Seta ma Jeová dja purdua-u

1-2. Modi ki nu ta xinti óras ki Jeová ta púrdua nos pekadu? (Odja imajen.)

REI Davidi sabia modi ki é xinti kulpadu pamodi kes pekadu gravi ki el fazeba. (Sal. 40:12; 51:3; kabesalhu) Má el rapende di korason i Jeová purdua-l. (2 Sam. 12:13) Pur isu, Davidi tanbê sabia kuzê ki é xinti aliviadu pamodi Jeová purdua-l. — Sal. 32:1.

² Sima Davidi, nu pode xinti aliviadu óras ki Jeová mostra-nu mizerikórdia i el purdua-nu. Nu ta xinti konsoladu di sabe ma Jeová sta prontu pa púrdua nos pekadu, mésmu si kes pekadu é gravi. El ta faze kel-li si nu rapende di verdadi, nu konfesa nos pekadu i nu faze nos midjór pa ka ripiti kes éru! (Pro. 28:13; Atus 26:20; 1 Juan 1:9) I nu ta fika kontenti di sabe ma el ta púrdua tudu nos pekadu ki é sima si nunka nu ka faze-s! — Eze. 33:16.

3-4. Modi ki un irman xinti dipôs ki el batiza, i kuzê ki nu ta ben odja na kel studu li?

³ Má alvês, alguns algen ta atxa difísil seta ma Jeová dja purdua-s. Odja izénplu di Jennifer, ki kria na verdadi. Kantu el éra jóven, el kumesa ta faze kuzas mariadu i ta leba un vida finjidu. Uns anu dipôs, el volta pa Jeová i el batiza. El fla: “Antis N ta fazeba konportamentu seksual mariadu, N ta bebeba, N ta xatiaba faxi i ganha dinheru éra kel kuza más inportanti pa mi. N sabia ma dipôs ki N inploraba perdon di Jeová i N rapendeba, Jeová ta purduaba mi pamodi sakrifisiu di resgati di Jizus. Má N ka staba ta konsigi konvense nha korason ma Jeová dja purduaba mi.”

⁴ Alvês bu ta atxa difísil konvense bu korason ma Jeová dja púrdua kes pekadu ki bu faze na pasadu? Jeová krê pa nu kunfia na se mizerikórdia, sima Davidi ta kunfiaba. Na kel studu li, nu sta ben odja pamodi ki nu meste seta ma Jeová ta purdua-nu i kuzê ki pode djuda-nu faze kel-li.

PAMODI KI NU MESTE SETA MA JEOVÁ DJA PURDUA-NU?

5. Na kuzê ki Satanás krê pa nu kridita? Da un izénplu.

⁵ Óras ki nu seta ma Jeová dja purdua-nu, nu ka ta kai na un di kes armadilha di Satanás. Lenbra ma Satanás ta faze di tudu pa pô-nu para di sirbi Jeová. Pa konsigi kel-li, Satanás ta tenta pô-nu ta kridita ma Jeová nunka ka ta pode púrdua nos pekadu. Odja izénplu di un ómi na Korintu ki tradu di kongregason pamodi el faze konportamentu seksual mariadu. (1 Kor. 5:1, 5, 13) Dipôs, kantu el rapende, Satanás kreba pa kes algen na kongregason ka purduaba el i pa es ka resebeba el na kongregason otu bês. Tanbê, Satanás kreba pa kel ómi ki dja rapendeba xinti ma Jeová ka purduaba el, asi ‘pa tristéza dimás kababa ku el’ i pô-l ta para di sirbi Jeová. É kel-li própi ki Satanás krê faze ku nos oji. Má “nu konxe se intenson.” — 2 Kor. 2:5-11.

6. Kuzê ki pode djuda-nu xinti aliviadu di kes pekadu ki nu faze na pasadu?

⁶ Óras ki nu ta seta ma Jeová dja purdua-nu, nu ta xinti aliviadu. Óras ki nu peka, é normal nu xinti kulpadu. (Sal. 51:17) Kel-li é un kuza bon. Nos konsénsia pode pô-nu ta muda i faze kuzas dretu. (2 Kor. 7:10, 11) Má si nu kontinua ta xinti kulpadu dipôs ki dja nu rapende di un pekadu, nu pode xinti dizanimadu i nu pode para di sirbi Jeová. Óras ki nu ta seta ma Jeová dja purdua-nu, nu ka ta xinti kulpadu más. Asi, nu ta pode sirbi Jeová di manera ki el ta krê, ki é ku un konsénsia linpu i ku txeu alegria. (Kol. 1:10, 11; 2 Tim. 1:3) Modi ki nu pode konvense nos korason ma Jeová dja purdua-nu?

KUZÊ KI PODE DJUDA-NU SETA MA JEOVÁ DJA PURDUA-NU?

7-8. Modi ki Jeová fla Muizés ma El é, i kel-li ta da-nu serteza di kuzê? (Ézudu 34:6, 7)

⁷ Pensa na modi ki Jeová fla ma el é. Pur izénplu, repara kuzê ki Jeová fla Muizés na monti Sinai.a (Lé Ézudu 34:6, 7.) Enbóra Jeová ten txeu kualidadi bunitu, el skodje fla Muizés ma el é un “Deus di mizerikórdia i konpaxon”. Un Deus sima kel-li ka ta purduaba un algen ki ta sirbi-l i ki rapende di ses pekadu? É klaru ki el ta purduaba! Jeová nunka ka ta ajiba di manera kruel si.

⁸ Nu pode ten serteza ma óras ki Jeová fla ma el é mizerikordiozu, el sta pâpia verdadi. Nunka el ka ta konta mintira. (Sal. 31:5) Nton nu pode kridita na kuzê ki el fla. Si bu ta atxa difísil dexa di xinti kulpadu pamodi kes pekadu ki bu faze na pasadu, pensa na kel pergunta li: ‘N ta kridita mê ma Jeová é un Deus di mizerikórdia i konpaxon i ma el pode púrdua kalker algen ki rapende? Nton, N ka devia setaba ma dja el purdua-m?’

9. Kuzê ki Salmo 32:5 ta inxina-nu sobri modi ki Jeová ta purdua-nu?

⁹ Pensa na kuzê ki Jeová ta inxina-nu na Bíblia sobri modi ki el ta purdua-nu. Pur izénplu, odja kuzê ki Davidi, ki é un skritor di Bíblia, fla sobri modi ki Jeová ta purdua-nu. (Lé Salmo 32:5.) Davidi fla: ‘Bu purdua-m nha éru i nhas pekadu.’ Kel palavra na ebraiku ki traduzidu pa “perdon” pode siginifika “labanta”, “tra” ô “karega”. Kantu Jeová púrdua Davidi, é sima si el labanta ses pekadu i el karega-s pa lonji di el. Di kel manera li, Davidi xinti aliviadu di kel kulpa ki el staba ta karega. (Sal. 32:2-4) Nos tanbê nu pode xinti aliviadu. Óras ki dja nu rapende di verdadi di nos pekadu, nu ka meste kontinua más ta karega pézu di kulpa di kes pekadu ki Jeová dja tra-nu.

10-11. Salmo 86:5 ta fla ma Jeová ‘sta sénpri prontu pa púrdua’. Kuzê ki kel-li ta inxina-nu sobri el?

¹⁰ Lé Salmo 86:5. Na kel Salmo li, Davidi ta fla ma Jeová ‘sta sénpri prontu pa púrdua.’ Kel-li krê fla ma Jeová ka ta xatia faxi óras ki nu peka i sénpri el krê púrdua kes algen ki rapende. Pamodi ki nu pode fla kel-li? Kel otu párti di kel versiklu li ta splika: ‘Amor lial ki bu ten pa tudu kes ki ta invoka-u, é grandi.’ Sima nu prende na kel studu ki pasa, Jeová promete mostra amor lial pa kes algen ki ta ama-l i nunka el ka ta bandona-s. Pur isu, si es peka i es rapende, Jeová ta kontinua ta mostra-s amor lial i el ‘ta púrdua-s txeu.’ (Isa. 55:7) Si bu ta atxa difísil kridita ma Deus dja purdua-u, bu pode pensa na kes pergunta li: ‘N ta kridita ma Jeová sta sénpri prontu pa púrdua tudu kes algen ki rapende di ses pekadu i ki faze orason ta pidi se mizerikórdia? Nton, N ka debe kriditaba ma dja el purdua-m kantu N inplora ta pidi pa el purdua-m?’

¹¹ Nu pode fika konsoladu di sabe ma Jeová ta intende dretu ma nos é pekador. (Sal. 139:1, 2) Nu ta odja kel-li klaru na un otu Salmo ki Davidi skrebe. Kel Salmo li tanbê pode djuda-nu seta ma Jeová ta purdua-nu.

KA BU SKESE DI KUZÊ KI JEOVÁ TA LENBRA

12-13. Di akordu ku Salmo 103:14, kuzê ki Jeová ta lenbra sobri nos, i kuzê ki kel-li ta pô-l ta faze?

¹² Lé Salmo 103:14. Davidi splika un di kes razon ki ta poi Jeová ta sta sénpri prontu pa púrdua ses sérvu ki rapende. El fla ma Jeová ta ‘lenbra ma nos é di téra.’ Kel-li krê fla ma sénpri el ta lenbra ma nos é pekador. Pa intende kel-li midjór, nu ben pâpia más sobri kuzê ki kes palavra di Davidi krê fla.

¹³ Davidi fla ma Jeová ‘sabe dretu di kuzê ki nu fazedu’. Jeová faze Adon “di pó di téra”. Nton el sabe modi ki nu fazedu i kuzê ki nu meste. Pur izénplu, el sabe ma nu meste kume, durmi i respira. Ti mésmu pesoas perfeitu meste faze kes kuza li. (Jén. 2:7) Má pamodi Adon ku Eva peka, nu bira pó di téra di otu manera. Dja ki nos é ses fidju, nu erda ses pekadu, i pur isu nu ten tendénsia di faze kuzas mariadu. Davidi fla ma Jeová ka sô sabe ma nos é pekador, má tanbê ma el ta ‘lenbra’ di kel-li. Kel palavra na ebraiku ki traduzidu pa ‘lenbra’ ka krê fla sô lenbra di un kuza, má tanbê faze un kuza bon dipôs di lenbra. Nu pode rezumi kes palavra di Davidi di kel manera li: Jeová ta intende ma nu ta fadja txeu bês. Óras ki nu ta faze kel-li, el ta mostra-nu mizerikórdia i el ta purdua-nu si nu rapende di korason. — Sal. 78:38, 39.

14. (a) Ti ki pontu Davidi fla ma Jeová ta purdua-nu? (Salmo 103:12) (b) Kuzê ki nu pode prende ku manera ki Jeová púrdua Davidi? (Odja kuadru “Jeová ta púrdua i el ta skese”.)

¹⁴ Ti ki pontu Jeová ta purdua-nu? (Lé Salmo 103:12.) Davidi fla ma óras ki Jeová ta purdua-nu, El ta poi nos pekadu lonji di nos, ‘sima undi sol ta sai [lésti] sta lonji di undi ki sol ta kanba [oésti].” Lésti é kel lugar más lonji di oésti. Kes dôs pontu li nunka ka ta inkontra. Kuzê ki kel-li ta inxina-nu sobri kes pekadu ki Jeová dja púrdua? Un livru ki komenta kel versiklu li splika ma óras ki Deus ta tra-nu nos pekadu, nu pode ten serteza ma ka ta fika ninhun txeru, marka ô kalker lenbransa di kel pekadu. Pensa na kel-li: sô un txeru pode pô-nu ta lenbra di un kuza ki kontise. Má óras ki Jeová purdua-nu, é sima si ka ta fika ninhun txeru ki pode pô-l ta lenbra di kel pekadu i pô-l ta faze algun kuza kóntra nos. — Eze. 18:21, 22; Atus 3:19.

15. Kuzê ki nu pode faze si nu kontinua ta xinti kulpadu pamodi kes pekadu ki nu faze na pasadu?

¹⁵ Modi ki kes palavra di Davidi ki sta na Salmo 103 pode djuda-nu seta ma Jeová dja purdua-nu? Si inda nu sta ta xinti kulpadu pamodi kes pekadu ki nu faze na pasadu, nu pode pensa na kes pergunta li: ‘N sta ta skese ma Jeová ta lenbra ma ami é pekador i el ta púrdua un algen ki rapende móda mi? Nton, N sta ta skese di kuzê ki Jeová ta lenbra? N sta ta lenbra di kes pekadu ki Jeová dja purdua-m i ki nunka más el ka ta uza-s kóntra mi? Nton, N sta ta lenbra di kuzê ki Jeová skodje skese?’ Jeová ka ta konsentra na kes pekadu ki nu faze na pasadu. Nen nos nu ka debe faze kel-li. (Sal. 130:3) Óras ki nu ten serteza ma Jeová dja purdua-nu, nu ka ta xinti kulpadu más pamodi kes éru ki nu faze na pasadu i nu ta kontinua ta sirbi-l ku alegria.

16. Da un izénplu ki ta mostra modi ki é prigozu konsentra na kes éru ki nu faze na pasadu. (Odja imajen.)

¹⁶ Nu pode fla ma kontinua ta xinti kulpadu pamodi kes éru ki nu faze na pasadu é sima tenta konduzi un karu sénpri ta djobe na retrovizor. É bon odja na retrovizor di vês en kuandu. Si bu faze kel-li, bu ta ivita prigus ki pode sta bu atras. Má pa bu konduzi di manera suguru, bu meste kontinua ta djobe pa frenti. Di mésmu manera, alvês é bon nu djobe pa kes éru ki nu faze na pasadu. Nu pode prende ku es i fika más disididu na ka ripiti-s. Má si nu konsentra na kes éru ki nu faze na pasadu, nu pode perde alegria i nu ka ta konsigi sirbi Jeová di midjór manera. Envês di kel-li, nu debe djobe pa frenti. Nu sta na kel strada ki ta leba pa vida na kel mundu novu ki Deus promete-nu, undi ki nu ‘ka ta ben lenbra más’ di kes kuza mariadu ki nu faze. — Isa. 65:17; Pro. 4:25.

KONTINUA TA KONVENSE BU KORASON

17. Pamodi ki nu meste kontinua ta konvense nos korason ma Jeová ta ama-nu i ma el ta purdua-nu?

¹⁷ Nu meste kontinua ta konvense nos korason ma Jeová ta ama-nu i ma el sta sénpri prontu pa purdua-nu. (1 Juan 3:19, nóta di rodapé.) Pamodi? Pamodi Satanás nunka ka ta dizisti di konvense-nu ma nu ka ten valor i ma Jeová nunka ka ta purdua-nu. Inda se obijetivu é pô-nu ta para di sirbi Jeová. Nu pode spera ma Satanás ta ben sforsa más inda pa faze kel-li pamodi el sabe ma sta ta falta-l poku ténpu. (Apo. 12:12) Nu ka pode dexa-l ganha!

18. Kuzê ki bu pode faze pa konvense bu korason ma Jeová ta ama-u i ma el ta purdua-u?

¹⁸ Pa bu pode ten más serteza ma Jeová ta ama-u, faze kes kuza ki nu pâpia di el na kel studu ki pasa. Pa bu konvense bu korason ma Jeová ta purdua-u, faze kes kuza ki nu prende na kel studu li. Pur izénplu, pensa na kuzê ki Jeová fla sobri El. Pensa na kuzê ki kes skritor di Bíblia fla sobri perdon di Jeová. Ka bu skese ma Jeová ta lenbra ma bo é inperfeitu i el ta mostra-u mizerikórdia. I lenbra ma óras ki el ta purdua-u, el ta disidi skese kel pekadu pa tudu ténpu. Asi, bu ta fika ku kel mésmu kunfiansa ki Davidi tinha na mizerikórdia di Jeová i bu ta fla: “Obrigadu, Jeová, pamodi ‘bu purdua-m nha éru i nhas pekadu’!” — Sal. 32:5.