Inxina bus fidju agradese

Piskizas ta mostra ma kes algen ki ta agradese é más filís i es ten más bon saúdi, es ta lida midjór ku prublémas i es ten amizadi más fórti. Un piskizador ki txoma Robert Emmons fla ma agradese ta “proteje un algen di kes dizejus mariadu sima invéja, rankor, ganánsia i mágua.”a

Modi ki mininus ta ten bon rezultadu óras ki es ta agradese? Na un piskiza ki fazedu duránti kuatu anu ku 700 jóven, kes ki gosta di agradese tinha ménus xansi di kopia na testi, uza dróga, bebida alkólika ô ten un konportamentu mariadu.

• Xinti ma bu ten direitu di un kuza ka ta dexa-u agradese. Txeu mininu ta atxa ma es ten direitu di kes kuza bon ki ta kontise ku es. Es ka ta konsigi agradese óras ki es ta odja kes kuza bon li sima un pagamentu envês di un prezenti.

  Oji kel konportamentu li é normal. Un mai ki txoma Katarina fla: “Kel mundu li ta inxina pesoas ma es debe ten tudu kel ki es ta krê. Mundu ta mostra-nu fotus di txeu kuza, pur izénplu na revistas, na tilivizon i na internet. I nton, es ta fla ma nu ‘merese’ kes kuza li i ma nu debe ser kes primeru na tene-s.”

• Mininus pode prende agradese désdi pikinoti. Un mai ki txoma Kaye fla: “Mininus ta prende faxi. Inxina-s bons ábitu timenti es é pikinoti é sima uza pó pa djuda planta kria dretu.”

Modi ki nu pode inxina-s agradese

• Inxina-s kuzê ki es ta fla. Ti mininus pikinoti pode prende fla obrigadu óras ki algen ta da-s un prezenti ô ta trata-s dretu. Sima es ta ba ta kria i ta bira más maduru, poku-poku es ta prende da más valor pa kel ki pesoas ta faze pa es.

  

  Prinsípiu di Bíblia: ‘Nhos mostra ma nhos é gratu.’ — Colossenses 3:15.

  “Nos nétu di três anu sénpri ta fla “obrigadu” i sénpri ki el ta pidi algun kuza el ta fla “pur favor”. El prende kel-li ku se pai i ku se mai. Odja ses izénplu sta ta inxina-l ma é inportanti agradese.” — Jeffrey.

• Inxina-s kuzê ki es ta faze. Pamodi ki bu ka ta pidi bu fidju pa skrebe un bilheti pa agradese na prósimu bês ki algen da-l un prezenti? Tanbê, si bu da bu fidju alguns trabadju pa el faze, ta djuda-l ntende ma iziji txeu sforsu pa un kaza ser un bon lugar pa família.

  

  Prinsípiu di Bíblia: ‘É más sábi da di ki toma.’ — Atos 20:35.

  “Nos dôs fidju, ta djuda na skodje kes kuza pa faze kumida, na kuzinha i na faze otus trabadju na kaza. Kel-li ta djuda-s da más valor pa sforsu ki nu faze kómu pai ku mai. Asi é más faxi es agradese pa kes kuza ki es ta resebe.” — Beverly.

• Inxina-s atitudi ki es debe ten. Pensa ma agradese é sima un planta ki ta kria na un bon txon. Kes algen ki é umildi ta rekonhese ma es meste di ajuda pa es ten susésu na kalker kuza ki es ta faze i kel-li ta pô-s ta agradese otus algen pa ajuda ki es ta resebe.

  

  Prinsípiu di Bíblia: ‘Má nhos mostra umildadi i nhos trata otus sima algen más inportanti ki nhos, i pa kel-li ka nhos djobe sô nhos própi interesi, má tanbê interesi di otus.’ — Filipenses 2:3, 4.

  “Alvês, óras ki nu sta ta janta nu ta juga kel jogu li: kada algen ta pâpia di un kuza ki el é gratu pa el, asi ta poi tudu algen ta pensa di un manera puzitivu i agradese envês di pensa di un manera negativu i pensa sô na nos kabésa.” — Tamara.

Sujiston: Da izénplu. Mininus ta prende más faxi agradese óras ki es obi-u ta agradese otus algen i aes tanbê.