Lenbra di faze orason pa otus algen

1. Modi ki nu sabe ma nos orason é inportanti pa Jeová?

ORASON é un grandi prezenti ki Jeová da-nu. Pensa na kel-li: Jeová da anjus alguns trabadju pa faze. (Sal. 91:11) Tanbê, el da Jizus txeu responsabilidadi inportanti. (Mat. 28:18) Má el da algun algen responsabilidadi di obi nos orason? Klaru ki nau! Jeová skodje faze kel-li el mê. Jeová é ‘Kel ki ta obi orason’ i el ta obi orason di kada un di nos. — Sal. 65:2.

2. Modi ki apóstlu Paulu da un bon izénplu na ora pa otus algen?

² Enbóra nu pode xinti avontádi pa txiga na Jeová i konta-l nos preokupason, tanbê nu debe faze orason pa otus algen. Apóstlu Paulu faze kel-li. Pur izénplu, el skrebe pa kongregason na Éfezu: “N ta kontinua ta pâpia di nhos na nhas orason.” (Efé. 1:16) Tanbê, Paulu fla nómi di algen ki el konxeba na se orason. Pur izénplu, el fla Timótiu: ‘N ta agradese Deus i sénpri N ta lenbra di bo óras ki N ta inplora Deus dia ku noti.’ (2 Tim. 1:3) Paulu tinha ses própi prubléma ki el ta oraba pa el. (2 Kor. 11:23; 12:7, 8) Má simé, el tra ténpu pa ora pa otus algen.

3. Pamodi ki alvês nu ta skese di faze orason pa otus algen?

³ Alvês, nu pode skese di faze orason pa otus algen. Pamodi? Un irman ki txoma Sabrina,a fla un di kes razon. El fla: “Nu ta sta okupadu dimás. Pur isu, alvês nu ta konsentra sô na nos prubléma i nu ta ora sô pa kes kuza ki nu meste.” Alvês kel-li ta kontise ku bo? Si sin, kel artigu li pode djuda-u. El ta ben djuda-nu odja (1) pamodi ki é inportanti faze orason pa otus algen i (2) da-nu alguns sujiston di modi ki nu pode faze kel-li.

PAMODI KI NU DEBE ORA PA OTUS ALGEN?

4-5. Di ki manera ki orason ki nu ta faze pa otus algen ten “txeu forsa”? (Tiagu 5:16)

⁴ Faze orason pa otus algen “ten txeu forsa”. (Lé Tiagu 5:16.) Nos orason pode afeta kuzê ki pode ba kontise ku otu algen. Jizus sabia ma apóstlu Pedru ta ba negaba el, pur isu el fla: “N ten stadu ta inplora Deus pa bo, pa bu ka perde bu fé.” (Luk. 22:32) Apóstlu Paulu tanbê sabia ma orason pode muda situason di un algen. Kantu Paulu staba prézu na Roma, el skrebe pa Filemon: “N ten speransa ma grasas-a nhos orason, N ta volta pa nhos.” (Flm. 22) Poku ténpu dipôs, Paulu tradu di kadia i el kumesa se trabadju di pregason otu bês.

⁵ É klaru ki kel-li ka krê fla ma óras ki nu ta ora nu sta obriga Jeová faze algun kuza. El ta repara preokupason ki ses sérvu ta mostra i alvês el ta skodje faze kel ki es pidi. Sabe di kel-li ta djuda-nu ora pa Jeová di korason sobri nos situason i nu ta xinti kunfiansa di dexa kel asuntu na se mô. — Sal. 37:5; odja 2 Koríntius 1:11 i kes nóta na Bíblia di studu.

6. Kuzê ki ta kontise óras ki nu ta ora pa otus algen? (1 Pedru 3:8)

⁶ Faze orason pa otus algen pode djuda-nu dizenvolve “konpaxon”. (Lé 1 Pedru 3:8.) Un algen ki ten konpaxon ta repara sufrimentu di otus algen i el ta krê faze algun kuza pa djuda-s. (Mar. 1:40, 41) Un ansion ki txoma Migel fla: “Óras ki N ta ora pa otus algen, N ta fika más atentu na prublémas ki es sta ta pasa pa el i nha amor pa es ta fika más fórti. Kel-li ta pô-m ta xinti más ses amigu, sikrê es ka sabe ma N ora pa es.” Un ansion ki txoma Rikardu fla modi ki é bon ora pa otus algen. El fla: “Óras ki nu ta ora pa un algen nu ta krê faze algun kuza pa djuda-l. I óras ki nu ta djobe maneras sinplis di djuda un algen, nu sta ta ser un respósta pa se orason.”

7. Modi ki ora pa otus algen ta djuda-nu ka konsentra na nos prubléma? (Filipensis 2:3, 4) (Odja imajens.)

⁷ Faze orason pa otus algen ta djuda-nu ka konsentra na nos prubléma. (Lé Filipensis 2:3, 4.) Nu sta ta vive na un mundu kontroladu pa Satanás. Pur isu, nos tudu nu ta pasa pa prublémas ki é difísil lida ku el. (1 Juan 5:19; Apo. 12:12) Óras ki nu ten ábitu di ora pa otus algen, kel-li ta djuda-nu lenbra ma nos “irmons na mundu interu sta ta pasa pa kes mésmu sufrimentu.” (1 Ped. 5:9) Un pionera ki txoma Katarina fla: “Ora pa otus algen ta lenbra-m ma es tanbê es sta ta pasa pa prubléma. Óras ki N lenbra di kel-li N ta para di konsentra dimás na nhas prubléma.”

ES MESTE DI NOS ORASON

8. Da izénplu di alguns algen ki nu pode ora pa el.

⁸ Pa kenha ki nu pode ora? Nu pode ora pa un grupu di algen, sima kes ki tene prubléma di saúdi, kes jóven ki ta fazedu trósa i ki ta pasa preson na skóla ô kes ki sta ta sufri pamodi dja es sta algen grandi. Txeu irmon sta ta lida ku opozison di família ô di govérnus. (Mat. 10:18, 36; Atus 12:5) Alguns irmon tevi ki sai di ses kaza pamodi violénsia na undi ki es ta mora. Otus sta ta sufri pamodi dizastri na naturéza. Nu pode ka konxe kes irmon ku irmans. Má óras ki nu ta ora pa es, nu ta mostra ma nu sta ta sigi órdi di Jizus di “ama kunpanheru.” — Juan 13:34.

9. Pamodi ki nu debe ora pa kes irmon ki ta toma kónta di organizason di Jeová i pa ses mudjer?

⁹ Tanbê, nu pode ora pa kes algen ki ta toma kónta di organizason di Jeová. Kel-li ta inklui kes irmon di Grupu Enkaregadu di Óbra i ses ajudanti, kes irmon di Kumison di Filial, kes enkaregadu na kes filial, kes enkaregadu di grupu di kongregason, kes ansion na kongregason i kes ajudanti di kongregason. Kes irmon li ta trabadja duru pa djuda-nu i txeu di es inda ten ki lida ku ses própi preokupason. (2 Kor. 12:15) Pur izénplu, un enkaregadu di grupu di kongregason ki txoma Marku fla: “Un di kes prubléma más difísil pa mi é pamodi N sta lonji di nha pai ku nha mai ki dja sta algen grandi. Es tudu dôs sta ku prubléma di saúdi. Enbóra nha irman ku se maridu ta kuida di es, N ta fika tristi pamodi N ka ta sta la pa djuda-s.” Nu pode ka sabe tudu kuza ki kes irmon li ki ta trabadja dura sta preokupadu ku el, má nu debe lenbra di ora pa es. (1 Tes. 5:12, 13) Tanbê nu pode ora pa ses mudjer pamodi es sta ta djuda-s kontinua na ses diziginason.

10-11. Jeová ta fika kontenti óras ki nu ta ora pa un grupu di irmons sikrê nu ka fla ses nómi? Splika.

¹⁰ Sima dja nu odja, txeu bês nu pode ora pa un grupu di irmons ku irmans. Pur izénplu, sikrê nu ka sta ta pensa na ninhun algen pa nu ora pa el, nu pode pidi Jeová pa djuda kes ki sta prézu ô pa konsola kes ki more-s un algen ki es ta ama. Un ansion ki txoma Donald fla: “Nu ten txeu irmon ku irmans ki sta ta pasa pa prubléma ki óras ki nu ta ora, nu ta pidi ajuda pa tudu kes ki sta ta sufri.”

¹¹ Jeová ta fika kontenti ku kes orason li? Klaru ki sin! Nu ka sabe dretu kuzê ki kada un di nos irmons ku irmans meste. Pur isu, é bon nu ora pa un grupu di irmons ku irmans. (Juan 17:20; Efé. 6:18) Kes orason li ta prova ma nu “ten amor pa irmons na mundu interu”. — 1 Ped. 2:17.

ÓRAS KI NU TA ORA PA UN ALGEN

12. Modi ki sta atentu ta djuda-nu faze orason pa un algen?

¹² Sta atentu. Alén di ora pa un grupu di irmons, tanbê nu debe ora pa un algen. Algun algen na bu kongregason sta ta lida ku un duénsa gravi? Ten algun jóven na bu kongregason ki ses koléga di skóla sta ta faze-l preson pa faze algun kuza mariadu? Ten algun pai ô mai ki sta ta sforsa pa kria se fidju el sô “di akordu ku disiplina i konsedju di Jeová”? (Efé. 6:4) Óras ki bu ta sta atentu, bu ta konsigi mostra-s amor i poi na ses lugar. Kel-li ta pô-u ku más vontadi di ora pa es.b — Rom. 12:15.

13. Kuzê ki pode djuda-nu ora pa kes algen ki nu ka konxe?

¹³ Fla nómi di kes algen na orason. Nu pode faze kel-li ti pa kes algen ki nu ka konxe. Odja izénplu di nos irmons ku irmans ki sta prézu na alguns país sima Krimeia, Eritreia, Rúsia i Singapura. Na jw.org, bu ta atxa nómi di alguns irmon ki sta prézu.c Un enkaregadu di grupu di kongregason ki txoma Brian fla: “Óras ki N ta skrebe nómi di un irmon ô un irman ki sta prézu i N ta fla-l ku vós altu, ta ser más fásil pa mi lenbra di se nómi óras ki N ta ora pa el.”

14-15. Kuzê ki pode djuda-nu ser dirétu na nos orason?

¹⁴ Ser dirétu na bus orason. Migel, ki dja nu papiaba di el antis, fla: “Óras ki N ta lé sobri nos irmons ki sta prézu, na jw.org, N ta tenta imajina modi ki N ta xintiba si N staba na ses situason. Di serteza N ta fikaba preokupadu ku nha mudjer i N ta krê tinha serteza ma el ta tinha kes kuza ki el meste. Faze kel-li, djuda-m atxa kuzas ki N pode pidi óras ki N ta ora pa kes irmon ki sta prézu, ki é kazadu.” — Ebr. 13:3, nóta di rodapé.

¹⁵ Óras ki nu ta imajina modi ki é vida di kes irmon ki sta prézu, tanbê nu ta atxa más kuza ki nu pode pidi na nos orason. Pur izénplu, nu pode ora pa kes guarda di kadia mostra más bondadi pa kes irmon ki sta prézu i pa kes algen ki ten autoridadi dexa nos irmons ten liberdadi pa adora Jeová. (1 Tim. 2:1, 2) Nu pode ora pa izénplu di kes irmon fiel ki sta prézu inkoraja kes irmon di ses kongregason i pa kes algen ki é ka Tistimunha di Jeová odja kel bon konportamentu di nos irmons ki sta prézu, asi pa es krê seta nos mensajen. (1 Ped. 2:12) I nu pode faze mésmu kuza óras ki nu ta ora pa kes irmon ki sta ta pasa pa otus prubléma. Óras ki nu ta sta atentu, nu ta fla nómi di kes irmon na nos orason i nu ta ser dirétu na nos orason, nu ta mostra ma nu sta “xeiu di amor pa kunpanheru”. — 1 Tes. 3:12.

TEN UN PONTU DI VISTA IKILIBRADU SOBRI BUS ORASON

16. Modi ki nu pode ten un pontu di vista ikilibradu sobri nos orason? (Mateus 6:8)

¹⁶ Sima dja nu odja, nos orason pode muda kuzê ki ta ba kontise ku un algen. Má simé, nu meste ser ikilibradu. Nu meste lenbra ma óras ki nu ta ora nu ka sta ba fla Jeová un kuza ki inda el ka sabe i nen nu ka meste da-l konsedju di kal ki é midjór manera di lida ku kel situason. Jeová dja sabe kuzê ki ses sérvu meste, mésmu antis di es ô nos nu da kónta. (Lé Mateus 6:8.) Nton, pamodi ki nu debe ora pa otus algen? Alén di kes razon ki dja nu pâpia di el na kel studu li, faze kel-li é un manera di mostra modi ki nu ta preokupa ku otus algen. Amor ta motiva-nu ora pa kunpanheru. I Jeová ta fika kontenti di odja ses sérvu ta mostra amor sima el.

17-18. Ki ilustrason pode djuda-nu ten un pontu di vista ikilibradu sobri nos orason?

¹⁷ Mésmu óras ki nos orason ka ta konsigi rezolve un situason, es ta mostra nos amor pa nos irmons ku irmans i Jeová ta repara kel-li. Imajina un família ki ten dôs fidju: un rapazinhu i un minininha. Kel rapazinhu sta duenti na kama. Kel minininha ta inplora se pai: “Favor, faze algun kuza pa nha irmon. El ka sta dretu!” Se pai dja sta ta faze kel-la. El ta ma se fidju i el ta kuida di el dretu. Má imajina modi ki kel pai ta fikaba kontenti di odja se fidju-fémia ta pidi pa el djuda se irmon!

¹⁸ É kel-li ki Jeová ta insentiva-nu pa nu faze. El krê pa nu preokupa ku kunpanheru i pa nu ora pa kunpanheru. Óras ki nu ta faze kel-li, nu ta mostra ma nu ka ta preokupa sô ku nos kabésa ma nu ta ama nos irmons ku irmans di verdadi i Jeová ta repara kel-li. (2 Tes. 1:3; Ebr. 6:10) Tanbê, sima dja nu odja, alvês nos orason pode muda kuzê ki ta ba kontise ku un algen. Pur isu, nu krê lenbra sénpri di ora pa kunpanheru.