Namoru — Párti 3: Nu debe tirmina namoru?

Dja bu ten algun ténpu ta namora, má dja bu kumesa ta ten dúvidas. Bu debe kontinua ta namora ô bu debe tirmina kel namoru? Kel artigu li priparadu pa djuda-u toma un disizon.

Na kel artigu li

• Modi ki bu ta lida ku dúvidas

• Modi ki bu pode toma disizon

• Si bu disidi tirmina namoru

Modi ki bu ta lida ku dúvidas

Dipôs ki un rapás ku un minina namora pa algun ténpu, es pode da kónta ma es é txeu diferenti di kunpanheru. Pur izénplu:

• Un gosta di bai pa praia di mar, i kel otu gosta di faze kaminhada.

• Un é más abértu i gosta di sta djuntu ku otus algen, i kel otu é más kétu i gosta di sta na se lugar.

• Un é sénpri onéstu, i kel otu txeu bês ka ta pâpia verdadi.

Repara ma kada un di kes situason li é diferenti. Kel primeru situason ta involve gostu diferenti, kel sugundu ta involve manera di ser diferenti i kel tirseru ta involve prinsípius diferenti.

Pensa na kel-li: Si nhos kaza, kal ki di kes três kuza li bu ta atxaba más difísil di lida ku el? I kal di es ki nhos tudu dôs pode abri mô di el pa agrada kunpanheru?

Un maridu ku se mudjer pode ten gostu ô manera di ser diferenti di kunpanheru, má simé es pode ten un kazamentu filís. Afinal, da dretu ku kunpanheru ka krê fla ma es é igual. Na alguns situason, maridu ku mudjer pode prende mostra interesi na kes kuza ki kel maridu ô kel mudjer gosta i ti mésmu tra pruvetu di kel manera di ser di kunpanheru.a

Má, é txeu inportanti pa bu kaza ku un algen ki ten mésmu prinsípius ki bo. Kel-li krê fla ten mésmu relijion ki bo, i pensa di mésmu manera sobri kuzê ki é dretu i mariadu. Si bu odja ma kel algen ka ten kes kuza li, kel-li pode ser un sinal klaru ma bu debe tirmina kel namoru.

Pur izénplu, odja kuzê ki ta kontise si kes dôs algen ka ten mésmu relijion. Un livrub ta fla: “Piskizas ta mostra ma un kazal ki ka ten mésmu relijion ten más xansi di divôrsia.”

Konsedju di Bíblia: “Ka nhos djunta ku kes ki é ka krenti.” — 2 Koríntius 6:14.

Modi ki bu pode toma disizon

Bíblia ta fla ma kes ki kaza “ta ten prubléma na ses vida.” (1 Koríntius 7:28) Pur isu, ka bu fika dimiradu si gósi dja bu sta ta ten algun prubléma na namoru.

Ka konkorda na kes kuza pikinoti ka krê fla ma nhos namoru ten ki tirmina. Má, nhos ta konsigi rezolve prubléma na pas ku kunpanheru? Nhos ta ben meste prende faze kel-li si nhos kaza.

Konsedju di Bíblia: “Nhos mostra bondadi pa kunpanheru, nhos mostra konpaxon di korason i nhos sta sénpri prontu pa púrdua kunpanheru”. — Efézius 4:32.

Má, si nhos ka ta konkorda na kes kuza inportanti ô nhos ta sta sénpri na prubléma ku kunpanheru, pode ser ki nhos ka ta da ku kunpanheru. Si kel-li é nhos situason, é midjór nhos sabe di kel-li gósi di ki dipôs ki nhos kaza!

Konkluzon: Si bu sta ku dúvida sobri kel algen ki bu sta ta namora ku el ô talvês bu ta atxa ma bu ka sta prontu pa kaza, ka bu iginora kes dúvida!

Konsedju di Bíblia: ‘Algen prudenti ta odja prigu i el ta sukundi, má kes ki ka ten spiriénsia ta kontinua ta bai i es ta kai na prublémas.’ — Provérbios 22:3.

Si bu disidi tirmina namoru

Tirmina un namoru pode traze txeu dór. Má, si un di nhos, ô si nhos tudu dôs kontinua ta ten dúvidas sobri nhos namoru, pode ser midjór nhos tirmina nhos namoru.

Modi ki bu pode faze kel-li? Ka bu tirmina bu namoru pa mensajen di testu ô email si bu ka ten un bon razon pa faze si. Envês di kel-li, skodje un óra ô un lugar ki ta fika dretu pa nhos pâpia ku kunpanheru sobri kel asuntu inportanti li.

Konsedju di Bíblia: ‘Nhos fla kunpanheru verdadi’. — Zacarias 8:16.

Tirmina namoru krê fla ma bu fadja na algun kuza? Nau. Lenbra ma namoru é pa djuda-u disidi si bu ta kaza ku kel algen ô nau. Mésmu ki bu tirmina un namoru bu pode prende txeu kuza ku kel spiriénsia.

Pensa na kel-li: ‘Kuzê ki N prende sobri nha kabésa, ku kel namoru li? Ten algun kuza ki N pode midjora antis di N kaza? Kuzê ki N ta fazeba diferenti si N disidi namora otu bês?’