“Géra é di Jeová”

Tudu kumesa na fin di anus 90, kantu govérnu di Fransa pidi pa filial di Fransa paga un inpostu injustu pamodi kes kontribuison ki el resebe entri anu di 1993 i 1996. Nu djobe justisa na kes tribunal di Fransa, má nu ka tevi ninhun rezultadu. Dipôs ki es nega nos pididu na tribunal, govérnu blokia uns 500 mil kontu (más di 4,5 milhon di euru ô $6.300.000 dóla) ki staba na kónta di filial. Nos últimu speransa éra Tribunal di Europa pa Direitus di Ómi. Má antis di analiza nos kazu, Tribunal di Europa pa Direitus di Ómi pidi pa nu faze un runion ku kes adivogadu di govérnu djuntu ku un reprizentanti di tribunal. Obijetivu di kel runion é pa nu txigaba na un akordu antis di lebaba nos kazu pa julgamentu.

Nu ta atxaba ma kel reprizentanti di tribunal ta ba fazeba nos preson pa nu paga un párti di kel valor ki govérnu di Fransa staba ta pidi-nu asi pa rezolveba kel prubléma. Má, nu odja klaru ma sikrê nu pagaba un euru, nu staba ta bai kóntra prinsípius di Bíblia. Irmons ku irmans faze kes kontribuison pa apoia trabadju di Reinu, pur isu kes kontribuison ka éra di govérnu. (Mat. 22:21) Má simé, pamodi ruspetu pa kes régra di tribunal nu parse na kel runion.

Nu faze kel runion na un di kes sala bunitu di tribunal. Kel runion ka kumesa dretu. Kel reprizentanti di tribunal kumesa ta fla ma Tistimunhas di Jeová debe pagaba un párti di kel inpostu ki govérnu di Fransa ta izijiba. Dirapenti nu tevi un ideia i nu pergunta-l: “Nha sabe ma govérnu dja blokia-nu más di 4,5 milhon di euru ki staba na nos kónta na banku?”

El fika spantadu. Kantu kes adivogadu di govérnu fla-l kuzê ki es faze, se atitudi muda konpletamenti. El reprende-s i el tirmina kel runion kel óra. N da kónta ma éra Jeová ki muda modi ki es trata kel kazu di un manera ki nunka nu ka ta imajinaba. Nu sai di la txeu kontenti i dimiradu ku kuzê ki kontise.

Na dia 30 di junhu di 2011, Tribunal di Europa pa Direitus di Ómi fla ma nu ganha kel kazu. Tribunal fla ma éra ilegal es pidi kel inpostu i ma govérnu debe daba filial di Fransa kel dinheru otu bês i pagaba kes juru! Kel disizon inportanti li sta proteje adorason puru na Fransa ti dia di oji. Kel úniku pergunta ki nu ka priparaba pa faze, foi sima kel pédra ki da na kabésa di Gulias. Kel-li pô-nu ta ganha kel géra. Pamodi ki nu konsigi ganha? Pamodi, sima Davidi fla Gulias, “géra é di Jeová.” — 1 Sam. 17:45-47.

Kel-li é ka úniku bês ki nu ganha vitória na tribunal. Ti oji, sikrê ku opozison di govérnus ku relijion, Tistimunhas di Jeová dja ganha 1.225 kazu na kes tribunal más altu di 70 país i na txeu tribunal internasional. Kes vitória li ta proteje nos direitu prinsipal sima, direitu legal di ten un relijion, direitu di partisipa na trabadju di pregason, direitu di ka partisipa na atividadis ki ta da ónra pa un país i di nega sangi.

Modi ki N partisipa na un kazu na tribunal na Europa, si N staba ta sirbi na Sédi Mundial di Tistimunhas di Jeová na Nova York, na Mérka?

ZELU DI NHA PAI KU NHA MAI KI ÉRA MISIONÁRIU DJUDA-M

Nha pai txomaba George i nha mai Lucille. Es forma na turma 12 di Skóla di Jiliádi i es ba sirbi na Itiópia, undi ki N nase na anu di 1956. Es pô-m nómi di Filipi, pamodi kel pregador di notísias sábi di primeru séklu. (Atus 21:8) Na kel otu anu govérnu proíbi trabadju di Tistimunhas di Jeová. Enbóra mi éra pikinoti, N ta lenbra di nha família ta sirbi Jeová di manera sukundidu. Dja ki mi éra mininu, N ta atxaba kel-li un kuza sábi! Infilismenti, autoridadis obriga-nu sai di kel país na anu di 1960.

Kantu nos família ba mora na Wichita, na Kansas, na Mérka, nha pai ku nha mai leba un kuza txeu spesial ku es ki é kel amor ki es tinha pa pregason sima kantu es éra misionáriu. Es tevi três fidju: ami, nha irman más grandi ki txoma, Judy, i nha irmon más novu ki txoma, Leslie. Nos tudu nu nase na Itiópia. Es ta amaba Jeová i es ta sirbiba el di tudu ses korason, i es inxina-nu faze mésmu kuza. N batiza ku 13 anu. Três anu dipôs, nos família muda pa undi ki tinha más nisisidadi, na Arequipa, na Peru.

Na anu di 1974 kantu N tinha 18 anu, filial di Peru dizigina ami i más kuatu irmon pa ser pioneru spesial. Nu ba prega na kes montanha di Andes, na kes tiritóriu undi ningen ka pregaba la antis. Kel-li ta inkluiba pregaba pa kes algen ki ta papiaba kêxua i aimará. Nu tinha un karu ki nu ta viajaba na el i nu ta moraba na el. Nu ta txomaba el di Arka pamodi el ta parseba ku un kaxa grandi. N gosta di lenbra di kel ténpu ki N ta uzaba Bíblia pa mostra kes algen di povu indíjina ma ka ta dura Jeová ta ben kaba ku pobréza, duénsa i mórti. (Apo. 21:3, 4) Txeu di es bira Tistimunhas di Jeová.

N DIZIGINADU PA TRABADJA NA SÉDI MUNDIAL

Na anu di 1977, irmon Albert Schroeder, ki éra ménbru di Grupu Enkaregadu di Óbra di Tistimunhas di Jeová, vizita Peru. El inkoraja-m pa N prenxe pitison pa sirbi na Betel na Sédi Mundial. I N faze kel-li. Lógu dipôs, na dia 17 di junhu di 1977, N kumesa ta sirbi na Betel di Brooklyn. N trabadja na Dipartamentu di Linpéza i di Manutenson duránti uns kuatu anu.

Na junhu di 1978, N konxe Elizabeti Avallone na un kongrésu internasional na Nova Orleans, na Louisiana. Sima mi, se mai ku se pai, ta sirbiba Jeová di tudu korason i es inxina-l faze mésmu kuza. Elizabeti dja tinha kuatu anu na sirvisu di pioneru fíksu i el krê sirbiba Jeová pa ténpu interu pa réstu di se vida. Nu kontinua ta konxe kunpanheru i ku ténpu nu paxona. Nu kaza na dia 20 di otubru di 1979 i nu kumesa ta sirbi na Betel djuntu.

Nos irmons ku irmans di nos primeru kongregason, Brooklyn Spanhol, ta amaba nos txeu. Ku ténpu, nu sirbi na más três kongregason ki resebe-nu ku amor i djuda-nu na nos sirvisu di Betel. Tanbê nu ten txeu gratidon pa nos família i amigus ki djuda-nu kuida di nos mai ku nos pai ki dja staba algen grandi.

N TRABADJA NA DIPARTAMENTU DI LEI

Pa nha surpréza, na janeru di 1982 N diziginadu pa sirbi na Dipartamentu di Lei na Betel. Três anu dipôs irmons pergunta-m si N krê fazeba kursu di direitu, asi pa N pode biraba un adivogadu. Duránti nha kursu N fika dimiradu di diskubri ma txeu direitu inportanti ki pesoas ten na Mérka i na mundu interu, é pamodi kes vitória ki Tistimunhas di Jeová tevi na tribunal. Ta studadu txeu sobri kes kazu li na skóla.

Na anu di 1986 kantu N tinha 30 anu, N diziginadu pa ser enkaregadu di Dipartamentu di Lei. N xinti filís pamodi Betel kunfia na mi dja ki mi éra jóven inda. Má tanbê, N xinti pézu di responsabilidadi pamodi tinha txeu kuza ki N ka sabia i nha diziginason ka ta ba sérba fásil.

N bira adivogadu na anu di 1988, má N ka daba kónta modi ki skóla afeta-m txeu i prujudika nha amizadi ku Jeová. Kursu pode pô-u ta bira un algen orgulhozu i ta xinti ma bo é más midjór di ki otus algen ki ka ten mésmu skóla ki bo. Elizabeti djuda-m txeu. El djuda-m faze kes kuza ki N ta fazeba antis pa biraba nha amizadi ku Jeová más fórti. Kel-li leba ténpu, má poku-poku N bira más amigu di Jeová otu bês. N sabe pa nha própi spiriénsia ma ten txeu konhisimentu é ka kel kuza más inportanti na vida. Kuzê ki é más inportanti na vida é ten un amizadi fórti ku Jeová, i txeu amor pa el i pa se povu.

N DIFENDE KES NÓTISIA SÁBI NA FRENTI DI AUTORIDADIS

Dipôs di tirmina kursu di direitu, N kumesa ta konsentra na djuda nos dipartamentu kuida di asuntus sobri lei na Betel, i proteje organizason di Jeová i nos direitu di prega notísias sábi. Nha trabadju éra sábi dimás, má tanbê tinha dizafius pamodi kuzas staba ta muda faxi na nos organizason. Pur izénplu, antis nu tinha kustumu di pidi kontribuison pa nos publikason. Má, na komésu di anus 1990, irmons pidi orientason pa Dipartamentu di Lei, sobri modi ki es ta paraba di pidi kontribuison. Dipôs Tistimunhas di Jeová kumesa ta oferese publikasons sen pidi kontribuisons. Kel-li bira trabadju na Betel i na kanpu más fásil. Ti oji el ta proteje nos trabadju kóntra prubléma di paga inpostu. Alguns algen pensa ma kel mudansa li ta ben poba nos ta ten ménus kontribuison, i pur isu nu ta ben djudaba poku algen prende sobri Jeová. Má é ka kel-li ki kontise. Désdi 1990 nunbru di pesoas ki bira Tistimunhas di Jeová bira mutu más txeu, i gósi pesoas pode prende sobri Bíblia sen paga nada. N odja ma é sô ku forsa ki Jeová ta da i ku orientason ki el ta da através di skravu fiel ki kel-li i txeu otus mudansa na organizason pode ten bons rezultadu. — Ézu. 15:2; Mat. 24:45.

É ka sô pamodi nu ten bons adivogadu ki nu ta ganha kazus na tribunal. Txeu bês, kuzê ki ta poi kes algen ki ten autoridadi ta djuda-nu é pamodi kel bon konportamentu di povu di Jeová. N odja un izénplu di kel-li na anu di 1998 kantu três irmon di Grupu Enkaregadu di Óbra i ses mudjer sisti un kongrésu spesial na Kuba. Bondadi i ruspetu ki es mostra djuda na konvense kes autoridadi ma nu ka ta mete na asuntus di pulítika más di ki kalker kuza ki nu flaba na kes runion ki nu faze ku es.

Má óras ki es ta nega-nu nos direitu, nu ten ki difende kes notísia sábi na frenti di autoridadis na tribunal. (Flp. 1:7) Pur izénplu, duránti txeu anu autoridadis na Europa i na Koreia di Sul ka ta daba nos direitu di nega bai pa trópa. Pamodi kel-li, uns 18 mil irmon na Europa i más di 19 mil irmon na Koreia di Sul pasa algun ténpu na kadia pamodi ses konsénsia ka ta dexa-s bai trópa.

Na dia 7 di julhu di 2011, Tribunal di Europa pa Direitus di Ómi toma un disizon na kel kazu ki ta involveba Bayatyan i Arménia. El disidi ma tudu tribunal na Europa debe dexa kes algen ki ka ta bai trópa pamodi ses relijion faze otu trabadju pa djuda ses país. Dipôs na dia 28 di junhu di 2018, tribunal na Koreia di Sul toma un disizon sima kel-li. Nu ka ta konsigi tinha ninhun di kes vitória li si nos irmons jóven ka manteba ses lialdadi na ka bai trópa.

Kes dipartamentu di lei na Sédi Mundial i na kes otu Betel na mundu interu sta ta trabadja sen para pa difende nos direitu di adora Jeová i di prega kes notísia sábi. Pa nos é un ónra reprizenta nos irmon ku irmans ki ta lida ku opozison di govérnu. Sikrê óras ki nu ka ta ganha un kazu na tribunal, nu sta ta da tistimunhu pa kes governanti, kes rei i pa kes nason. (Mat. 10:18) Kes juís, reprizentantis di govérnu, meius di kumunikason i otus algen ta odja kes testu di Bíblia ki nu ta poi na kes dukumentu i óras ki nu ta pâpia na tribunal. Kes algen ki é sinseru ta fika ta sabe ken ki é Tistimunhas di Jeová i kuzê ki nu ta kridita na el. Alguns di kes algen li ta bira Tistimunhas di Jeová.

OBRIGADU JEOVÁ!

Na kes últimu 40 anu ki pasa, N tevi priviléjiu di djuda na asuntus di lei ku kes Betel na mundu interu, i di sta na txeu tribunal inportanti i dianti di txeu algen ki ten autoridadi. N ta ama i N ta dimira txeu nhas irmon ki ta trabadja djuntu ku mi na Dipartamentu di Lei di Sédi Mundial i na kes dipartamentu di lei na mundu interu. N ten un vida filís i ku txeu benson.

Elizabeti mostra-m txeu amor i lialdadi, pamodi el djuda-m duránti kes 45 anu li, na ténpu sábi i na ténpu kasábi. N ta dimira-l pamodi el faze kel-li sikrê ku un duénsa ki ta pô-l ta perde forsa.

Na nos vida nu prende ma forsa i vitória ka ta ben di nos kapasidadi. Sima Davidi fla: ‘Jeová é un forsa pa se povu’. (Sal. 28:8) Nu ka ten dúvida ma “géra é di Jeová.”