Un jóven ta labanta di kadera i ta kumesa ta kóre

PERGUNTAS KI JÓVENS TA FAZE

Modi ki N pode kria vontadi di faze izersísiu?

Pamodi ki N debe faze izersísiu?

Na alguns país, jóvens sta ta faze izersísiu kada bês más poku i kel-la sta ta afeta ses saúdi. É ka atoa, ki Bíblia ta fla ma ‘izersísiu fíziku ten algun vantaji’. (1 Timóteo 4:8) Odja alguns vantaji:

Faze izersísiu pode midjora manera ki bu ta xinti. Izersísiu fíziku ta liberta un kuza na sérbru, ki ta pô-u ta xinti diskontraídu i filís. Alguns algen ta fla ma izersísiu é un ramedi natural ki ta djuda-nu ka xinti dizanimadu.

“Si N kóre lógu sédu palmanhan, nha dia ta bai más dretu i más sábi. Kóre ta pô-m ta xinti midjór.” — Regina.
Faze izersísiu pode midjora bu aparénsia. Si bu faze izersísiu di manera ikilibradu ta djuda-u bira más fórti, ten aparénsia más midjór i bu ta ten más kunfiansa.

“N ta xinti sábi, pamodi gósi N ta konsigi faze kes izersísiu ki é pa N aguenta pézu di nha korpu. Un anu atras N ka ta konsigiba faze kel-la! Midjór inda é sabe ma N sta ta kuida di nha korpu.” — Olivia.
Faze izersísiu pode pô-u ta vive más txeu. Faze izersísiu ta midjora sirkulason di sangi na bu korpu i ta poi kes órgon ki ta djuda-u respira ta funsiona más dretu. Izersísiu tanbê pode djuda-u ivita prublémas di korason, ki é un duénsa ki ta mata txeu ómi ku mudjer.

“Óras ki nu ta faze izersísiu sénpri, nu ta mostra nos Kriador ma nu ta da valor pa korpu ki el da-nu.” — Jessica.

Konkluzon: Faze izersísiu ta da-nu más saúdi na futuru i el pode djuda-nu désdi gósi. Un jóven ki txoma Tonya fla: “Nunka bu ka ta fla: N ka devia bai anda ô kóre. Tudu kes bês ki N dexa di inventa diskulpa i ki N kumesa ta faze izersísiu, nunka N ka rapende.”

Un jóven ta djobe motor di un karu ki ka kuidadu di el — Un karu ki ka ta kuidadu di el, más sédu ô más tardi ta ten prublémas. Di mésmu manera kel-li pode kontise ku bu korpu si bu ka faze izersísiu.

Kuzê ki sta ta inpidi-m?

Bu pode sta ta pasa pa alguns di kes situason li:

Falta di motivason. “N ta atxa ma pesoas ta xinti ma nada ka ta kontise ku es óras ki es é jóven. É difísil imajina ma na futuru nu ta ten prublémas di saúdi. Nu ta atxa ma kel-li é kuza sô pa kes algen más grandi.” — Sophia.
Falta di ténpu. “Dja ki N ten un vida xeiu, N meste ranja ténpu pa kume dretu i pa durmi, má ranja ténpu pa faze izersísiu fíziku sénpri foi más difísil pa mi.” — Clarissa.
Falta di dinheru pa bai un jináziu. “Pa bu ten un korpu en fórma, ta kusta karu! Bu ten ki paga pa bai pa un jináziu!” — Gina.

Pensa na kel-li:

Kuzê ki sta ta inpidi-u di faze izersísiu? Pa bu konsigi vense, bu meste faze alguns kuza, má kes rezultadu ta bale péna.

Kuzê ki pode djuda-m faze izersísiu?

Odja alguns sujiston:

Ka bu fika ta dipende di otus pa bu kuida di bu saúdi. — Gálatas 6:5.
Ka bu inventa diskulpa. (Eclesiastes 11:4) Pur izénplu, bu ka meste bai pa un jináziu pa bu pode kumesa ta faze izersísiu. Bu pode diskubri un izersísiu ki bu gosta i kumesa ta faze-l sénpri.
Pa bu ten más ideia, pergunta otus algen kal ki é izersísiu ki es ta kustuma faze. — Provérbios 20:18.
Ten un óra sértu. Poi métas i skrebe bu prugrésu pa bu ka perde motivason. — Provérbios 21:5.
Ranja un algen pa faze izersísiu ku bo. Si bu ten un koléga pa trena ku bo, el ta insentiva-u i djuda-u faze sénpri bus izersísiu. — Eclesiastes 4:9, 10.
Bu ta ten dizafius, má ka bu dizisti óras ki es parse. — Provérbios 24:10.

Ten ikilíbriu

Bíblia ta fla ma ómis ku mudjeris debe ser ‘ikilibradu na ses ábitu’. (1 Timóteo 3:2, 11) Pur isu, bu debe ten un atitudi ikilibradu sobri izersísiu. Kes algen ki ta izajera na faze izersísiu ta odjadu sima un algen ki ka ten sabedoria. Un jóven ki txoma Julia fla: “Un rapás ki ten más musklu di ki intilijénsia, ka ta txoma-m atenson.”

Tanbê toma kuidadu ku kes publisidadi ki ten frazis sima: “Óras ki bu xinti ma bu sta ta móre, faze más 10.” Konsedju sima kel-li pode prujudika bu korpu i pô-u ka ta konsentra na ‘kuzê ki é más inportanti’ na vida. — Filipenses 1:10.

Tanbê, kel tipu di motivason li pode ten otu rezultadu. Un jóven ki txoma Vera fla: “Txeu minina ta guarda fotus di kes algen ki es ta gostaba di parse ku es. Es ta fika ta odja kes fotu óras ki es sta sen motivason. Má es ta kaba pa konpara ku kes algen la i es ta xinti más dizanimadu inda. É midjór bu ten méta di midjora bu saúdi, ka sô bu aparénsia.”

Kuzê ki otus jóven ta fla

“N gosta di kóre pamodi é un manera di N xinti ménus preokupason. Tanbê el ta djuda nha korason fika más fórti i ta djuda-m perde pézu. Dipôs di kóre N ta xinti más inerjia i N ta xinti midjór ku nha kabésa.” — Yasmine.

“Izersísiu ki N ta prifiri é disportu. Basketibol é kel ki N gosta más txeu. Óras ki N ta kumesa ta djuga, N ka ta xinti ma N sta ta faze izersísiu. Ta leba ténpu pa prende djuga dretu i gosta di un disportu, má tudu sforsu ta bale péna.” — Joel.

“Anda ta djuda-m txeu! El ta djuda nha menti i nha korpu tanbê. Sima maioria di algen, N ta lida ku ansiadadi, má óras ki N sta na meiu di naturéza N ta xinti ma N ta konsigi pensa más dretu i N ta ten más inerjia. Kel-li é un kuza ki kuazi nu ka ta xinti na kel mundu li, pamodi nos vida é txeu okupadu.” — Lily.

“Txeu di kes kuza ki ta faze un izersísiu parse difísil, é ka verdadi si N ka fika ta pensa na es. Pur izénplu, óras ki N ta djuga basketibol, N ta konsentra na kel jogu envês di konsentra na kansera. Tanbê djuga basketibol é un bon manera di ranja más amigu.” — Miles.