Modi ki Jeová ta responde nos orason

1-2. Kuzê ki nu pode pergunta sobri nos orason?

DJA bu kustuma pergunta si Jeová sta ta responde bus orason? É ka sô bo ki dja faze kel pergunta li. Txeu irmon ku irmans tanbê faze kel pergunta li, prinsipalmenti kantu es pasa pa prublémas. Tanbê si nu sta ta sufri, nu pode atxa más difísil intende modi ki Jeová sta ta responde nos orason.

² Nu ta ben odja pamodi ki nu pode ten sertéza ma Jeová ta responde orason di se sérvus. (1 João 5:15) Tanbê, nu ta ben odja respósta pa kes pergunta li: Pamodi ki alvês pode parse ma Jeová ka sta ta responde nos orason? Di ki maneras Jeová ta responde nos orason oji?

JEOVÁ PODE KA RESPONDE NOS ORASON DI MANERA KI NU TA SPÉRA

3. Pamodi ki Jeová krê pa nu faze orason pa el?

³ Skrituras ta da-nu sertéza ma Jeová ta ama-nu txeu i ma nu ten txeu valor pa el. (Ageu 2:7; 1 João 4:10) É pamodi kel-li, ki el ta konvida-nu pa nu pidi se ajuda na orason. (1 Ped. 5:6, 7) El krê djuda-nu lida ku kes prubléma ki nu ta pasa pa el i kontinua ku un amizadi fórti ku el.

4. Modi ki nu sabe ma Jeová ta responde orason di se sérvus? (Odja dizenhu.)

⁴ Txeu bês, nu ta lé na Bíblia ma Jeová responde orason di se sérvus. Bu ta konsigi pensa na un izénplu? Un izénplu é di Rei Davidi. El tevi txeu inimigu prigozu duránti se vida i txeu bês el djobe ajuda di Jeová na orason. Un bês, el inplora pa Jeová: ‘Ó Jeová, obi nha orason, obi nha súplika di ajuda. Responde-m di akordu ku bu lialdadi i ku bu justisa.’ (Sal. 143:1) Jeová responde kes orason di Davidi i el djuda-l na kes situason prigozu. (1 Sam. 19:10, 18-20; 2 Sam. 5:17-25) Davidi pode flaba ku kunfiansa: ‘Jeová sta pértu di tudu kes ki ta pâpia di el’. Nos tanbê nu pode ten sertéza di kel-li. — Sal. 145:18.

5. Orason di sérvus di Jeová na pasadu respondedu sénpri di manera ki es staba ta spéra? Da un izénplu. (Odja dizenhu.)

⁵ Jeová pode ka responde nos orason di manera ki nu ta spéra. Kel-li kontise ku apóstlu Paulu. El fla Jeová pa tra-l ‘un spinhu na karni’. Paulu faze orason três bês sobri kel prubléma difísil li. Jeová responde kes orason? Sin, má ka éra di manera ki Paulu staba ta spéra. Envês di Jeová kaba ku kel prubléma di Paulu, el da-l puder ki el mesteba pa kontinua ta sirbi-l di manera fiel. — 2 Cor. 12:7-10.

6. Alvês, pamodi ki ta parse ma Jeová ka ta responde nos orason?

⁶ Alvês tanbê nu pode resebe un respósta ki é diferenti di kel ki nu sta ta spéra. Nu pode ten sertéza ma Jeová sabe dretu modi ki el ta djuda-nu. El pode ti ‘faze mutu más txeu inda di ki tudu kel ki nu ta pidi ô ki nu ta imajina’. (Efé. 3:20) É pamodi kel-li, ki respósta pa nos orason pode ben na un óra ô di un manera ki nu ka sta ta spéra.

7. Pamodi ki talvês nu meste muda kuzê ki nu ta pidi na orason? Da un izénplu.

⁷ Talvês nu meste muda kuzê ki nu ta pidi na orason óras ki nu ta odja más klaru kal ki é vontadi di Jeová. Odja izénplu di Martin Poetzinger. Poku ténpu dipôs ki irmon Poetzinger kaza, el podu prézu na un kanpu di konsentrason nazista. Na komésu, el pidi Jeová pa dexa-l sai di kanpu di konsentrason pa el pode kuidaba di se mudjer i pa el baba pregason otu bês. Má dipôs di dôs simana, ka ta parseba ma Jeová ta traba el di la. Nton, el kumesa ta faze orason. El fla: “Jeová, favor mostra-m kuzê ki bu krê pa N faze.” Nton, el kumesa ta pensa sobri kuzê ki kes otu irmon na kanpu di konsentrason staba ta pasa. Txeu di es staba txeu preokupadu ku ses mudjer i ses fidjus. Dipôs, irmon Poetzinger ora: “Jeová, obrigadu pa nha novu diziginason. Djuda-m inkoraja i bira fé di nhas irmon más fórti.” El pasa 9 anu na kanpu di konsentrason ta faze kel-li!

8. Ki kuza inportanti nu debe lenbra óras ki nu ta faze orason?

⁸ Nu debe lenbra ma Jeová ta ben faze se vontadi na óra ki el disidi. Se vontadi ta inklui kaba ku tudu kes prubléma ki ta pô-nu ta sufri gósi, sima dizastris na naturéza, duénsas i mórti. Jeová ta ben kunpri se vontadi através di se Reinu. (Dan. 2:44; Apo. 21:3, 4) Má timenti kel dia ka txiga, Jeová sta ta dexa Satanás governa mundu.b (Juan 12:31; Apo. 12:9) Si Jeová kaba ku tudu prubléma na mundu gósi, pode parse ma Satanás sta ta governa mundu dretu. Nton, enbóra nu ten ki spéra pa Jeová kunpri alguns promésa, kel-li ka krê fla ma el ta dexa di djuda-nu. Nu ben odja alguns manera ki Jeová sta ta djuda-nu.

MANERAS KI JEOVÁ TA RESPONDE ORASON GÓSI

9. Modi ki Jeová pode djuda-nu óras ki nu meste toma disizons? Da un izénplu.

⁹ El ta da-nu sabedoria. Jeová promete ma el ta da-nu kel sabedoria ki nu meste pa nu toma bons disizon. Nu meste di sabedoria di Jeová óras ki nu ta toma disizons ki pode muda nos vida, pur izénplu óras ki nu ta disidi si nu ta kaza ô nau. (Tia. 1:5) Odja izénplu di un irman soltera, ki txoma Maria.c El staba kontenti na se trabadju di pionera fíksu, kantu el konxe un irmon. El fla: “Sima nu ba ta bira más amigu, nu xinti más atraídu pa kunpanheru. N sabia ma N tinha ki tomaba un disizon. N ora txeu sobri kel asuntu li. N mesteba di orientason di Jeová, má tanbê N sabia ma Jeová ka ta tomaba kel disizon pa mi.” El xinti ma Jeová responde se orasons ta pidi pa el da-l sabedoria. Modi? El faze piskiza na nos publikason ki djuda-l atxa respósta pa kes pergunta ki el tinha. Tanbê, el obi ku konsedjus ki ten sabedoria ki se mai da-l. Kes konsedju li djuda Maria analiza kuzê ki el staba ta xinti. Nton, el konsigi toma un disizon ku sabedoria.

10. Sima sta na Filipensis 4:13, kuzê ki Jeová ta faze pa djuda se sérvus? Da un izénplu.(Odja fotu.)

¹⁰ El ta da-nu puder pa aguenta firmi. Sima el faze ku apóstlu Paulu, Jeová ta da-nu forsa ki nu meste pa aguenta firmi óras ki nu ta pasa pa prublémas. (Lé Filipensis 4:13.) Odja modi ki Jeová djuda un irmon ki txoma Benjamin, aguenta situasons difísil. Timenti el staba jóven, Benjamin i se família mora na kanpus di rafujiadus na Áfrika. Benjamin fla: “N ora sénpri pa Jeová, ta pidi-l pa el da-m puder pa N faze kuzê ki ta dexaba el kontenti. Jeová responde nhas orason kantu el da-m pas déntu mi, koraji pa N kontinua ta prega i publikasons djuda-m kontinua ta ten un amizadi fórti ku el.” Tanbê el fla: “Lé spiriénsias di otus Tistimunha di Jeová i prende modi ki Jeová djuda-s aguenta firmi, pô-m más disididu na kontinua fiel.”

11-12. Modi ki Jeová pode skodje uza nos irmons ku irmans pa responde nos orason? (Odja fotu.)

¹¹ El ta uza nos irmons ku irmans. Na kel noti antis di Jizus móre, el faze orason. El inplora Jeová pa ka dexaba otus algen pensa ma el staba ta pâpia kóntra Deus i pa es ka kondenaba el pamodi kel-li. Envês di faze kel-li, Jeová djuda Jizus kantu el manda un anju la di séu pa da-l koraji. (Luk. 22:42, 43) Tanbê, Jeová pode djuda-nu através di un xamada ô vizita di un irmon ô di un irman ki pode inkoraja-nu. Nos tudu nu pode djobe oportunidadi pa fla ‘un palavra sábi’ pa nos irmon. — Pro. 12:25.

¹² Odja spiriénsia di un irman ki txoma Mirian. Alguns simana dipôs ki se maridu móre, Mirian staba el sô na kaza, ta xinti sen speransa i tristi. El staba ta txora sen para i el meste papiaba ku algen. El fla: “N ka tevi forsa pa N txoma ningen pa tilifóni. Nton, N faze orason pa Jeová. Timenti N staba ta txora i ta faze orason, nha tilifóni toka. Éra un ansion, un amigu ki N krê txeu.” Kel ansion i se mudjer da Mirian konsolu. Mirian staba konvensidu ma Jeová poi kel irmon ta txoma-l.

13. Da un izénplu di modi ki Jeová pode uza kes algen ki ka ta adora-l pa responde nos orason.

¹³ El pode uza algen ki ka ta adora-l. (Pro. 21:1) Alvês, Jeová ta responde orason di se povu, óras ki el ta poi kes algen ki ka ta adora-l ta djuda-s. Pur izénplu, el poi rei Artaxerxis ta dexa Neemias volta pa Jiruzalen, asi pa el pode djudaba konpo kel sidadi. (Nee. 2:3-6) Tanbê, gósi Jeová pode poi ti kes algen ki ka ta adora-l pa djuda-nu óras ki nu meste.

14. Kuzê ki bu gosta na spiriénsia di Sónia? (Odja fotu.)

¹⁴ Un irman ki txoma Sónia, xinti ma Jeová djuda-l através di se dotor. Se fidju ten txeu prubléma di saúdi mental. El tevi un asidenti gravi i Sónia ku se maridu larga ses trabadju pa es pode kuidaba di el. Pamodi kel-li, es tinha falta di dinheru. Sónia fla ma el ta xintiba ma el ka ta pode aguentaba más nada. El abri se korason pa Jeová ta pidi ajuda. Kel dotor disidi atxa un manera di djuda Sónia ku se família. Pamodi kel-li, es resebe ajuda di govérnu i un lugar baratu pa mora. Dipôs, Sónia fla: “Nu odja modi ki Jeová djuda-nu. El é ‘Kel ki ta obi orason’ própi.” — Sal. 65:2.

FÉ TA DJUDA-NU ATXA I SETA RESPÓSTA DI JEOVÁ

15. Kuzê ki djuda un irman da kónta ma Jeová staba ta responde se orason?

¹⁵ Normalmenti, nos orason ka ta respondedu di un manera ki ta dexa-nu dimiradu. Má respóstas ki nu ta resebe é kel ki nu meste pa nu kontinua lial pa nos Pai na séu. Pur isu, nu debe fika sienti na modi ki Jeová ta responde nos orason. Un irman ki txoma Ivoni, xinti ma Jeová ka staba ta responde se orason. Má dipôs, el kumesa ta skrebe kuzê ki el ta pidiba Jeová. Dipôs di algun ténpu, el djobe pa se kadérnu i el da kónta ma Jeová responde kuazi tudu se orason, sikrê alguns ki dja el skeseba di el. Di vês en kuandu, nu meste pensa na modi ki Jeová sta ta responde nos orason. — Sal. 66:19, 20.

16. Modi ki nu pode mostra fé na nos orason? (Hebreus 11:6)

¹⁶ Nu ta mostra fé ka sô óras ki nu ta faze orason pa Jeová, má tanbê óras ki nu ta seta respósta di nos orason, ka ta inporta é di ki manera. (Lé Hebreus 11:6.) Odja izénplu di Migel ku se mudjer, Kristina. Es tinha méta di sirbi na Betel. Migel fla: “Nu prenxe pitison txeu bês i nu faze orason pa Jeová txeu bês sobri nos méta, má nunka nu ka konvidadu.” Migel ku Kristina kontinua ta kunfia ma Jeová sabia kal ki éra midjór manera ki el ta uzaba es na se sirvisu. Es kontinua ta faze tudu kel ki es ta konsigiba. Es éra pioneru fíksu, es ba sirbiba na undi ki tinha más nisisidadi i es apoia prujétus di konstruson di organizason. Gósi, es ta vizita kongregasons. Migel fla: “Nen sénpri Jeová ka responde nos orason di manera ki nu staba ta spéra, má el responde-s i mutu más midjór di ki kel ki nu staba ta imajina.”

17-18. Sima sta na Salmo 86:6, 7, di kuzê ki nu pode ten sertéza?

¹⁷ Lé Salmo 86:6, 7. Salmista Davidi tinha sertéza ma Jeová ta obiba i ta respondeba se orason. Bu pode ten kel mésmu kunfiansa li. Kes izénplu ki nu odja na kel studu li, ta da-nu sertéza ma Jeová pode da-nu sabedoria i forsa ki nu meste pa nu aguenta firmi. El pode uza nos irmons ku irmans ô ti kes algen ki inda ka ta adora-l, pa djuda-nu di algun manera.

¹⁸ Enbóra nen sénpri Jeová pode ka responde nos orason di manera ki nu ta spéra, nu sabe ma el ta responde. El ta da-nu kel ki nu meste i na óra ki nu meste-l. Pur isu, kontinua ta faze orason ku fé i ku kunfiansa ma Jeová ta kuida di bo gósi i ma el ta ben ‘faze vontadi di tudu kuza bibu’ na mundu novu ki sta pa ben. — Sal. 145:16.