Rekonhese ma otus ten bons kualidadi

Prubléma

Si nu ta pensa sô na nos kabésa nu pode faze diskriminason. Un algen ki ta pensa sô na se kabésa ta atxa ma el é más midjór ki otus algen. Kalker algen pode kai na kel armadilha li. Un ensiklopédiaa ta fla: “Kuazi tudu grupu [kultura] ta atxa ma ses manera di vive, kumida, manera di bisti, ábitu, krénsa, prinsípiu, i otus kuza é más midjór di ki di otus grupu.” Modi ki nu pode ivita kel manera di pensa mariadu li?

Prinsípiu di Bíblia

‘Nhos mostra umildadi i nhos trata otus sima algen más inportanti ki nhos’. — FILIPENSES 2:3.

Kuzê ki kel-li krê fla? Pa nu ka pensa dimás na nos kabésa nu meste prende ser umildi. Óras ki nos é umildi nu ta konsigi odja ma otus algen é más midjór ki nos na algun kuza. Ka ten ninhun grupu di algen ki é bon na tudu kuza i ki ten sô bons kualidadi.

Odja izénplu di Stefan. El kria na un país kumunista, má el konsigi vense diskriminason ki el tinha kóntra kes algen di kes país ki ka é kumunista. Stefan fla: “Atxa ma otus é más midjór ki bo ta djuda-u vense diskriminason. N ka sabe tudu kuza i N pode prende algun kuza ku kalker algen.”

Kuzê ki bu pode faze

Tenta ten un ideia ikilibradu sobri bu kabésa i seta ma bu ta fadja. Rekonhese ma otus algen pode ser más bon ki bo na faze alguns kuza. Ka bu atxa ma tudu algen di un grupu ten kes mésmu defetu.

Envês di pensa kuzas mariadu sobri un algen ki ta faze párti di un grupu, pergunta bu kabésa:

Rekonhese ma otus pode faze alguns kuza midjór ki bo

‘Kes kuza ki N ka gosta na kel algen es é mariadu ô diferenti?’
‘Kel algen li pode atxa fadjas na mi?’
‘Na kuzê ki kel algen li é más bon ki mi?’

Si bu responde kes pergunta li ku onestidadi bu ta konsigi vense kalker diskriminason ki bu ten i tanbê atxa kuzas ki bu gosta na kel algen.

Izénplu ki kontise: Nelson (Mérka)

“N pasa kuazi tudu nha juventudi na un lugar ki maioria di algen éra di mésmu rasa i mésmu kultura. Má kantu N tinha 19 anu N muda pa un sidadi grandi pa bai trabadja na un fábrika. N kumesa ta trabadja i ta mora pértu di algen di txeu rasa i kultura diferenti.

“Sima N ba ta konxe nhas koléga di trabadju i ta faze amizadi ku es, N odja ma kor di un algen, se língua i se nason ka ta mostra si kel algen é trabadjador, é di kunfiansa ô kuzê ki el ta xinti na korason.

“Dipôs N kaza ku un mudjer ki ka éra di mésmu rasa i país ki mi. N fika kontenti di konxe otus tipu di kumida i múzika ki N ka konxeba. Vida inxina-m ma nos tudu nu ten bons kualidadi i defetus. Pa N ser sinseru, N bira un algen midjór pamodi N fika ta gosta i ta imita bons kualidadi di kes algen ki é di rasa i kultura txeu diferenti ki di meu.”

a The Encyclopædia Britannica.