Nunka nu ka ta sta nos sô

1-2. (a) Pamodi ki nu pode fla ma nunka nu ka ta sta nos sô óras ki nu ta pasa pa prublémas? (b) Kuzê ki nu ta ben pâpia di el na kel studu li?

ÓRAS ki nu ta pasa pa situasons difísil, nu pode xinti sima si nu sta nos sô na un boti pikinoti na meiu di un tenpistadi na mar. Má, nu ka ta lida ku nos difikuldadi nos sô. Nos Pai na séu, ki ta ama-nu txeu, ka sô ta odja kes difikuldadi ki nu ta pasa pa el, má tanbê el promete djuda-nu lida ku es. Jeová ta da kel garantia li pa tudu se sérvus lial: ‘N ta djuda-u.’ — Isa. 41:10.

² Na kel studu li, nu ta ben odja modi ki Jeová ta djuda-nu (1) óras ki el ta gia-nu, (2) óras ki el ta da-nu kuzê ki nu meste, (3) óras ki el ta proteje-nu i (4) óras ki el ta konsola-nu. Jeová ta da-nu serteza ma ka ta inporta ki prublémas ki nu pasa na vida, nunka el ka ta skese di nos. Nunka el ka ta ben bandona-nu. Pur isu, nunka nu ka sta nos sô.

JEOVÁ TA GIA-NU

3-4. Modi ki Jeová ta gia-nu? (Salmo 48:14)

³ Lé Salmo 48:14. Jeová sabe ma nu ka ta pode gia nos kabésa i ma nu meste pa el orienta-nu. Modi ki el ta gia se sérvus lial oji? Un manera ki el ta faze kel-li, é através di Bíblia. (Sal. 119:105) Através di se Palavra, Jeová ta djuda-nu toma disizons i dizenvolve kualidadis ki ta djuda-nu ten kel alegria más grandi gósi i ten vida pa tudu ténpu na futuru.a Pur izénplu, el ta inxina-nu ka guarda rankor, ser onéstu na tudu kel ki nu ta faze i ten un amor fórti pa otus algen. (Sal. 37:8; Ebr. 13:18; 1 Ped. 1:22) Óras ki nu ta mostra kes bon kualidadi li, nu ta bira pai ku mai, maridu ku mudjer i amigus midjór.

⁴ Na Bíblia Jeová ta konta-nu stória di pesoas ki pasa pa prublémas i ki xinti di mésmu manera ki nos. (1 Kor. 10:13; Tia. 5:17) Óras ki nu ta lé kes stória li i nu ta aplika kes lison ki nu prende, es ta djuda-nu di dôs manera. Primeru, nu ta da kónta ma nu ka sta nos sô pamodi otus algen pasa pa situasons sima di nos i es konsigi aguenta i ten bon rezultadu. (1 Ped. 5:9) I sugundu, nu ta prende modi ki nu ta lida ku nos prublémas. — Rom. 15:4.

5. Kenha ki Jeová ta uza pa gia-nu?

⁵ Jeová tanbê ta uza irmons ku irmans pa gia-nu.b Pur izénplu, enkaregadus di grupu di kongregason ta vizita kongregasons pa inkoraja-nu. Ses diskursu ta bira nos fé más fórti i es ta djuda-nu kontinua unidu. (Atus 15:40–16:5) Ansions tanbê ta sforsa txeu pa djuda kada un di nos kontinua ku un amizadi fórti ku Jeová. (1 Ped. 5:2, 3) Pai ku mai ta inxina ses fidju ama Jeová i modi ki es toma bons disizon i ten bons ábitu. (Pro. 22:6) I irmans maduru ta djuda kes irman más jóven óras ki es ta da-s bon izénplu, bons konsedju i inkorajamentu. — Titu 2:3-5.

6. Modi ki nu pode mostra ma nu ta da valor pa manera ki Jeová ta gia-nu?

⁶ Jeová ta da-nu kel orientason ki nu meste pa nu toma bons disizon i pa nu ten un vida filís. Modi ki nu pode mostra ma nu ta da valor pa kuzê ki el ta faze pa nos? Provérbios 3:5, 6, ta fla: ‘Kunfia na Jeová di tudu bu korason, ka bu kunfia na bu própi intendimentu.’ Óras ki nu ta faze kel-li, ‘el ta bira nos kaminhu rétu.’ Kel-li krê fla ma el ta djuda-nu ivita txeu prubléma i ten un vida filís. Nu ten txeu gratidon pamodi Jeová konxe-nu dretu i el ta ama-nu txeu ki el ta da kada un di nos konsedju ki nu meste! — Sal. 32:8.

JEOVÁ TA DA-NU KUZÊ KI NU MESTE

7. Kal ki é alguns manera ki Jeová ta da-nu kuzê ki nu meste? (Filipensis 4:19)

⁷ Lé Filipensis 4:19. Alén di gia-nu, Jeová tanbê ta abênsua sforsu ki nu ta faze pa ten kumida, ropa i un lugar pa vive. (Mat. 6:33; 2 Tes. 3:12) Enbóra é normal preokupa ku kes kuza li, Jeová ta fla-nu pa nu ka fika preokupadu dimás ku es. (Odja nóta di studu na Mateus 6:25.) Pamodi? É pamodi nos Pai nunka ka ta bandona ses sérvu lial óras ki es meste di ajuda. (Mat. 6:8; Ebr. 13:5) Nu pode kunfia na el óras ki el ta fla-nu ma el ta da-nu kes kuza ki nu meste.

8. Kuzê ki Jeová faze pa Davidi?

⁸ Pensa na modi ki Jeová djuda Davidi. Duránti kes anu ki Davidi pasa ta fuji di rei Saul, Jeová da el i kes ómi ki staba djuntu ku el kes kuza ki es mesteba pa es sobrivive. Kantu Davidi midita na modi ki Jeová kuida di el duránti kes anu, el skrebe: ‘Ami éra jóven i gósi N sta algen grandi, má nunka N ka odja un algen justu bandonadu, nen se fidjus ta djobe pon.’ (Sal. 37:25) Talvês, duránti bu vida, dja bu odja Jeová ta da ses sérvu kes kuza ki es meste.

9. Modi ki Jeová oji ta da se povu kes kuza ki es meste óras ki kontise un dizastri? (Odja fotus.)

⁹ Jeová tanbê ta da ses sérvu kes kuza ki es meste duránti ténpu di frónta. Pur izénplu, kantu kontise un fómi na ténpu di apóstlus, kristons di txeu lugar manda ses irmons ku irmans kes kuza ki es mesteba. (Atus 11:27-30; Rom. 15:25, 26) Povu di Deus oji tanbê ta djuda ses irmons ku irmans óras ki es meste. Óras ki kontise un dizastri, ku amor Jeová ta motiva se povu pa da kes irmon ki ta vive na kes lugar undi kontise dizastri kes kuza ki es meste, sima kumida, agu, ropa i ramedi. Ekipas di konstruson ta konpo kazas i Salons di Reinu. I sérvus di Jeová lógu ta uza Bíblia pa konsola i inkoraja kes algen ki perde ses kaza ô móre algen ki es ta ama.c

10-11. Kuzê ki nu ta prende ku spiriénsia di Brunu?

¹⁰ Jeová tanbê ta da kes algen ki inda ka ta sirbi-l kes kuza ki es meste. Di mésmu manera, nu ta djobe oportunidadis pa mostra bondadi pa kes algen ki ka ta sirbi Jeová. (Gál. 6:10) Txeu bês, kel-li ta da un bon tistimunhu. Odja spiriénsia di Brunu,d ki ta vive na Ukránia i ki é diretor di un skóla. Enbóra Brunu é ka un Tistimunha di Jeová, sénpri el ta trata ses alunu ki é Tistimunhas di Jeová ku bondadi i el ta ruspeta ses krénsa. Kantu Brunu disidi fuji di lugar undi ki el ta viveba pamodi staba ku géra i pa ba vive na otu lugar di kel país ki é más suguru, nos irmons djuda-l. Dipôs, Brunu sisti komemorason di mórti di Jizus. Kantu Brunu lenbra di kuzê ki pasa, el fla: “Tistimunhas di Jeová mostra-m txeu bondadi i es kuida di mi. N ten txeu gratidon pa Tistimunhas di Jeová.”

¹¹ Nos tanbê nu pode imita nos Pai na séu, ki ten txeu mizerikórdia, óras ki nu ta mostra amor pa kes algen ki sta meste ajuda, ka ta inporta si es ten mésmu krénsa ki nos ô nau. (Luk. 6:31, 36) Nu ta spera ma nos sforsu di ama pesoas ta djuda-s bira un disiplu di Kristu. (1 Ped. 2:12) Má ka ta inporta si es skodje sirbi Jeová ô nau, nu ta xinti alegria pamodi “nu ta ser más filís óras ki nu ta da”. — Atus 20:35.

JEOVÁ TA PROTEJE-NU

12. Ki proteson Jeová ta promete da se povu? (Salmo 91:1, 2, 14)

¹² Lé Salmo 91:1, 2, 14. Oji, Jeová ta promete ma el ta proteje ses sérvu di kalker kuza ki pode prujudika ses amizadi ku el. El ka ta dexa Satanás inpidi se povu di adora-l di manera ki el krê. (Juan 17:15) I óras ki “grandi tribulason” kumesa nu pode ten tudu kunfiansa ma Jeová ta ben kunpri se promésa di djuda-nu mante nos fé fórti i salva-nu. — Apo. 7:9, 14.

13. Di ki maneras Jeová ta proteje kada un di nos?

¹³ Modi ki Jeová ta proteje kada un di nos? Através di Bíblia, Jeová ta djuda-nu sabe kuzê ki é dretu i kuzê ki é mariadu. (Ebr. 5:14) Óras ki nu ta sigi prinsípius di Bíblia na nos vida, nu ta proteje nos amizadi ku Jeová i nu ta toma bons disizon ki ta djuda-nu ten un vida filís i un bon saúdi. (Sal. 91:4) Tanbê, Jeová ta proteje-nu através di kongregason. (Isa. 32:1, 2) Óras ki nu ta pasa ténpu ku kes algen ki ta ama Jeová i ki ta obi ku el, nu ta resebe inkorajamentu i forsa ki ta djuda-nu ivita faze kuzas mariadu. — Pro. 13:20.

14. (a) Pamodi ki Deus ka ta proteje-nu di tudu nos prubléma? (b) Di kuzê ki Salmo 9:10 ta da-nu serteza? (Odja nóta di rodapé.)

¹⁴ Na pasadu, alvês Jeová ta protejeba ses sérvu pa es ka ser prujudikadu ô pa es ka matadu. Má na alguns situason, el ka faze kel-la. Bíblia ta fla ma prublémas ‘ki nu ka sta spera’ pode kontise ku kalker un di nos. (Ecl. 9:11) Tanbê, Jeová dexa alguns di ses sérvu pasa pa pirsigison i ti mésmu móre pa prova ma Satanás é mintirozu. (Jó 2:4-6; Mat. 23:34) Mésmu kuza ta kontise oji. Enbóra Jeová pode ka tra-nu nos prubléma, nu pode ten serteza ma nunka el ka ta bandona kes algen ki ta ama-l.e — Sal. 9:10.

JEOVÁ TA KONSOLA-NU

15. Modi ki orason, Palavra di Deus i nos irmons ta konsola-nu? (2 Koríntius 1:3, 4)

¹⁵ Lé 2 Koríntius 1:3, 4. Alvês, nu ta pasa pa dór, ansiadadi ô tristéza. Talvês bu sta ta pasa pa un situason difísil gósi ki ta pô-u ta xinti bo sô. Ten algun algen ki ta intende kuzê ki bu sta xinti? Jeová ta intende. Alén di xinti nos dór, tanbê el ta “konsola-nu na tudu nos prubléma”. Modi ki el ta faze kel-li? Óras ki nu ta faze orason ta inplora ajuda di Jeová, el ta da-nu “kel pas di Deus ki nu ka ta konsigi intende”. (Flp. 4:6, 7) Tanbê nu ta atxa konsolu óras ki nu ta lé palavra di Jeová na Bíblia. Na el, Jeová ta fla-nu modi ki el ta ama-nu txeu, el ta inxina-nu modi ki nu ta ten sabedoria i el ta da-nu speransa. Tanbê, nu ta atxa konsolu na nos runion, undi nu ta prende kuzas di Bíblia ki ta inkoraja-nu i undi ki nu ta sta djuntu ku nos irmons ku irmans ki ta ama-nu.

16. Kuzê ki bu prende ku spiriénsia di Natan i Prisila?

¹⁶ Nu pode odja modi ki Jeová ta konsola-nu i inkoraja-nu através di Bíblia, óras ki nu ta pensa na spiriénsia di Natan i Prisila ki ta vive na Mérka. Dja ten alguns anu ki es disidi muda pa un lugar undi tinha más nisisidadi di publikador. Natan fla: “Nu kunfia ma Jeová ta abensuaba nos sforsu.” Má dipôs ki es txiga na ses novu diziginason, es pasa pa prublémas di saúdi ki es ka staba ta spera i falta di dinheru. Ku ténpu, kel kazal volta pa kaza, má es kontinua ta ten falta di dinheru. Natan fla: “N pergunta pamodi ki Deus ka abênsua nos sforsu di manera ki nu pensa ma el ta fazeba. Ti N kumesa ta pergunta si N faze algun kuza mariadu.” Má ku ténpu, Natan i Prisila kumesa ta da kónta ma Deus ka bandona-s duránti kel ténpu ki es staba ta meste. Natan fla: “Duránti kel ténpu difísil, Bíblia bira sima un amigu ki ten sabedoria ki staba ta da-nu inkorajamentu i orientason. Konsentra na modi ki Jeová djuda-nu aguenta kel prubléma difísil, envês di konsentra na kel prubléma, pripara-nu pa nu lida ku prublémas na futuru ku fé.”

17. Modi ki un irman ki txoma Elga resebe konsolu? (Odja fotu.)

¹⁷ Tanbê, nos irmons ku irmans pode da-nu kel konsolu ki nu meste. Modi ki es ta faze kel-li? Odja spiriénsia di Elga, ki ta vive na Ungria. Pa txeu anu, el pasa pa prublémas difísil ki pô-l ta xinti ansiadadi i sen valor. Má, óras ki el ta pensa na kes kuza ki el pasa pa el, el ta odja modi ki Jeová konsola-l através di kongregason. El fla: “Jeová sénpri djuda-m kantu el odja ma nhas forsa staba ta kaba pamodi nha trabadju, kuida di nha fidju i otus prubléma. Ka tevi un dia, duránti kes últimu 30 anu ki el ka kunpri se promésa di konsola-m. Txeu bês, el ta da-m forsa através di kuzas ki otus algen ta fla ku bondadi i ki ta mostra ma es ta preokupa ku mi i ma es ta da-m valor. Txeu bês N ta resebe un mensajen, un bilheti ô un ilojiu na óra ki más N sta ta meste.”

18. Modi ki nu pode konsola otus algen?

¹⁸ Nu ten priviléjiu di imita nos Deus óras ki nu ta konsola otus algen. Modi ki nu pode faze kel-li? Nu pode obi-s ku paxénxa, pâpia ku es di manera ki ta konsola-s i djuda-s na kuzas ki es meste. (Pro. 3:27) Nu ta sforsa pa konsola tudu algen ki sta ta sufri. Kel-li ta inklui kes algen ki inda ka ta sirbi Deus. Óras ki otus algen ta pasa pa dór, duénsa ô ansiadadi, nu ta vizita-s, nu ta obi-s i nu ta pâpia ku es sobri kel mensajen di Bíblia ki ta inkoraja-s. Óras ki nu ta imita Jeová, ki é “Deus di tudu konsolu,” nu ta djuda nos irmons na fé óras ki es ta pasa pa prublémas. Tanbê nu ta djuda kes algen ki ka ta sirbi Deus krê prende sobri el. — Mat. 5:16.

JEOVÁ STA SÉNPRI LI PA NOS

19. Kuzê ki Jeová ta faze pa nos i modi ki nu pode imita-l?

¹⁹ Jeová ta preokupa txeu ku kes algen ki ta ama-l. Sima un pai ki ta ama ses fidju ta kuida di es, Jeová ta kuida di ses sérvu lial. El -nu i konsola-nu ta gia-nu, el ta da-nu kuzê ki nu meste, el ta proteje. Nu ta imita nos Pai na séu, ki ta mostra-nu txeu amor, óras ki nu ta djuda i nu ta inkoraja otus algen ki sta ta pasa pa prubléma. Na kel mundu li, nu pode pasa pa prublémas i sufrimentu. Má nu pode ten serteza ma Jeová sta ku nos. El promete-nu: ‘Ka bu xinti medu, pamodi N sta ku bo.’ (Isa. 41:10) Kel promésa li ta da-nu serteza ma ku Jeová, nunka nu ka ta sta nos sô.