Deus ta xinti bu dór?

KUZÊ KI KRIASON TA INXINA-NU

Nos tudu nu ten kapasidadi di ntende sentimentus di otus algen. Kel-li ta kontise óras ki nu ta imajina modi ki ta sérba poi na lugar di kel algen i xinti kuzê ki el sta xinti. Dotor Rick Hanson, un spesialista na kel asuntu li, fla ma kel kapasidadi li sta-nu na sangi.

PENSA NA KEL-LI: Kel kapasidadi ki nu ten di poi na lugar di otus algen ta pô-nu ser diferenti di kalker ser bibu. Má, pamodi ki nu ten kel kapasidadi li? Bíblia ta fla ma Deus kria-nu sima se imaji. (Génesis 1:26) Kel-li krê fla ma Deus da-nu kes bon kualidadi ki el ten. Pur isu, nu ta konsigi imita se manera di ser. Óras ki un algen ta poi na lugar di otu algen i el ta djuda-l, el sta ta imita nos Kriador, Jeová. — Provérbios 14:31.

KUZÊ KI BÍBLIA TA INXINA-NU

Deus ta xinti nos dór i el ka gosta di odja-nu ta sufri. Pur izénplu, na pasadu israelitas sufri kantu es éra skravu na Ijitu. Dipôs, es pasa pa txeu difikuldadi duránti 40 anu na dizértu. Bíblia ta fla modi ki Deus xinti: ‘Duránti tudu ses frónta, el sufri djuntu ku es.’ (Isaías 63:9) Deus ka sabia sô di ses difikuldadi, má tanbê el xinti ses dór. Deus fla: ‘N sabe dretu modi ki es sta ta sufri.’ (Êxodo 3:7) El fla tanbê: ‘Kel ki poi mô na nhos, ta poi mô na minina di nha odju.’ (Zacarias 2:8) Kel-li krê fla ma óras ki un algen ta pô-nu ta sufri, Deus ta sufri tanbê.

Talvês bu ta kondena bu kabésa i bu ta atxa ma bu ka merese pa Deus xinti bu dór. Má, Bíblia ta garanti-nu ma ‘Deus é más grandi di ki nos korason i el sabe tudu kuza.’ (1 João 3:19, 20) Deus konxe-nu midjór di ki nu konxe nos kabésa. El sabe tudu sobri nos situason, nos pensamentu i nos sentimentu. Deus ta poi na nos lugar i el ta xinti nos dór.

Bíblia ta garanti-nu

• ‘Bu ta txoma, i Jeová ta responde-u; bu ta grita pa ajuda, i el ta fla: “N sta li!”’ — ISAÍAS 58:9.

• ‘Jeová fla: “N sabe dretu kuzê ki N sta pensa pa nhos. N krê pa nhos ten pas envês di disgrasa. N krê da nhos un futuru i un speransa. I nhos ta txoma-m i nhos ta txiga na mi na orason, i N ta obi nhos.”’ — JEREMIAS 29:11, 12.

• ‘Favor, djunta nhas lágua na bu barkinu. Es ka sta skrebedu na bu livru?’ — SALMO 56:8.

DEUS TA NTENDE-NU I EL TA XINTI NOS DÓR

Sima dja nu odja, Deus ta xinti nos dór. Má sabe kel-li, pode djuda-nu lida ku difikuldadis? Odja kuzê ki kontise ku Maria.

“Nha fidju móre ku 18 anu, dipôs di dôs anu ta luta kóntra kánser. N kumesa ta atxa ma vida éra duru i injustu. N fika ku raiba di Jeová pamodi el ka faze nada pa kura nha fidju!

“Dipôs di 6 anu, N konta un amiga di nha kongregason modi ki N staba ta xinti. N fla-l ma Jeová ka ta amaba mi. Nha amiga trata-m ku amor i el ntende-m. Dipôs ki el pasa alguns óra ta obi-m, sen korta-m konbérsu, el fla-m un testu ki mexe ku mi. Kel testu éra 1 João 3:19, 20, ki ta fla: ‘Deus é más grandi di ki nos korason i el sabe tudu kuza.’ El splika-m ma Jeová ta ntende kuzê ki nu sta pasa pa el.

“Má simé, kel raiba ki N staba ta xinti di Jeová ka kaba faxi! Dipôs N lé Salmo 94:19, ki ta fla: ‘Kantu preokupasons toma kónta di mi, bu konsola-m i bu pô-m ta fika kalmu.’ N xinti sima ki kel testu li skrebedu pa mi! Ku ténpu, N konsigi pâpia ku Jeová sobri nha sufrimentu. N xinti aliviadu kantu N faze kel-li, dja ki N tinha sertéza ma el ta obi-m i ma el ta ntende-m.”

Fórti nu ta xinti sábi di sabe ma Deus ta ntende-nu i ma el ta xinti nos dór! Má nton, pamodi ki ten txeu sufrimentu? Deus sta ta kastiga-nu pamodi kuzas mariadu ki nu sta ta faze? Algun dia el ta ben kaba ku tudu sufrimentu? Nu ta ben responde kes pergunta li na kes otu artigu.