STUDU 23
KÁNTIKU 2 Bu nómi é Jeová
Kuzê ki nómi di Jeová debe siginifika pa nos?
‘“Anhos é nhas tistimunha,” é Jeová ki fla.’ — ISAÍAS 43:10.
ASUNTU PRINSIPAL
Nu sta ben odja kuzê ki nu pode faze pa prova ma Jeová é santu i ma tudu kuza ki Satanás fla sobri el é mintira.
1-2. Modi ki nu sabe ma nómi di Jeová é inportanti pa Jizus?
NÓMI di Jeová é kel kuza más inportanti pa Jizus. El é kel algen ki más ta difende nómi di Jeová. Na kel studu ki pasa, nu prende ma Jizus staba dispostu na móre pa prova ma Jeová é santu i tudu ki el ta faze é dretu. (Mar. 4:36; Ebr. 10:7-9) Dipôs di se govérnu di mil anu, Jizus ta ben intrega Jeová tudu autoridadi pamodi el krê pa Jeová resebe tudu glória. (1 Kor. 15:26-28) Amor ki Jizus ten pa nómi di Deus tanbê ta mostra modi ki é amizadi di el ku se Pai. Tudu ki Jizus faze pa Jeová ta prova ma el ta ama Jeová txeu dimás.
2 Jizus ben pa téra na nómi di se Pai. (Juan 5:43; 12:13) El poi se sigidoris ta konxe nómi di se Pai. (Juan 17:6, 26) El inxina i faze milagris na nómi di Jeová. (Juan 10:25) Na verdadi, Jizus pidi pa Jeová djobe pa ses disiplu “pamodi [Se] nómi.” (Juan 17:11) Si nómi di Jeová é txeu inportanti pa Jizus, modi ki un algen pode fla ma el ta sigi Kristu si el ka konxe ô el ka ta uza nómi di Deus?
3. Sobri kuzê ki nu sta ben pâpia di el na kel studu li?
3 Dja ki nos é kriston verdaderu, nu ta imita Jizus óras ki nu ta mostra amor i ruspetu pa nómi di Jeová. (1 Ped. 2:21) Na kel studu li, nu sta ben odja pamodi ki kes algen ki ta prega kes “notísia sábi di Reinu” é konxedu pa nómi di Jeová. (Mat. 24:14) Tanbê nu sta ben pâpia di kuzê ki nómi di Jeová pode siginifika pa kada un di nos.
“UN POVU PA SE NÓMI”
4. (a) Kuzê ki Jizus fla ses disiplus antis di el subi pa séu? (b) Ki pergunta nu ta ben responde?
4 Un poku antis di Jizus subi pa séu, el fla ses disiplu: “Óras ki spritu santu ben riba nhos, nhos ta resebe puder i nhos ta ben ser nhas tistimunha na Jiruzalen, na tudu Judea i Samaria, i ti na párti más lonji di téra.” (Atus 1:8) Nton, disiplus ta ba pregaba notísias sábi na tudu lugar, ka sô na Israel. É klaru ki pesoas di tudu nasons ta ben tinha oportunidadi di bira sigidoris di Jizus. (Mat. 28:19, 20) Má, Jizus fla: “Nhos ta ben ser nhas tistimunha.” Má kes novu disiplus meste konxeba nómi di Jeová ô es ta sérba sô tistimunhas di Jizus? Kes kuza ki kontise ki sta na Atus kapitlu 15 ta djuda-nu responde kel pergunta li.
5. Modi ki kes apóstlu i kes ansion na Jiruzalen mostra ma tudu algen meste konxe nómi di Jeová? (Odja dizenhu.)
5 Na anu 49, kes apóstlu i kes ansion na Jiruzalen faze un runion pa djobe si kes algen di nason meste fazeba sirkunsizon pa es biraba kriston. Na fin di kel runion, Tiagu ki éra irmon di Jizus sô pa ladu mai, fla kel-li: “[Pedru] konta tintin pa tintin modi ki Deus pa primeru bês volta se atenson pa kes algen di nason pa el tra di ses meiu un povu pa se nómi.” Di ki nómi Tiagu staba ta pâpia? El ripiti kuzê ki proféta Amós skrebe, kantu el fla: “Asi pa kes algen ki resta di kel povu li buska Jeová ku inpenhu, djuntu ku pesoas di tudu nason, pesoas ki ta txomadu pa nha nómi, é Jeová ki fla”. (Atus 15:14-18) Alén di prende sobri Jeová, kes novu disiplu tanbê tinha ki ser ‘txomadu pa se nómi.’ Kel-li krê fla ma es ta poba otus algen ta konxe nómi di Deus i kes algen ta konxeba es pa kel nómi.
Na un runion di grupu enkaregadu di óbra na ténpu di apóstlus, kes ómi fiel intende dretu ma kristons debe ser un povu pa nómi di Deus. (Odja parágrafu 5.)
6-7. (a) Pamodi ki Jizus ben pa téra? (b) Kal ki é razon más inportanti ki poi Jizus ta ben pa téra?
6 Nómi di Jizus ta siginifika “Jeová é salvason,” i Jeová uza Jizus pa salva tudu algen ki mostra fé na el i na se Fidju. Jizus ben pa téra pa da se vida pa nos. (Mat. 20:28) Pamodi Jizus paga resgati, nos pekadu ta purduadu i nu ta pode ten xansi di ten vida pa tudu ténpu otu bês. — Juan 3:16.
7 Pamodi ki nu meste di resgati? É pamodi kuzê ki kontise na jardin di Éden. Sima nu pâpia na kel studu ki pasa, nos primeru pai ku mai, Adon ku Eva, rabela kóntra Jeová i es perde xansi di vive pa tudu ténpu. (Jén. 3:6, 24) Má, tinha un kuza más inportanti di ki salva kes fidju di Adon ku Eva. Satanás konta un grandi mintira sobri Jeová. (Jén. 3:4, 5) Kes fidju di Adon ku Eva meste sabe ma Jeová ka faze nada di mariadu i ma se nómi é santu. Dja ki Jizus ta reprizenta Jeová i el ten Se nómi, el kunpri un papel txeu inportanti na santifika nómi di Jeová.
Modi ki un algen pode fla ma el ta sigi Kristu si el ka konxe ô el ka ta uza nómi di Deus?
8. Kuzê ki tudu sigidor di Jizus meste rekonhese?
8 Tudu sigidor di Jizus, tantu kes judeu i kes algen di nason, meste rekonheseba ma ses salvason ta ben di Pai di Jizus, ki é Jeová Deus. (Juan 17:3) Alén di kel-li, sima Jizus es ta sérba konxedu pa nómi di Jeová. Tanbê es tinha ki intendeba modi ki éra inportanti santifika kel nómi. Ses salvason ta dipendeba di kel-li. (Atus 2:21, 22) Nton, tudu sigidor fiel di Jizus meste prende sobri Jeová i sobri Jizus. Nu ka ta fika dimiradu pamodi ki Jizus tirmina se orason ki sta na Juan kapitlu 17 ku kes palavra li: “N pô-s ta konxe bu nómi i N ta kontinua ta pô-l konxedu, asi pa es mostra pa otus algen kel mésmu amor ki bu mostra pa mi, i ami pa N sta unidu ku es.” — Juan 17:26.
“ANHOS É NHAS TISTIMUNHA”
9. Modi ki nu pode mostra ma nómi di Jeová é inportanti pa nos?
9 Sima dja nu odja, tudu sigidor di Jizus debe santifika nómi di Jeová. (Mat. 6:9, 10) Nómi di Jeová debe ser kel nómi más inportanti pa nos. Nu meste mostra kel-li pa manera ki nu ta vive. Nton, kuzê ki nu pode faze pa santifika nómi di Jeová i prova ma kuzê ki Satanás fla é mintira?
10. Sobri kuzê ki Isaías 42 ti 44 ta pâpia di el? (Isaías 43:9; 44:7-9) (Odja dizenhu ku fotus.)
10 Na Isaías 42 ti 44 nu ta prende sobri kuzê ki nu pode faze pa santifika nómi di Jeová. Kes kapitlu li ta pâpia di un julgamentu sima na un tribunal. Jeová ta pidi kes algen ki ka ta adora-l pa prova ma ses deus ta izisti. Sima na un kazu na tribunal, el ta pergunta si ten algun tistimunha ki pode prova kel-li. Má, ka ten ninhun tistimunha! — Lé Isaías 43:9; 44:7-9.
Na tudu kuza ki nu ta fla i ki nu ta faze nu ta prova ma ka ten ninhun otu Deus alén di Jeová. (Odja parágrafus 10-11.)
11. Kuzê ki Jeová fla se povu na Isaías 43:10-12?
11 Lé Isaías 43:10-12. Jeová fla kel-li sobri se povu: ‘Anhos é nha tistimunha, ... i ami é Deus.’ Jeová pidi-s pa es responde kel pergunta li: ‘Ten otu Deus alén di mi?’ (Isa. 44:8) Má, nu ten priviléjiu di responde kel pergunta li. Pa kuzas ki nu ta fla i ki nu ta faze, nu pode prova ma Jeová é kel úniku Deus verdaderu. Se nómi sta riba di kalker otu nómi. Nu ta prova pa nos manera di vive ma nu ta ama Jeová di verdadi i ma nos é lial pa el, sikrê Satanás bira kel-li difísil. Di kel manera li, nu ten oportunidadi di djuda na santifika Se nómi.
12. Modi ki kel profesia ki sta na Isaías 40:3, 5 kunpri?
12 Óras ki nu ta difende nómi di Jeová ô se reputason, nu sta ta imita Jizus Kristu. Isaías tanbê dja flaba ma un algen ta ben ‘priparaba kaminhu pa Jeová.’ (Isa. 40:3) Modi ki kel-li kunpri? Juan Batista pripara kaminhu pa Jizus, ki ben na nómi di Jeová i el pâpia na nómi di Jeová. (Mat. 3:3; Mar. 1:2-4; Luk 3:3-6) Kel profesia ta fla: ‘Glória di Jeová ta ben mostradu’. (Isa. 40:5) Modi ki kel-li kontise? Kantu ki Jizus ben pa téra, el reprizenta Jeová di manera perfeitu ki éra sima si própi Jeová binha pa téra. — Juan 12:45.
13. Modi ki nu pode imita Jizus?
13 Sima Jizus nos é tistimunhas di Jeová. Nu ta leba nómi di Jeová i nu ta pâpia ku tudu algen ki nu atxa sobri kes kuza bunitu ki el ta faze. Má, pa nu ser un bon tistimunha di Jeová tanbê nu ten ki dexa pesoas sabe sobri tudu kel ki Jizus faze pa santifika nómi di Jeová. (Atus 1:8) Jizus é kel midjór Tistimunha di Jeová i nu ta sigi se izénplu. (Apo. 1:5) Má kuzê ki nómi di Jeová ta siginifika pa kada un di nos?
KUZÊ KI NÓMI DI JEOVÁ SIGINIFIKA PA NOS
14. Sima sta na Salmo 105:3, modi ki nu ta xinti sobri nómi di Jeová?
14 Nu ten orgulhu di nómi di Jeová. (Lé Salmo 105:3.) Jeová ta fika txeu kontenti óras ki nu ta xinti orgulhu di se nómi. (Jer. 9:23, 24; 1 Kor. 1:31; 2 Kor. 10:17) Nu ta xinti ma é un ónra pa nos fla otus algen ma Jeová é santu i ma tudu kuza ki el ta faze é dretu. Nunka nu ka debe xinti vergónha di fla nos koléga di trabadju, koléga di skóla, nos vizinhu i otus algen ma nos é Tistimunhas di Jeová! Satanás krê pa nu para di pâpia sobri nómi di Jeová pa otus algen. (Jer. 11:21; Apo. 12:17) Na verdadi, Satanás i kes algen ki ta spadja mintiras krê pa pesoas skese nómi di Jeová. (Jer. 23:26, 27) Má, nos amor pa nómi di Jeová ta pô-nu ta fika kontenti ‘dia interu’. — Sal. 5:11; 89:16.
15. Kuzê ki ta siginifika invoka nómi di Jeová?
15 Nu ta kontinua ta invoka nómi di Jeová. (Joel 2:32; Rom. 10:13, 14) Invoka nómi di Jeová ta involve más di ki sô konxe i uza se nómi. Nu ten ki konxe manera di ser di Deus, kunfia na el i pidi se ajuda i se orientason. (Sal. 20:7; 99:6; 116:4; 145:18) Invoka nómi di Jeová tanbê krê fla pâpia ku otus algen sobri Se nómi i ses kualidadi bunitu, i nu ta djuda-s faze mudansa na ses vida pa es pode agrada-l i pa es pode salva ses vida. — Isa. 12:4; Atus 2:21, 38.
16. Modi ki nu pode prova ma Satanás é mintirozu?
16 Nu sta dispostu na sufri pamodi nómi di Jeová. (Tia. 5:10, 11) Óras ki nu ta mante nos lialdadi pa Jeová mésmu ta sufri, nu ta prova ma Satanás é mintirozu. Na ténpu di Jó, Satanás akuza tudu sérvus di Jeová. El fla: “Ómi ta da tudu kuza ki el ten pa se vida.” (Jó 2:4) Satanás fla ma pesoas ta sirbi Jeová sô óras ki kuzas sta ta bai dretu na ses vida, i si es pasa pa difikuldadis, es ta para di sirbi Jeová. Jó prova ma kel-li é mintira. Di mésmu manera, nu ten priviléjiu di prova ma ka ta inporta kuzê ki Satanás pô-nu ta pasa pa el, nunka nu ka ta bandona Jeová. Nu pode ten serteza ma Jeová ta kontinua ta kuida di nos pamodi se nómi. — Juan 17:11.
17. Sima sta na 1 Pedru 2:12, kal ki é otu manera ki nu pode da nómi di Jeová glória?
17 Nu ta mostra ruspetu pa nómi di Jeová. (Prov. 30:9; Jer. 7:8-11) Pamodi nu ta reprizenta Jeová i nu ta leba se nómi, nu pode da se nómi glória ô dizonra-l. (Lé 1 Pedru 2:12.) Pur isu, nu krê faze tudu kel ki nu ta pode pa da nómi di Jeová ónra através di kuzas ki nu ta fla i ki nu ta faze. Di kel manera li, nu ta faze nos midjór pa da se nómi glória sikrê nos é inperfeitu.
18. Di ki otu manera nu pode prova ma nómi di Jeová é inportanti pa nos? (Odja nóta di rodapé.)
18 Nu ta onra nómi di Jeová ka ta inporta kuzê ki pesoas ta pensa di nos. (Sal. 138:2) Pamodi ki kel-li é inportanti? Pamodi óras ki nu ta faze kuzas ki Jeová gosta, txeu bês alguns algen pode ka fika kontenti i es pode fla kuzas mariadu sobri nos.a Jizus staba dispostu na móre sima un kriminozu pa el pode onraba nómi di Jeová. El ‘ka liga pasa vergónha’ pamodi el ka staba preokupadu dimás ku kuzê ki otus algen ta pensaba sobri el. (Ebr. 12:2-4) El konsentra na faze vontadi di Deus. — Mat. 26:39.
19. Kuzê ki bu ta xinti pa nómi di Jeová i pamodi?
19 Nu ten orgulhu di nómi di Jeová i nu ta xinti onradu di ser txomadu Tistimunhas di Jeová. Dja ki nómi di Jeová é inportanti pa nos, nu ta kontinua ta lova-l sikrê otus algen dispreza-nu. Nómi di Jeová é más inportanti pa nos di ki kuzê ki pesoas ta pensa di nos. Pur isu, nu sta disididu na kontinua ta lova nómi di Jeová ka ta inporta kuzê ki Satanás faze kóntra nos. Di kel manera li, nu ta prova ma nómi di Jeová é txeu inportanti pa nos sima é pa Jizus.
KÁNTIKU 10 Nu lova nos Deus Jeová!
a Ti mésmu Jó, ki éra un ómi fiel, kumesa ta fika preokupadu dimás ku kuzê ki pesoas ta pensaba di el, kantu três ómi fla ma el faze algun kuza mariadu. Na komésu, kantu el perde ses fidju i tudu kuza ki el tinha ‘Jó ka peka i nen el ka kulpa Deus di faze algun kuza mariadu.’ (Jó 1:22; 2:10) Má, kantu Jó akuzadu di faze algun kuza mariadu, el kumesa ta ‘pâpia sen pensa.’ El kumesa ta difende se reputason envês di santifika nómi di Deus. — Jó 6:3; 13:4, 5; 32:2; 34:5.