Kuzê ki nómi di Jeová siginifika pa Jizus?

1-2. (a) Kuzê ki Jizus faze na kel noti antis di el móre? (b) Ki perguntas nu ta ben responde na kel studu li?

NA KINTA-FERA di noti, na dia 14 di nizan, di anu 33, Jizus faze Seia di Sinhor ku ses apóstlu fiel. El sabia ma lógu dipôs Judas ta ba traíba el, ses inimigu ta torturaba el i ta mataba el. Lógu dipôs di kel seia, el fla ses apóstlu txeu kuza ki ta inkorajaba es. Un kuzinha antis di es sai di kel sala ki es staba, Jizus faze un orason txeu inportanti. Nu pode lé kel orason li na Juan kapitlu 17.

² Na kel studu li, nu sta ben odja alguns kuza ki nu pode prende ku kel orason di Jizus. Ku kuzê ki el staba preokupadu antis di el móre? Modi ki kel orason ta mostra kuzê ki éra inportanti pa el kantu el staba na téra? Na kel studu li, nu ta ben odja respósta di kes pergunta li.

“N PÔ-S TA KONXE BU NÓMI”

3. Kuzê ki Jizus fla sobri nómi di Jeová i kuzê ki el krê flaba? (Juan 17:6, 26)

³ Na se orason, Jizus fla: “N pô-s ta konxe bu nómi”. Na verdadi, el fla dôs bês ma el poi ses disiplu ta konxe nómi di Jeová. (Lé Juan 17:6, 26.) Kuzê ki el krê flaba ku kel-li? El staba ta inxina-s un nómi ki es ka konxeba? Kes disiplu di Jizus éra judeu, nton dja es sabia ma nómi di Deus é Jeová. Kel nómi li ta parse milharis di bês na kes livru di Bíblia ki skrebedu na ebraiku. Nton, el ka staba ta inxina-s ma nómi di Deus é Jeová. Envês di kel-li, el staba ta inxina-s kuzê ki kel nómi ta reprizenta. Jizus staba ta pô-s ta konxe kel algen ki ten kel nómi ki é Jeová. Kel-li ta inklui se vontadi, kuzas ki el ta faze i se kualidadis. Ka ten ningen ki konxe Jeová midjór ki Jizus.

4-5. (a) Kuzê ki siginifika pasa ta konxe nómi di un algen? Da un izénplu. (b) Di ki manera disiplus di Jizus pasa ta konxe nómi di Jeová?

⁴ Pur izénplu, imajina ma ten un ansion na bu kongregason ki txoma Davidi i ki tanbê é un dotor ki ta faze operason. Dja ten txeu anu ki bu konxe kel irmon. Má un dia, bu ta meste faze un operason di imerjénsia. Bu ta bai pa ospital undi ki kel irmon ta trabadja i el salva bu vida. Gósi bu ta ama kel irmon más txeu i óras ki bu ta obi se nómi, bu ta pensa na kuzê ki el faze pa bo. Davidi dja ka é sô kel ansion ki bu konxe dja ten txeu ténpu, má tanbê el é kel dotor ki salva bu vida.

⁵ Di mésmu manera, disiplus di Jizus dja konxeba nómi di Jeová. Má kel nómi pasa ta ten un siginifikadu más grandi pa es pamodi pregason di Jizus. Pamodi ki nu pode fla kel-li? Pamodi Jizus imita manera di ser di se Pai na tudu kuza ki el fla i ki el faze. Pur isu, kantu disiplus di Jizus odja modi ki el ta inxinaba i modi ki el ta trataba otus algen, es pasa ta “konxe” Jeová midjór. — Juan 14:9; 17:3.

“BU NÓMI, KEL NÓMI KI BU DA-M”

6. Kantu Jizus fla ma Jeová da-l se nómi, kuzê ki el krê flaba? (Juan 17:11, 12)

⁶ Na se orason, Jizus ora pa ses disiplu kantu el fla: “Djobe-s pamodi bu nómi, kel nómi ki bu da-m”. (Lé Juan 17:11, 12.) Kel-li krê fla ma Jizus tanbê pode txomadu di Jeová? Nau. Kantu Jizus pâpia sobri nómi di Jeová, el fla: “Bu nómi”. Nton, nómi di Jeová ka bira nómi di Jizus. Kantu Jizus fla ma Deus da-l se nómi, kuzê ki el krê flaba? Primeru, Jizus ta reprizentaba Jeová i el éra se Pórta-vós. El ben na nómi di se Pai i el faze kuzas poderozu na se nómi. (Juan 5:43; 10:25) Sugundu, nómi di Jizus siginifika “Jeová é Salvason”. Nton, nómi di Jizus sta ligadu ku nómi di Jeová.

7. Pamodi ki Jizus pode papiaba na nómi di Jeová? Da un izénplu.

⁷ Pur izénplu, un enbaxador ta reprizenta un prizidenti i el pode pâpia na nómi di kel prizidenti. Nton, palavras di kel enbaxador ten mésmu autoridadi ki palavras di kel prizidenti. Di mésmu manera, Jizus ta reprizentaba Jeová i el ta papiaba ku pesoas na Se nómi. — Mat. 21:9; Luk. 13:35.

8. Pamodi ki Jeová fla ma Se nómi staba “na” Jizus mésmu antis di el ben pa téra? (Ézudu 23:20, 21)

⁸ Bíblia ta txoma Jizus di “Palavra” pamodi Jeová uza-l pa fla anjus i pesoas kuzê ki Jeová kreba pa es sabe i pa es fazeba. (Juan 1:1-3) Talvês Jizus éra kel anju ki Jeová manda pa kuida di kes israelita duránti kel ténpu ki es staba na dizértu. Kantu Jeová fla israelitas pa obi ku kel anju, el fla: “Nha nómi sta na el.”a (Lé Ézudu 23:20, 21.) Nómi di Jeová staba “na” Jizus, ki ta reprizentaba Jeová i ki é kel prinsipal algen ki santifika nómi di se Pai.

“NHA PAI, DA BU NÓMI GLÓRIA”

9. Modi ki nómi di Jeová éra inportanti pa Jizus? Splika.

⁹ Sima dja nu odja, mésmu antis di Jizus ben pa téra, nómi di Jeová éra txeu inportanti pa el. Kantu el staba na téra, tanbê el mostra na tudu kuza ki el faze modi ki nómi di Jeová éra inportanti pa el. Na fin di se pregason, Jizus fla: “Nha Pai, da bu nómi glória.” Nton, se Pai fla la di séu: “Dja N da-l glória i N ta torna da-l glória.” — Juan 12:28.

10-11. (a) Modi ki Jizus da nómi di Jeová glória? (Odja dizenhu.) (b) Pamodi ki nómi di Jeová meste ser santifikadu i meste provaba ma tudu kuza ki Jeová ta faze é dretu?

¹⁰ Jizus tanbê da nómi di se Pai glória. Modi ki el faze kel-li? Un manera é kantu el pâpia di kes kualidadi bunitu ki se Pai ten i di kes kuza ki Jeová faze pa otus. Má tanbê, el faze otus kuza pa da nómi di se Pai glória. Nómi di Jeová meste sérba santifikadu i meste provaba ma tudu kuza ki Jeová ta faze é dretu. Jizus mostra modi ki kel-li éra inportanti, kantu el inxina ses sigidor kel orason modelu. El fla: “Nos Pai ki sta na séu, pa bu nómi ser santifikadu.” — Mat. 6:9.

¹¹ Pamodi ki nómi di Jeová meste sérba santifikadu i meste provadu ma tudu kuza ki Jeová ta faze é dretu? Pamodi na jardin di Éden, Satanás konta mintira sobri Jeová Deus. Satanás fla ma Jeová é un mintirozu i ma el staba ta inpidi Adon ku Eva di ten un kuza bon. (Jén. 3:1-5) Kantu Satanás faze kel-li, é sima si el krê flaba ma manera ki Jeová ta faze kuzas é ka dretu. Pamodi kes mintira ki Satanás konta sobri Jeová, pesoas talvês pode pensa ma Jeová é un Deus mau. Na ténpu di Jó, Satanás fla ma kes algen ki ta sirbi Jeová ta faze kel-li sô pamodi kuzê ki Jeová ta da-s. Kel mintirozu tanbê fla ma pesoas ta para di sirbi Jeová óras ki es ta pasa pa difikuldadis pamodi es ka ta ama-l di verdadi. (Jó 1:9-11; 2:4) Mesteba ténpu pa prova si é Jeová ô Satanás ki é mintirozu.

“N TA DA NHA VIDA”

12. Kuzê ki Jizus staba dispostu na faze pamodi el ta ama nómi di Jeová?

¹² Pamodi Jizus ta amaba Jeová, el krê fazeba tudu kel ki el ta podeba pa santifika nómi di Jeová i pa prova ma tudu kuza ki Jeová ta faze é dretu. Jizus fla: “N ta da nha vida”. (Juan 10:17, 18) El staba dispostu na móre pa nómi di Jeová.b Kes dôs primeru algen perfeitu, ki é Adon ku Eva, ka obi ku Jeová i es fika di ladu di Satanás. Má Jizus staba dispostu na ben pa téra i prova ma el ta amaba Jeová. Jizus faze kel-li kantu el obi ku Jeová na tudu kuza ki el faze i ki el fla. (Ebr. 4:15; 5:7-10) El kontinua lial duránti tudu se vida ti ki el móre na un staka di tortura. (Ebr. 12:2) Di kel manera li, el prova ma el ta ama Jeová i Se nómi.

13. Pamodi ki Jizus éra kel midjór algen ki tinha pa provaba ma Satanás é un mintirozu? (Odja dizenhu.)

¹³ Tudu kuza ki Jizus faze, prova ma é Satanás ki é mintirozu, ka Jeová! (Juan 8:44) Jizus konxeba Jeová midjór ki kalker otu algen. Si kalker un di kes kuza ki Satanás fla kóntra Jeová éra verdadi, Jizus ta sabeba di kel-li. Má Jizus staba disididu na difende nómi di Jeová. Sikrê kantu parse ma Jeová bandona Jizus, el kontinua dispostu na móre envês di ka obi ku se Pai. — Mat. 27:46.c

“N TIRMINA KEL ÓBRA KI BU DA-M PA N FAZE”

14. Modi ki Jeová rekonpensa lialdadi di Jizus?

¹⁴ Na kel orason ki Jizus faze na kel noti antis di el móre, el pode flaba: “N tirmina kel óbra ki bu da-m pa N faze.” El kunfia ma Jeová ta rekonpensaba el pa se lialdadi. (Juan 17:4, 5) Jizus staba sértu kantu el kunfia na se Pai. Jeová ka ta dexaba el kontinua na sipultura. (Atus 2:23, 24) El resusita Jizus i el da-l un puzison más altu na séu. (Flp. 2:8, 9) Ku ténpu, Jizus bira Rei di Reinu di Deus. Kuzê ki kel Reinu li sta ben faze? Kel sugundu párti di kel orason modelu ta fla: “Pa bu Reinu ben. Pa bu vontadi fazedu na téra, sima na séu.” — Mat. 6:10.

15. Kuzê más ki Jizus ta ben faze?

¹⁵ Ka ta dura, Jizus ta ben luta kóntra kes inimigu di Deus i distrui kes mau na Armajedon. (Apo. 16:14, 16; 19:11-16) Lógu dipôs, el ta ba bota Satanás na “abismu”, undi el ta fika prézu i el ka ta konsigi faze nada. (Apo. 20:1-3) Dipôs, Jizus ta governa duránti mil anu i el ta traze pas pa téra i djuda pesoas bira perfeitu. El ta ben resusita kes algen ki móre. El ta bira téra un paraízu. Vontadi di Jeová ta ben kunpri! — Apo. 21:1-4.

16. Kuzê ki ta ben kontise na fin di Govérnu di Kristu di mil anu?

¹⁶ Kuzê ki nu pode spera ma ta ben kontise na fin di Govérnu di Kristu di mil anu? Pekadu i inperfeison ta ben kaba. Nu ka ta ben meste más pidi perdon di nos pekadu ku bazi na resgati. Tanbê nu ka ta ben meste más di un mediador ô di saserdótis. “I kel últimu inimigu ki é mórti, [ki nu erda di Adon] ta ben kabadu ku el.” Sipultura ta ben fika vaziu. Kes algen ki móre ta ben vive otu bês. Tudu algen na téra ta ben ser perfeitu. — 1 Kor. 15:25, 26.

17-18. (a) Kuzê ki ta ben kontise na fin di Govérnu di Kristu di mil anu? (b) Kuzê ki Jizus ta ben faze óras ki el tirmina di governa? (1 Koríntius 15:24, 28) (Odja dizenhu.)

¹⁷ Kuzê más ki ta ben kontise na fin di Govérnu di Kristu di mil anu? Na kel ténpu, ta ben kontise un kuza txeu spesial. Ningen más ka ta ten dúvida si Jeová é un Deus santu i justu. Pamodi? Na jardin di Éden, Satanás fla ma Jeová é mintirozu i ma el ka ta governa ku amor. Désdi kel ténpu, kes algen ki ta sirbi Jeová, dja prova txeu bês ma se manera di governa é kel midjór ki ten. Pur isu, na fin di Govérnu di Kristu di mil anu, nómi di Jeová ta ben sta linpu di tudu mintira ki dja fladu sobri el. Jeová ta ben prova ma el é un Pai ki ta ama-nu txeu.

¹⁸ Tudu algen ta ben sabe ma kuzê ki Satanás fla sobri Jeová éra mintira. Kuzê ki Jizus ta ben faze óras ki el tirmina di governa? El ta imita Satanás i el ta rabela kóntra Jeová? Nau! (Lé 1 Koríntius 15:24, 28.) Jizus ta ben intrega Reinu pa se Pai. El ta ben fika dibaxu di govérnu di Jeová. Diferenti di Satanás, Jizus ta ben da Jeová tudu se autoridadi pamodi el ta ama se Pai.

19. Kuzê ki nómi di Jeová ta siginifika pa Jizus?

¹⁹ Nu ka ta fika dimiradu pamodi Jeová staba dispostu na da Jizus Se nómi! Jizus mostra modi ki se Pai é di manera perfeitu. Nton, kuzê ki nómi di Jeová siginifika pa Jizus? El é más inportanti pa Jizus di ki kalker otu kuza. El staba dispostu na móre pamodi kel nómi li i el ta ben sta dispostu na intrega Jeová tudu kuza otu bês na fin di se Govérnu di mil anu. Modi ki nu pode imita izénplu di Jizus? Nu ta ben odja respósta pa kel pergunta li na kel otu studu.