Nhos mante unidu através di spritu santu

APÓSTLU Paulu fla kes kriston na Éfezu: Nhos “aguenta kunpanheru ku amor. Nhos unidu através di spritu santu. Nhos sforsa di korason pa nhos mante unidu i nhos sta na pas ku kunpanheru.” — Efé. 4:2, 3.

Kel union ki nu ten, é através “di spritu santu.” Kel-li krê fla ma é pamodi forsa di Deus ki nu ta konsigi sta unidu. Má sima Paulu splika, faze kel-li ta iziji sforsu. Sforsu di kenha? Na verdadi, kada sérvu di Jeová debe faze se párti pa nu ‘mante unidu através di spritu santu.’

Pensa na kel izénplu li: Imajina ma un algen ta da-u un karu novu. Kenha ki ta ser responsável pa kuida di kel karu? É klaru ki é bo. Bu ka pode kulpa kel algen ki da-u kel karu si el straga pamodi bu ka kuida di el dretu.

Di mésmu manera, enbóra nos union é un prezenti ki Deus da-nu, kada un di nos ten responsabilidadi di proteje-l. Si nu ka ta da dretu ku un irmon ô un irman, nu meste faze kel pergunta li: ‘N sta ta faze nha párti pa kongregason kontinua unidu?’

“NHOS SFORSA DI KORASON” PA NHOS MANTE UNIDU

Sima Paulu mostra, alvês pode ka ser fásil mante nos union. Kel-li pode ser más difísil inda, prinsipalmenti si un irmon ô irman ofende-nu. Má mante union krê fla ma sénpri nu ten ki ba pâpia ku kel algen ki ofende-nu i fla-l di kel prubléma? Nau. Pensa na kel pergunta li: ‘Si N faze kel-li, prubléma ta ba midjora ô piora?’ Alvês é midjór púrdua kel algen i dexa kel asuntu pa la. — Pro. 19:11; Mar. 11:25.

Imajens: Un irmon sta ta dexa un ofénsa pasa. 1. Un irmon sta ta grita ku el. 2. El sta ta pensa na kuzê ki kel otu irmon faze. 3. El sta ta lé Bíblia i ta midita na el. — Faze kel pergunta li: ‘Si N ba pâpia ku kel irmon sobri kel prubléma, situason ta ba midjora ô ta ba piora?’

Sima apóstlu Paulu skrebe, nu debe kontinua ta “aguenta kunpanheru ku amor.” (Efé. 4:2) Un livru fla ma kel frazi li pode krê fla “seta-s sima es é.” Kel-li krê fla ma nu debe seta ma nos irmons ku irmans ta fadja i es é inperfeitu sima nos. É klaru ki nu sta ta sforsa pa nu bisti di “kel manera di ser novu”. (Efé. 4:23, 24) Má ninhun di nos nu ka ta konsigi faze kel-li di manera perfeitu. (Rom. 3:23) Si nu seta kel-li, é más fásil nu aguenta kunpanheru, nu púrdua i nu ‘mante unidu através di spritu santu’.

Óras ki nu xinti ofendidu i nu rezolve kel prubléma, mésmu ki é sô na nos korason, nu ta mante “unidu i na pas ku kunpanheru.” Kel palavra gregu ki traduzidu pa “unidu” na Efézius 4:3, é traduzidu pa “ligamentu” na Kolosensis 2:19. Ligamentu é tiras fórti di tisidu ki ta uni un osu na kel otu. Di mésmu manera, sta na pas i mostra amor pa nos irmons ta djuda-nu kontinua unidu, sikrê alvês es ta faze kuzas ki nu ka gosta.

Óras ki un irmon ta ofende-u, ta xatia-u ô ta irita-u, tenta intende-l i mostra-l konpaxon envês di kritika-l. (Kol. 3:12) Dja ki nos tudu é inperfeitu, pode ser ki bo tanbê, dja bu faze kuzas ki ofende otus algen. Lenbra di kel-li ta djuda-u sforsa pa faze bu párti ‘pa mante unidu através di spritu santu’.