Irmons ta difende liberdadi di ten un relijion na kes povu indíjina

Senténas di milhons di algen ta vive na Mérka Latina. I milhons di es é di povu indíjina ki ten ses própi língua i kustumu. Txeu di kes algen li é nos irmons ku irmans i es ta da txeu valor pa ses kultura. Es ta traduzi i distribui publikasons di Tistimunhas di Jeová na más di 130 língua indíjina ki ta papiadu na Mérka Latina, asi pa djuda kes algen di la prende verdadi ki sta na Bíblia.a Má alguns di es ta pasa pa opozison pamodi es ta skodje sirbi Jeová i es ta nega partisipa na kes kustumu di kes lugar, ki ka sta di akordu ku Bíblia. Modi ki kes kontribuison ki bu ta faze sta ta uzadu pa djuda-s?

Es djudadu volta pa kaza

Nos irmons di povu Huichol, ki ta fika na montanhas di stadu di Jalisco na Méxiku, ku ruspetu nega partisipa na kes kustumu di relijion ki ka sta di akordu ku Bíblia.b Má txeu algen di kel povu fika xatiadu ku es. Na dia 4 dizenbru di 2017, un monti di algen ataka ku violénsia un grupu di Tistimunhas di Jeová i otus algen ki staba ku es. Kes algen pô-s pa fóra di kel zóna, es distrui ses propriadadi i es amiasa-s di mórti si es tenta torna volta pa la.

Uns Tistimunha di Jeová di otu sidadi da kes irmon kuzê ki es mesteba na kel momentu. Má kuzê ki fazedu pa djuda-s volta pa kaza? Un irmon, ki txoma Agustín, fla: “Nu ka tinha dinheru ki ta txigaba pa nu ranja un adivogadu i nu ka sabia undi ki nu ta baba pa nu dadu orientason sobri nos direitu.”

Dja ki liberdadi di nos irmons di adora Deus staba na prigu, filial di Mérka Sentral aji lógu. Primeru, irmons di filial pidi autoridadis di kel zóna pa analiza kes krimi. Dipôs, Kumison di Kordenadoris di Grupu Enkaregadu di Óbra di Tistimunhas di Jeová aprova pa es trabadja djuntu ku Dipartamentu di Leis na Sédi Mundial. Abridu un prosésu na nómi di nos irmons di povu Huichol. Dipôs kel kazu lebadu pa Tribunal Más Altu di Méxiku.

Un ekipa di adivogadus di paízis diferenti trabadja djuntu pa difende nos irmons. Es splika di manera klaru ma sima otus algen meste ruspeta kultura di povu indíjina, kes povu indíjina tanbê meste ruspeta i proteje liberdadi di kes algen ki ta faze párti di ses povu. Tudu algen ten direitu, ka ta nporta di undi ki es é.

Na dia 8 di julhu di 2020, Tribunal Más Altu di justisa toma disizon pa ladu di Tistimunhas di Jeová. Tribunal fla ma tudu kes algen ki podu fóra di ses propriadadi tinha direitu di volta pa la otu bês. Agustín, ki dja nu papiaba di el antis, pâpia sobri modi ki el i otus algen xinti txeu gratidon: “Nu sta txeu kontenti i nu ta agradese di korason kuzê ki nos irmons faze pa nos. Si es ka djudaba nos nu ka tinha nada faze.”

‘Fazedu txeu pa poku algen’

Kontise mésmu kuza ku nos irmons ki ta mora na San Juan di Ilumán, ki é un zóna na Ekuador undi ki ta mora txeu algen indíjina di Vali di Otavalo. Na anu 2014, es dadu aprovason pa faze un Salon di Reinu i es kumesa konstruson. Má un saserdóti bai ku un grupu ku más di 100 algen i es obriga irmons para konstruson. I Tistimunhas di Jeová proibidu di faze runion na kel zóna.

Kes dipartamentu di leis di filial di Ekuador i di sédi mundial trabadja djuntu pa difende kel kongregason, asi pa es ka perde ses liberdadi di adora Deus. Irmons leba kel asuntu li pa tribunal. Pamodi kel-li, kes algen di kel zóna para di pirsigi nos irmons. Nton, irmons kumesa ta sisti runion otu bês i es tirmina di faze kel Salon di Reinu. Má pa proteje direitus di nos irmons na futuru, kes irmons ki staba ta reprizenta nos organizason pidi kes Tribunal Más Altu pa disidi sobri kel asuntu inportanti li: kes povu indíjina meste ruspeta kes direitu di algen na mundu interu?

Na dia 16 di julhu di 2020, kel Tribunal Más Altu di Ekuador obi kel kazu. É kes irmon ki é adivogadu na Ekuador ki difende kongregason. Alén di kel-li, kuatu irmon di país diferenti, ki é adivogadu i ki ten spiriénsa na difende kazus na otus país, pâpia na Tribunal. Pamodi COVID-19 es pâpia ku kunpanheru através di vídiu. Kel-li foi primeru bês ki un tribunal dexa un ekipa di adivogadus, ki ta reprizenta Tistimunhas di Jeová na mundu interu, difende nos irmons di kel manera li.c Kel ekipa pâpia sobri kuzê ki otus autoridadi di lei na otus país dja flaba, ki mostra ma kes algen indíjina ka ta dizisti di ses direitu sô pamodi es é di un povu indíjina.

Nos irmons di Vali di Otavalo tene gana di sabe ki disizon ki Tribunal Más Altu ta toma. Má simé timenti es sta ta spéra, es ta xinti txeu gratidon pa ajuda ki irmons da-s. Un ansion, ki txoma César, di kongregason Quichua di Ilumán, fla: “É sô Jeová i se organizason ki ta faze txeu pa poku algen.”

Tudu kes adivogadu ki sta ta difende kes kazu li é Tistimunha di Jeová, i es ta fika kontenti di difende nos irmons sen kobra nada. Má simé, es ta gasta ténpu i dinheru pa abri kes prosésu i pa pripara pa difende nos irmons na tribunal. Nos adivogadus i otus irmons gasta más di 380 óra pa pripara próvas pa difende nos irmons. I gastadu más 240 óra ta traduzi dukumentus pa kes algen di Méxiku. I kuazi 40 adivogadu di paízis diferenti gasta un monti óra na kel kazu di Ekuador. Modi ki nu ta konsigi paga tudu kes dispéza pa difende nos irmons? Através di kes kontribuison ki bu ta faze na kes manera ki bu ta atxa na site donate.jw.org. Obrigadu pa kes kontribuison ki bu ta faze di korason.