Fitisaria ô bruxaria é sô un diverson ki ka ta prujudika?

Kuzê ki bu ta atxa?

• É prigozu djobe kuzas ki ten aver ku síginu, djuga jogus pa txoma spritu, bai kaza di méstri ô kuranderu?

• Kes stória sobri fitisaria ô bruxaria ta uzadu sô pa reprizenta un luta entri ben ku mal ô es ta sirbi pa más algun kuza?

Kel artigu li ta mostra pamodi ki fitisaria ô bruxaria pode txoma atenson di algen i pamodi ki bu meste ten kuidadu.

• Pamodi ki el ta txoma atenson di algen?

• Pamodi ki bu debe toma kuidadu?

• Kuzê ki bu pode faze

• Kuzê ki otus jóven ta fla

Pamodi ki el ta txoma atenson di algen?

Pesoas ki sta na nogósiu di diverson ta ganha txeu dinheru ta faze filmis, prugramas di tilivizon, jogus di konputador i livrus ki ta distaka fitisaria ô bruxaria. Pamodi kel-li, monti jóven dizenvolve interesi pa kuzas sima astrolojia, dimónis, vanpiru i majia. Pamodi? Kes-li é alguns motivu:

• Kuriozidadi: Pa diskubri si spritus ta izisti

• Preokupason: Pa tenta sabe kuzê ki sta ben kontise na futuru

• Pâpia ku algen: Pa tenta pâpia ku un família ki dja móre

Kes motivu li pode ka ser mariadu. Pur izénplu é normal pensa na futuru ô xinti falta di un algen ki nu ta ama ki móre. Má nu debe sta sienti di alguns prigu ki ta izisti.

Pamodi ki bu debe toma kuidadu?

Na Bíblia, nu ta atxa avizus fórti kóntra kalker kuza ki sta ligadu ku fitisaria ô bruxaria. Pur izénplu, el ta fla:

‘I na bu meiu ka debe ten ningen ki ta faze dibinhason, ô ki ta faze majia, ô ki ta djobe agoru, ô un fitiseru, ô un algen ki ta prende otus algen ku nkantamentu, ô ki ta djobe kes algen ki ta invoka spritus, ô un algen ki ta dibinha, ô algen ki ta pâpia ku mortu. Pamodi Jeová ta ôdia ken ki ta faze kes kuza li’. — Deuteronómio 18:10-12.

Pamodi ki Bíblia ta kondena fitisaria ô bruxaria?

• Fitisaria ô bruxaria sta ligadu ku dimónis. Bíblia ta inxina ma alguns anju fika kóntra Deus i es bira ses kabésa inimigus di Deus. (Génesis 6:2; Judas 6) Kes anju mau, ki ta txomadu di dimónis ta uza méstri ô kuranderu, dibinhason i astrolojia pa ngana algen. Faze kes kuza li ta pô-nu bira amigu di kes inimigu di Deus.

• Fitisaria ô bruxaria ta apoia kel mintira ki ta fla ma alguns algen ta konsigi sabe futuru. Má é sô Deus ki pode fla kel-li: ‘Désdi komésu N ta fla kal ki é fin, i désdi ténpu antigu kes kuza ki inda ka fazedu.’ — Isaías 46:10; Tiago 4:13, 14.

• Fitisaria ô bruxaria ta apoia kel krénsa falsu ma algen ki dja móre pode pâpia ku kes ki sta bibu. Má Bíblia ta fla: ‘Mortus ka sabe di más nada. Ka ten trabadju, nen planus, nen konhisimentu, nen sabedoria na Sipultura’. — Eclesiastes 9:5, 10.

Pamodi kes motivu li, Tistimunhas di Jeová ta ivita kuzas ki sta ligadu ku fitisaria ô bruxaria. Tanbê es ka ta divirti ku kuzas sima zunbis, vanpirus ô pesoas ki ten puder ki é ka normal pa algen ten. Un jóven ki txoma Maria fla: “Si un prugrama ten kuzas di fitisaria ku bruxaria, N ka debe odja-l.”a

Kuzê ki bu pode faze

• Sta disididu na ivita kalker kuza ô diverson ki ta nvolve fitisaria ô bruxaria pa bu pode ‘ten un konsénsia linpu’ dianti di Jeová. — Atos 24:16.

• Bota fóra kalker kuza ki bu ten, ki sta ligadu ku fitisaria ô bruxaria. Lé Atos 19:19, 20 i odja bon izénplu ki kes sigidor di Jizus na ténpu di apóstlus dexa-nu na kel asuntu li.

Lenbra di kel-li: Óras ki bu ta ivita diverson ô kalker otu kuza ki sta ligadu ku fitisaria ô bruxaria bu ta mostra ma bu sta di ladu di Jeová. I kel-li ta dexa se korason kontenti! — Provérbios 27:11.