Ajuda pa kes mudjer ki ta maltratadu
“MILHONS di mudjer i mininas na mundu interu dja sufri abuzu. Abo é un di es? Odja pamodi ki Deus ta inporta ku bu suguransa i kuzê ki el ta ben faze pa kaba ku abuzu kóntra mudjer.”
É si ki kel artigu “Kuzê ki Bíblia ta fla sobri suguransa di mudjer” ta flaba na komésu. Na fin di kel artigu ten un link ki nu pode diskarega un PDF di el i nu pode inprimi-l i dipôs dobra-l pa el fika un folhetu di kuatu pájina. Un irman di Mérka ki txoma Stacy fla: “N inprimi alguns kópia di el i djuntu ku otu irman, nu leba-s pa un lugar undi ki es ta poi kes mudjer ki sta ta kóre prigu ki ta fika na tiritóriu di nos kongregason.”
Un di kes mudjer ki ta trabadja la pergunta si el pode tinha otus kópia pa distribui pa kes algen ki ta vive na kel lugar. Pamodi kel-li, kes irman intrega más di 40 folhetu di kel-la djuntu ku 30 karton di kontatu di jw.org. Na otu dia ki kes irman bai, kel responsável di kel lugar krê pa es mostraba kes mudjer modi ki ta fazedu un studu di Bíblia.
Stacy ku más dôs otu irman tanbê tevi bon rezultadu na otu lugar ki ta podu kes mudjer ki ta kóre prigu i es dexa sinku kópia di kel folhetu i dipôs es pididu más. Un di kes mudjer ki ta trabadja la fla: “Es folhetu ta ben djuda kes mudjer li.” Tanbê el fla: “Nu meste di el.” Na un otu vizita alguns di kes mudjer krê sabeba modi ki ta fazedu un studu di Bíblia i dôs di es fla ma es ta gostaba di sisti runion na kel otu simana.
Stacy fla: “Nu fika dimiradu ku modi ki pesoas fika kontenti di lé kel artigu bunitu li. Óras ki nu inprimi-l i dobra-l é un bon manera di nu pâpia sobri mensajen di Reinu ku kes mudjer ki sta ta maltratadu. Foi sábi odja modi ki kes algen fika kontenti di resebe kel informason. Nu sta ku gana di odja modi ki Jeová ta ben djuda-nu timenti nu ta kontinua ta pâpia ku kes mudjer li sobri notísia sábi.”