Un jóven sta ta odja pesoas ki sta bai Salon di reinu

PERGUNTAS KI JÓVENS TA FAZE

Pamodi ki é bon bu sisti runion na Salon di Reinu?

Tistimunhas di Jeová ta faze runion dôs bês pa simana, na ses lugar di adorason ki txoma Salon di Reinu. Kuzê ki ta kontise na kes runion? Pamodi ki é bon bu sisti kes runion li?

Kuzê ki ta kontise na un Salon di Reinu?

Salon di Reinu é un lugar ki pesoas ta djunta prinsipalmenti pa prende sobri modi ki Bíblia pode djuda-s na ses dia-dia. Kes runion ki ta fazedu la pode djuda-u na kes kuza li:

prende verdadi sobri Deus.
ntende siginifikadu di kuzas ki sta kontise oji.
bira un algen midjór.
atxa bons amigu.

Bu sabia ma kes lugar ki Tistimunhas di Jeová ta faze runion txoma Salon di Reinu pamodi la es ta pâpia txeu sobri Reinu di Deus? — Mateus 6:9, 10; 24:14; Lucas 4:43.

Pamodi ki é bon bu sisti runion?

Kes kuza ki bu ta ba prende la ta djuda-u. Kes prinsípiu di Bíblia ki ta papiadu di el na runion di Tistimunhas di Jeová ta djuda-u ‘ganha sabedoria.’ (Provérbios 4:5) Kel-li krê fla ma Bíblia pode djuda-u toma bons disizon na vida. Tanbê el pode djuda-u atxa respósta pa kes pergunta más inportanti di vida, sima:

Kel-li é alguns téma di diskursu ki ta fazedu na runion di fin di simana:

Pamodi ki nu debe dexa Bíblia gia-nu ?
Undi nu ta atxa ajuda óras ki nu sta frontadu?
Kuzê ki Reinu di Deus sta ta faze pa nos gósi?

“Un dia un koléga di skóla ben sisti un di nos runion. El xinta djuntu ku nha família i nu dexa-l odja matéria di runion na nos livrus. Dipôs el fla-m ma el fika dimiradu ku komentárius ki kes algen da na runion. Tanbê el fla-m ma na se igreja es ka tinha matéria pa studa sima di nos.” — Brenda.

Bu sabia ma bu ka ta paga nada pa entra na Salon di Reinu i nen bu ka ta pididu dinheru?

Kes algen ki ta sisti runion ta da-u koraji. Bíblia ta fla ma un di kes motivu ki nu debe sisti runion, é pa nu ‘da kunpanheru koraji.’ (Hebreus 10:24, 25) Sta djuntu ku pesoas ki ta preokupa más ku Deus i ku otus algen di ki ku ses kabésa, ta anima-nu na un mundu ki kuazi tudu algen ta preokupa sô ku ses kabésa.

“Na fin di un dia, N pode sta tristi i kansadu, má kes algen na Salon di Reinu sénpri ta pô-m ta xinti midjór. Na kaminhu pa kaza dipôs di runion N ta xinti filís i prontu pa más un dia.” — Elisa.

Bu sabia ma na mundu interu ten más di 120 mil kongregason di Tistimunhas di Jeová, ki ta faze runion na más di 60 mil lugar? Kada anu, ta fazedu más ô ménus uns 1.500 Salon di Reinu pa resebe kes algen ki sta ba sisti runion ki sta bira kada bês más txeu.a

Kuzê ki otus jóven ta fla

“Kantu N staba na liseu, un koléga di skóla sisti alguns runion ku mi, i el fika dimiradu di odja algen di tudu idadi ta prende sobri Bíblia tudu djuntu. Ka dura li, nha patron sisti runion i el fika dimiradu di odja-nu ta uza Bíblia txeu bês. N fika ta da más valor pa runion kantu N odja nha patron ta da valor pa runion!” — Jessica.

“N ta atxa ma runion ta djuda-m ka fika preokupadu dimás ku kuzas di dia-dia. Nu ta prende modi ki nu ta ten un vida sábi, modi ki nu ta bira un algen más midjór i monti otus kuza. Sénpri N ta sai di Salon di Reinu nkorajadu i animadu.” — Timothy.

“Un ómi ki N konvida pa runion fla: ‘N bai runion sô pa prova ma kuzas ki nhos ta inxina é falsu. Má runion mostra-m ma kuzas ki N ta kriditaba na el staba eradu!’ Tanbê el fika dimiradu ku amor ki Tistimunhas di Jeová mostra-l. El fla: ‘Nbóra ka dura ki N konxe nhos, má nhos trata-m sima ki dja ten un monti anu ki nhos konxe-m!’ ” — Jacob.

“Dja N kustuma pensa, sô runion kaba N ta bai nha kaminhu. Má duránti runion, kel ideia li ta kaba. Dipôs di runion, N ta pâpia ku kes algen i N ka ta konsigi lenbra pamodi ki N krê baba nha kaminhu. Si ka éra pamodi runion, N ka ta tinha kes amigu spetakular ki N ten gósi.” — Madison.

a Pa atxa un lugar di runion, bai na párti “Runions di Tistimunhas di Jeová” i klika na “Djobe un lugar más pértu di bo.”