaru di ki meiu-dia.
Ti mésmu sukuru ta ben ser sima palmanhan.
18 Bu ta ben fika konfianti pamodi ten speransa,
Bu ta ben odja na bu vólta i bu ta ben deta na suguransa.
19 Bu ta ben deta i ningen ka ta pô-u ta xinti medu,
I txeu algen ta ben djobe bu ajuda.
20 Má odju di kes algen mau ta ben fadja.
Es ka ta ben atxa ninhun lugar pa es fuji,
I ses úniku speransa ta ben ser mórti.”*