Modi ki bu pode midjora bus orason?

1-2. (a) Kuzê ki pode ka dexa-nu abri nos korason pa Jeová? (b) Modi ki nu sabe ma Jeová ta obi nos orason ku atenson?

ALVÊS bu ta xinti ma bu ta ripiti kes mésmu kuza na orason má bu ka ta fla Jeová tudu kuza ki bu sta xinti? Si sin, bu ka sta bo sô. Pamodi nos tudu ta sta txeu okupadu, alvês nu ten tendénsia di faze orason ku présa. Ô talvês nu ta atxa difísil pâpia ku Jeová pamodi nu ta xinti ma nu ka merese pâpia ku el.

² Bíblia ta da-nu serteza ma kuzê ki ta inporta pa Jeová é ka si nu sta ta uza palavras bunitu, má é si nos orason ta ben di korason. El ta obi ‘pididu di kes algen mansu’. (Sal. 10:17) El ta obi ku atenson kada palavra ki nu ta fla pamodi el ta inporta ku nos. — Sal. 139:1-3.

3. Ki perguntas nu ta ben responde na kel studu li?

³ Na kel studu li, nu ta ben odja respósta pa kes pergunta li: Pamodi ki nu ka meste xinti medu di ora pa Jeová? Modi ki nu pode ora di manera ki ta pô-nu ta bira más amigu di Jeová? Modi ki pensa na kes orason di korason ki sérvus di Jeová faze ki sta na Bíblia ta djuda-nu midjora nos orason? I kuzê ki nu pode faze si nu sta preokupadu dimás i nu ka sabe kuzê ki nu ta fla Jeová na orason?

KA BU XINTI MEDU DI ORA PA JEOVÁ

4. Kuzê ki pode djuda-nu ka xinti medu di ora pa Jeová? (Salmo 119:145)

⁴ Óras ki nu ta intende ma Jeová é un amigu lial ki krê kuzê ki é midjór pa nos, nu ta xinti avontádi na ora pa el. Kel skritor di Salmo 119 tenta odja Jeová di kel manera li kantu el ta oraba pa el. El pasa pa alguns prubléma na vida. Alguns algen konta mintira sobri el. (Sal. 119:23, 69, 78) Tanbê el tinha ki lidaba ku se própi inperfeison. (Sal. 119:5) Má simé, el ka xinti medu di abri se korason pa Jeová. — Lé Salmo 119:145.

5. Pamodi ki nu ka debe dexa sentimentus negativu inpidi-nu di ora? Da un izénplu.

⁵ Jeová krê ti pa kes algen ki faze pekadus gravi ora pa el. (Isa. 55:6, 7) Pur isu, nu ka debe dexa sentimentus negativu inpidi-nu di ora. Pur izénplu, un pilotu di avion sabe ma el pode pâpia ku kes algen ki ta trabadja na kontrola avion sénpri ki el meste di ajuda. Má kuzê ki ta kontiseba si kel pilotu xintiba vergónha di pidi ajuda pamodi el perde ô el da un fadja? Di serteza ta kontiseba un dizastri! Di mésmu manera, sikrê alvês nu ka sabe kuzê ki nu ta faze ô nu faze un pekadu, nu ka debe xinti medu di ora pa Jeová. — Sal. 119:25, 176.

MODI KI NU PODE ORA DI MANERA KI TA PÔ-NU TA BIRA MÁS AMIGU DI JEOVÁ?

6-7. Kuzê ki pode djuda-nu pâpia ku Jeová na orason sobri kuzê ki nu sta xinti? Da un izénplu. (Odja nóta di rodapé.)

⁶ Óras ki nu ta fla Jeová kuzê ki nu ta pensa i nu ta xinti, nu ta bira más se amigu. Nton, kuzê ki nu pode faze pa nu ora di kel manera li?

⁷ Pensa na kes kualidadi di Jeová.a Kantu más nu pensa na ses kualidadi, más nu ta konsigi fla kuzê ki nu ta pensa i xinti. (Sal. 145:8, 9, 18) Odja izénplu di Kristina, ki é un irman ki se pai éra violéntu. El fla: “Pâpia ku Jeová sima un Pai ka éra fásil pa mi. N ta xintiba ma pamodi nhas inperfeison, el ta ba bandonaba mi.” Ki kualidadi di Jeová djuda-l? El fla: “Amor lial di Jeová pô-m ta xinti suguru. Gósi N sabe ma sénpri el ta sta di nha ladu. Sikrê N faze alguns éru, simé el ta kontinua ta ama-m i el ta djuda-m. Kel-li djuda-m pâpia ku el sobri kes kuza ki ta pô-m filís i kes kuza ki ta pô-m tristi.”

8-9. Pamodi ki é bon pensa na kuzê ki nu krê fla antis di ora? Da un izénplu.

⁸ Pensa na kuzê ki bu ta fla. Antis di bu ora bu pode pensa na alguns pergunta. Pur izénplu: ‘Ki prubléma N sta ta pasa pa el gósi li? Ten algun algen ki N meste púrdua? N sta ta pasa pa algun prubléma novu ki N meste di ajuda di Jeová pa N lida ku el?’ (2 Reis 19:15-19) Tanbê, nu pode sigi izénplu di Jizus óras ki nu ta pensa na kuzê ki nu pode pidi Jeová sobri Se nómi, Se Reinu i Se vontadi. — Mat. 6:9, 10.

⁹ Kantu un irman ki txoma Aliska fika ta sabe ma se maridu tinha un kánser na sérbru, el atxa difísil faze orason. El fla: “N fika tantu angustiadu ki N atxa difísil pensa na kuzê ki N ta flaba na orason.” Kuzê ki djuda-l? El fla: “N tra alguns momentu antis di N faze orason pa N pensa na kuzê ki N ta flaba Jeová. I kel-li djuda-m ka faze orason sô sobri mi i duénsa di nha maridu. Kantu N faze kel-li, N xinti kalmu i N konsigi pâpia ku Jeová sobri kuzas diferenti.”

10. Pamodi ki nu debe sforsa pa faze orason sen présa? (Odja imajen.)

¹⁰ Faze orason sen présa. É verdadi ma kes orason pikinoti pode djuda-nu bira amigu di Jeová. Má óras ki nu ta tra ténpu pa nu faze orason más kunpridu nu ta konsigi fla Jeová más dretu modi ki nu sta xinti.b Elias,c ki é maridu di Aliska, fla: “N ta tenta faze orason txeu bês duránti dia i N ta xinti más amigu di Jeová óras ki N ta tra ténpu pa N faze orason más kunpridu. Jeová ka ta perde paxénxa ta spera-m tirmina nha orason. Pur isu, N pode dura ténpu ki N meste.” Tenta faze kel-li: ranja ténpu i un lugar pa bu ora, talvês ti ku vós altu i sen distrason. Sforsa pa faze orason di kel manera li sénpri.

PENSA NA KES ORASON DI KORASON KI STA NA BÍBLIA

11. Modi ki pensa na kes orason di korason ki sta na Bíblia pode djuda-u? (Odja kuadru “Bu ta xinti sima es?”)

¹¹ Kuzê ki pode djuda-nu é pensa na kes orason di korason i na kes múzika pa lova Jeová ô kes Salmu, ki sta na Bíblia. Óras ki bu odja modi ki sérvus di Jeová pâpia di ses sentimentu, bu ta xinti más motivadu na abri bu korason pa Jeová. Tanbê, kes orason li pode djuda-u atxa más kuza ki bu pode fla na bus orason. I talvês bu ta atxa orason di sérvus di Jeová ki xinti mésmu kuza ki bo i ki pidi mésmu kuza ki bu krê pidi Jeová.

12. Ki perguntas nu debe pensa na el óras ki nu ta lé kes orason ki sta na Bíblia?

¹² Óras ki bu ta lé kes orason ki sta na Bíblia, pensa na kes pergunta li: ‘Ken ki faze kel orason li i ki situason el staba ta pasa pa el? N sta ta xinti sima el? Kuzê ki N ta prende di kel orason li?’ Talvês bu meste faze más piskiza pa responde kes pergunta li, má bale péna faze kel sforsu li. Odja alguns izénplu.

13. Ki lison nu pode prende ku kel orason di Ana? (1 Samuel 1:10, 11) (Odja imajen.)

¹³ Lé 1 Samuel 1:10, 11. Kantu Ana faze se orason, el staba ta pasa pa dôs prubléma grandi. El ka ta pode tinha fidju i se maridu tinha otu mudjer ki ta provokaba el. (1 Sam. 1:4-7) Si bu sta ta pasa pa un prubléma ki ta poi bu vida ta bira difísil, kuzê ki bu pode prende ku orason di Ana? El tra ténpu pa konta Jeová tudu ses preokupason i dipôs el xinti más midjór. (1 Sam. 1:12, 18) Nos tanbê nu pode xinti más midjór óras ki nu ‘lansa nos karga na Jeová’ i nu fla-l tudu nos preokupason i modi ki nu sta ta xinti. — Sal. 55:22.

14. (a) Kuzê más ki nu pode prende ku izénplu di Ana? (b) Modi ki lé i midita na Palavra di Deus ta djuda-nu midjora nos orason? (Odja nóta di rodapé.)

¹⁴ Alguns anu dipôs ki se fidju Samuel nase, Ana leba-l pa Eli ki éra saserdóti prinsipal. (1 Sam. 1:24-28) Na un orason di korason ki Ana faze, el fla Jeová ma el éra gratu pa el, pamodi el odja modi ki Jeová ta proteje i ta kuida di ses sérvu lial.d (1 Sam. 2:1, 8, 9) Talvês ses prubléma na kaza ka kaba, má el konsentra na modi ki Jeová abensua-l. Kuzê ki nu ta prende? Nos tanbê nu ta konsigi lida ku nos prublémas si nu konsentra na modi ki Jeová djuda-nu ti gósi.

15. Kuzê ki nu ta prende ku orason di proféta Jeremias óras ki nu ta pasa pa injustisa? (Jeremias 12:1)

¹⁵ Lé Jeremias 12:1. Kantu Jeremias odja ma alguns algen ki ta fazeba kuzas mariadu ta parseba ma es tinha ménus prubléma na vida, el xinti dizanimadu. Tanbê, el xinti dizanimadu pamodi otus israelita ta gozaba ku el. (Jer. 20:7, 8) Nu ta intende modi ki el xinti pamodi nos tanbê pesoas ta goza ku nos i ta parse ma kes algen ki é dizonéstu ten ménus prubléma na vida. Enbóra Jeremias fla Jeová ma el staba xatiadu ku kes kuza li, nunka el ka fla Jeová ma el éra injustu. I se kunfiansa na justisa di Jeová fika más fórti kantu el odja ma Jeová koriji Se povu. (Jer. 32:19) Nos tanbê, nu pode fla Jeová modi ki nu sta xinti pamodi injustisa i ma nu ta kunfia ma el ta ben kaba ku injustisa na ténpu sértu.

16. Kuzê ki nu pode prende ku orason di kel levita ki staba prézu? (Salmo 42:1-4) (Odja imajens.)

¹⁶ Lé Salmo 42:1-4. Kel kántiku li skrebedu pa un levita ki staba prézu i ki ka ta pode ba adoraba Jeová na ténplu djuntu ku kes otu israelita. Kel Salmu li ta mostra modi ki el staba ta xinti. Nu pode xinti sima el, si nu ka ta konsigi sai di kaza pamodi un duénsa ô si nu sta prézu pamodi nos fé. Alvês nu pode xinti dretu i ten óras ki nu pode xinti dizanimadu. Má ka ta inporta modi ki nu sta xinti é bon nu pâpia ku Jeová sobri nos sentimentu. Kel-li pode djuda-nu intende nos sentimentu midjór i lenbra-nu di kuzê ki é más inportanti. Pur izénplu, kel levita da kónta ma el tinha otus oportunidadi pa lova Jeová. (Sal. 42:5) Tanbê, el pensa na modi ki Jeová staba ta kuida di el. (Sal. 42:8) Faze orason di korason pa Jeová pode djuda-nu intende nos sentimentu midjór, atxa pas otu bês i ten forsa pa nu aguenta nos situason.

17. (a) Kuzê ki nu pode prende ku orason di proféta Jonas? (Jonas 2:1, 2) (b) Óras ki nu ta pasa pa ténpus difísil, pamodi ki é bon nu lenbra di alguns palavra ki sta na Salmos? (Odja nóta di rodapé.)

¹⁷ Lé Jonas 2:1, 2. Proféta Jonas faze kel orason li kantu el staba na bariga di un pexi grandi. Enbóra el dizobideseba Jeová, el tinha serteza ma Jeová ta obiba el. Na se orason, Jonas uza txeu palavra ki nu ta atxa na Salmos.e Kel-li ta mostra ma talvês el konxeba kes Salmu dretu. Pensa na es da-l serteza ma Jeová ta ba djudaba el. Di mésmu manera, si nu tenta dikora alguns testu di Bíblia, nu ta konsigi lenbra di es i es ta konsola-nu óras ki nu ta faze orason na ténpus difísil.

FAZE ORASON PA BU KONTINUA TA BIRA MÁS AMIGU DI JEOVÁ

18-19. Ki garantia nu ta atxa na Romanus 8:26, 27? Da un izénplu.

¹⁸ Lé Romanus 8:26, 27. Alvês nu pode xinti preokupadu dimás ki nu ka ta konsigi fla Jeová modi ki nu sta xinti. Má nu ka sta sen ajuda. Na kes momentu li, spritu santu di Deus “ta pidi” pa nos. Modi? Jeová uza se spritu santu pa poi kes skritor di Bíblia ta skrebe txeu orason. Óras ki nu ka ta konsigi fla dretu kuzê ki nu sta ta pensa, Jeová pode seta alguns palavra di kes orason, sima si é nos ki sta ta pidi i el pode responde-s.

¹⁹ Sabe di kel-li djuda un irman na Rúsia ki txoma Yelena. El podu prézu pamodi el ta oraba i el ta leba Bíblia. Yelena staba preokupadu dimás ki fika difísil pa el faze orason. El fla: “N lenbra ma óras ki N ta xinti preokupadu dimás i N ka ta sabe kuzê ki N ta fla Jeová na orason, el ta seta kes orason di ses sérvu ki sta na Bíblia... sima si é mi ki sta faze-s. ... Kel-li da-m txeu konsolu duránti kes ténpu difísil.”

20. Modi ki nu pode pripara nos menti pa faze orason óras ki nu sta preokupadu dimás?

²⁰ Óras ki nu sta preokupadu dimás, nu pode kumesa ta faze orason i dipôs nu pode fika distraídu ta pensa na otus kuza. Pa pripara nos menti, nu pode obi gravasons di livru di Salmos. Tanbê nu pode skrebe kuzê ki nu sta ta xinti, sima rei Davidi faze. (Sal. 18, 34, 142; kabesalhu.) É klaru ki ka ten régra di modi ki nu debe pripara pa faze orason. (Sal. 141:2) Faze kuzê ki é midjór pa bo.

21. Pamodi ki nu pode ora di tudu nos korason?

²¹ Nu ta fika txeu konsoladu di sabe ma Jeová ta intende nos sentimentu, ti mésmu antis di nu fla kalker kuza. (Sal. 139:4) Má el krê obi-nu ta fla-l modi ki nu sta xinti i modi ki nu ta kunfia na el. Pur isu, ka bu xinti medu di ora pa bu Pai na séu. Prende ku kes orason ki sta na se Palavra. Ora di tudu bu korason. Fla-l kuzê ki ta dexa-u kontenti i kuzê ki ta pô-u tristi. Jeová é bu midjór amigu, pur isu sénpri el ta sta la pa bo!