Un minina sta ta fla otu minina kuzas ki ta mágua.

PERGUNTAS KI JÓVENS TA FAZE

Kuzê ki N pode faze si un amigu magua-m?

Kuzê ki bu debe sabe

Ka ten ninhun amizadi ki ka ta ten prubléma. Dja ki bus amigu é inperfeitu es pode faze ô fla algun kuza ki ta magua-u. Ti mésmu bu midjór amigu pode faze kel-li. Má é klaru ki bo tanbê é inperfeitu. Bu ka ta lenbra di algun algen ki dja bu mágua? — Tiagu 3:2.
É más fásil bu xinti maguadu óras ki bu ta odja kuzas na internet. Pur izénplu, un jóven ki txoma Davidi fla: “Óras ki bu sta na internet i bu ta odja fotu di bus amigu na konvíviu, bu pode kumesa ta pensa pamodi ki bu ka konvidadu. Kel-li pode pô-u ta xinti tristi i traídu.”
Bu pode prende lida ku kel prubléma.

Kuzê ki bu pode faze

Izamina bu korason. Bíblia ta fla: ‘Ka bu ofende faxi, pamodi é korason di algen tolu ki ta fika ofendidu.’ — Eclesiastes 7:9.

“Alvês bu pode kaba pa da kónta ma kuzê ki pô-u xatiadu ka éra mutu inportanti.” — Alyssa.

Pensa na kel-li: Bu ta ofende faxi? Bu pode sforsa pa bu ten más paxénxa ku inperfeison di otus algen? — Eclesiastes 7:21, 22.

Pensa na kes vantajen di púrdua. Bíblia ta fla: ‘É un kuza bunitu... dexa un ofénsa pasa.’ — Provérbios 19:11.

“Sikrê bu ten razon é bon bu púrdua di korason. Kel-li krê fla ma bu ka ta kontinua ta lenbra kel algen di kel kuza ki el faze-u i ma bu ka ta pô-l ta xinti kulpadu. Óras ki bu púrdua, skese.” — Mallory.

Pensa na kel-li: Kel kuza ki kontise é gravi mê? N ta konsigi púrdua pa mante pas ku kel algen? — Kolosensis 3:13.

Un minina sta ta dexa ar friu entra na un kuartu kenti. — Un amizadi é sima un kuartu kenti na un dia friu. Si bu ta sta sénpri ta pâpia di prublémas é sima si bu ta sta sénpri ta abri pórta i dexa friu entra.

Poi na lugar di kel algen. Bíblia ta fla: “Ka nhos djobe sô nhos própi interesi, má nhos djobe interesi di otus algen tanbê.” — Filipensis 2:4.

“Óras ki na un amizadi ten amor i ruspetu, bu ta krê rezolve kuzas más faxi ki bu pode, pamodi dja bu sforsa txeu pa mante kel amizadi i bu ka krê perde-l.” — Nicole.

Pensa na kel-li: Bu ta konsigi atxa algun kuza di bon na kuzê ki kel otu algen ta pensa? — Filipensis 2:3.

Konkluzon: Sabe lida ku mágua é un kapasidadi ki ta djuda-u txeu na bu vida. Kuzê ki bu ta atxa di prende faze kel-li gósi?