Kontinua ku alegria sikrê na bedjisa

1-2. Kuzê ki Jeová ta xinti pa kes algen di idadi? (Salmo 92:12-14; Odja imajen.)

NA MUNDU interu pesoas ta reaji di manera diferenti óras ki es kumesa ta bedja. Pur izénplu, bu ta lenbra kantu bu odja bu primeru fiu di kabelu branku? Talvês bu xinti vontadi di rinka-l antis di kalker otu algen odja-l. Má, bu da kónta ma rinka kes kabelu branku ka ta inpidi pa ka nase más kabelu branku. Kel izénplu li ta mostra ma pa txeu algen é difísil seta ma dja es bedja.

² Má, nos Pai na séu ta odja kes algen di idadi di manera diferenti. (Pro. 16:31) El ta fla ma es é sima un arvi ki ta da txeu fruta. (Lé Salmo 92:12-14.) Kuzê ki kel-li krê fla? Txeu bês, kes arvi ki dja ten txeu anu é bunitu pamodi es ten txeu folha i txeu flor. Pur izénplu, ten un tipu di arvi na Japon ki ta vive txeu anu. Alguns di kes arvi li ki é más bunitu dja ten más di mil anu. Sima kes arvi li ki dja ten txeu anu, kes irmon di idadi fiel é bunitu prinsipalmenti pa Jeová. Jeová ka ta odja sô ses kabelu branku. El ta da valor pa kes kualidadi bunitu di kes irmon di idadi. Dja es ten txeu anu ta sirbi-l i el ta lenbra ma es mante lial pa el na kes momentu sábi i na kes momentu kasábi.

3. Da izénplu di alguns algen di idadi ki Jeová uza pa kunpri diziginason inportanti.

³ Un algen ka ta dexa di ten valor pa Jeová pamodi dja el sta algen di idadi.a Na verdadi, txeu bês Jeová uza kes algen di idadi pa kunpri diziginason inportanti. Pur izénplu, Sara dja staba algen grandi kantu Jeová fla-l ma el ta biraba mai di un nason grandi i ma Misías ta binha di se família. (Jén. 17:15-19) Muizés dja staba algen grandi kantu Jeová manda-l pa el tra kes israelita di Ijitu. (Ézu. 7:6, 7) I apóstlu Juan dja staba algen grandi kantu Jeová uza-l pa skrebe sinku livru di Bíblia.

4. Di akordu ku Provérbios 15:15, Kuzê ki pode djuda kes algen di idadi aguenta prublémas? (Odja imajen.)

⁴ Sima nu ta ba ta fika algen grandi, txeu bês nu ta ten txeu prubléma di saúdi i kel-li ta poi nos vida ta fika difísil. Pur isu, un irman fla na brinkadera: “Fika algen grandi, é ka pa kes fraku.” Má, ten alegriab pode djuda kes algen di idadi aguenta kes prubléma ki ta ben pamodi bedjisa. (Lé Provérbios 15:15.) Na es studu, nu sta ben odja alguns kuza sinplis ki kes algen di idadi pode faze pa djuda-s kontinua ku alegria. Tanbê, nu ta ben odja modi ki otus algen pode djuda kes irmon ku irmans di idadi na ses kongregason. Má primeru, nu ben odja kuzê ki pode djuda-nu kontinua ku alegria sima nu ta ba ta fika algen grandi.

PAMODI KI PODE SER DIFÍSIL KONTINUA KU ALEGRIA NA BEDJISA?

5. Kuzê ki pode poi alguns algen di idadi ta fika dizanimadu?

⁵ Kuzê ki pode pô-u ta xinti dizanimadu? Talvês bu ta xinti tristi pamodi bu ka ta pode faze kel ki bu ta fazeba antis. Bu ta krê staba jóven inda i ku bon saúdi. (Ecl. 7:10) Pur izénplu, un irman ki txoma Rita,c fla: “É difísil pa N bisti un ropa pamodi dja N ka ta konsigi mexe dretu i N ta xinti txeu dór. Alvês é difísil faze kuzas sinplis sima labanta pé pa N kalsa un sapatu. Nha mô ta fika ta due-m txeu i N ka ta pode uza dédu dretu. Ti mésmu faze trabadju sinplis é difísil pa mi.” Harold, ki sirbi na Betel, fla: “Alvês N ta fika xatiadu pamodi N ka ta konsigi faze tudu kes kuza ki N gostaba di faze. Mi éra fórti kantu mi éra jóven. N ta djugaba beiziból ki éra disportu ki más N gostaba. Alguns algen ta flaba: ‘Pasa Harold bóla pamodi el nunka el ka ta fadja.’ Má gósi N ta atxa ma nen N ka ta pode lansa bóla.”

6. (a) Ki otus kuza pode poi kes algen di idadi ta xinti dizanimadu? (b) Kuzê ki pode poi kes algen di idadi ta disidi si es pode para di konduzi ô nau? (Odja artigu ku téma “N debe para di konduzi?”, na es revista.

⁶ Talvês bu sta xinti dizanimadu pamodi bu ka ta konsigi faze alguns kuza bo sô. Kel-li ta kontise prinsipalmenti si bu meste di ajuda di un algen ki ta ba kuida di bo ô si bu ten ki ba mora ku un di bus fidju. Tanbê, bu pode sta ta xinti dizanimadu pamodi bu saúdi sta ta piora ô bu ka sta ta odja dretu i pur isu, bu ka ta konsigi bai pa algun lugar bo sô ô konduzi un karu. Kel-li pode pô-u ta xinti tristi! Má un kuza ki pode djuda-u é lenbra ma Jeová i otus algen ta da-u valor ka pamodi bu ta konsigi kuida di bu kabésa, vive bo sô ô konduzi un karu. I nu pode ten serteza ma Jeová ta intende nos sentimentu. Kuzê ki é inportanti pa Jeová é kel algen ki nos é di pa déntu. É kel amor ki nu ten pa el i pa nos irmons ku irmans ki ta pô-l ta da-nu valor. — 1 Sam. 16:7.

7. Kuzê ki pode djuda kes algen ki sta tristi pamodi es ta atxa ma óras ki fin ben es ka ta sta bibu?

⁷ Talvês bu sta ta xinti tristi pamodi bu ta atxa ma óras ki fin ben bu ka ta sta bibu. Si bu sta xinti si, kuzê ki pode djuda-u? Lenbra ma Jeová sta ta spera ku paxénxa pa el kaba ku es mundu mau. (Isa. 30:18) Má ten un razon pa el spera ku paxénxa. Se paxénxa sta ta da milhons di algen ténpu i xansi pa konxe-l i sirbi-l. (2 Ped. 3:9) Nton, óras ki bu sta ta xinti tristi, tenta pensa na modi ki paxénxa di Jeová ta ben djuda txeu algen antis di fin ben. Alguns di es pode ser algen di bu família.

8. Óras ki kes algen grandi sta duenti ô ku dór, kuzê ki es pode faze?

⁸ Ka ta inporta nos idadi, nos tudu, óras ki nu ka sta xinti dretu é más fásil nu fla i nu faze kuzas ki dipôs nu ta rapende. (Ecl. 7:7; Tia. 3:2) Pur izénplu, kantu Jó ki éra un ómi fiel staba ta sufri, el fla ‘palavras sen pensa.’ (Jó 6:1-3) Tanbê, prublémas di saúdi ô ramedi pode poi un algen di idadi ta fla i ta faze kuzas ki normalmenti el ka ta flaba nen fazeba. Má, sikrê dja nu sta di idadi ô duenti, é ka dretu trata otus algen mariadu ô spera ma sénpri es ta faze kuzas pa nos. I si nu da kónta ma nu fla un algen un kuza ki ka ta mostra amor, nu debe pidi diskulpa lógu. — Mat. 5:23, 24.

KUZÊ KI BU PODE FAZE PA BU KONTINUA KU ALEGRIA?

9. Pamodi ki bu debe seta ajuda di otus algen? (Odja imajens.)

⁹ Seta ajuda di otus algen. (Gál. 6:2) Na komésu, kel-li pode ser difísil. Un irman, ki txoma Goréte, fla: “Alvês N ta atxa difísil seta ajuda pamodi N ta xinti ma N sta ta kansa kel algen. Leba ténpu pa N muda nha manera di pensa i rekonhese ku umildadi ma N meste di ajuda.” Lenbra ma otus algen ta fika kontenti óras ki bu ta dexa-s djuda-u. (Atus 20:35) I bu ta fika filís di odja ma es ta ama-u i ma es krê kuida di bo.

10. Pamodi ki nu debe lenbra di mostra gratidon? (Odja imajen.)

¹⁰ Mostra gratidon. (Kol. 3:15; 1 Tes. 5:18) Óras ki otus algen ta faze kuzas dretu pa nos, nu ta xinti gratu, má nu pode skese di mostra gratidon. Má, si nu ri i nu fla obrigadu, nos amigus ta odja ma nu da valor pa kuzê ki es faze pa nos i es ta fika kontenti. Lea, ki ta kuida di kes irmon di idadi na Betel, fla: “Un irman ki N ta kuida di el sénpri ta agradese-m. El ta skrebe kes mensajen na padás di papel. Kes mensajen é pikinoti, má es é sábi. N gosta di lé-s i sabe ma el ta da valor pa ajuda ki N sta ta da-l ta pô-m ta xinti filís.”

11. Modi ki bu pode djuda otus algen? (Odja imajen.)

¹¹ Faze kel ki bu ta pode pa djuda otus algen. Óras ki bu ta uza bu ténpu i bu forsa pa djuda otus algen, ta ser más difísil bu konsentra na bus própi prubléma. Un provérbiu afrikanu ta konpara kes algen di idadi ku un bibliotéka xeiu di livru ki ten txeu sabedoria. Má, kes livru ki ta dexadu na stanti ka ta inxina nen ka ta konta stória. Di mésmu manera, jóvens ka ta pode prende kes lison inportanti si bu ka pâpia ku es i bu ka konta-s alguns di kes kuza ki bu sabe. Faze-s pergunta i obi-s. Inxina-s pamodi ki sigi leis di Jeová é sénpri midjór i ta pô-s ta xinti filís. Di serteza bu ta xinti alegria óras ki bu ta konsola i inkoraja kes jóven. — Sal. 71:18.

12. Di akordu ku Isaías 46:4, kuzê ki Jeová promete faze pa kes algen di idadi? (Odja imajen.)

¹² Ora pa Jeová da-u forsa. Enbóra bu pode xinti kansadu ô dizanimadu, Jeová ‘nunka ka ta kansa i nen el ka ta fika stafadu.’ (Isa. 40:28) Modi ki Jeová ta uza se puder ki ka ta kaba? Un di kes manera ki el ta uza-l é pa da forsa pa kes algen di idadi. (Isa. 40:29-31) Na verdadi, el promete ma el ta djuda-s. (Lé Isaías 46:4.) I Jeová sénpri ta kunpri se promésa. (Juz. 23:14; Isa. 55:10, 11) Óras ki bu ta faze orason, Jeová ta da-u kel ajuda ki bu meste. Tanbê, bu ta xinti ma Jeová ta ama-u txeu i kel-li ta pô-u ta xinti filís.

13. Di akordu ku 2 Koríntius 4:16-18, di kuzê ki nu debe lenbra? (Odja imajen.)

¹³ Lenbra ma bu situason ka ta dura pa tudu ténpu. Óras ki bu ta lenbra ma un situason difísil ka ta dura pa tudu ténpu ta ser más fásil bu aguenta firmi. I Bíblia ta da-nu serteza ma bedjisa i duénsa ka ta dura pa tudu ténpu. (Jó 33:25; Isa. 33:24) Pur isu, bu pode fika kontenti di sabe ma kes midjór kuza sta pa frenti, ka pa tras. (Lé 2 Koríntius 4:16-18.) Má kuzê ki otus algen pode faze pa djuda?

MODI KI OTUS ALGEN PODE DJUDA?

14. Pamodi ki é inportanti txoma i vizita kes irmon di idadi?

¹⁴ Txoma i vizita kes irmon di idadi sénpri. (Ebr. 13:16) Kes algen di idadi pode xinti es sô. Un irmon, ki ka ta pode sai di kaza ki txoma Kamilu, fla: “N ten ki fika na kaza di palmanhan pa noti. N ta fika infadadu. Alvês N ta xinti sima un lion bédju ki sta prézu na un jaula. N ta fika xatiadu i dizanimadu.” Óras ki nu ta vizita kes algen di idadi, nu debe dexa-s sabe ma es é inportanti pa nos i ma nu ta ama-s. Pode ser ki alguns bês nu pensa na txoma ô vizita un irmon di idadi má nu ka faze kel-li. Nos tudu nu ten txeu kuza di faze. Nton, kuzê ki pode djuda-nu “djobe dretu kuzê ki é más inportanti”, sima vizita kes algen di idadi? (Flp. 1:10) Bu pode skrebe nómi di kes irmon di idadi di bu kongregason i dia ki bu ta manda-s mensajen ô txoma-s. Tanbê bu pode faze un planu pa vizita-s. Skodje un dia pa bu faze kel-li asi pa bu ka skese.

15. Kuzê ki kes jóven pode faze djuntu ku kes irmon di idadi?

¹⁵ Si bo é jóven, talvês bu ta xinti preokupadu pamodi bu ka sabe kuzê ki bu pode fla ô faze djuntu ku kes algen di idadi. Bu ka meste preokupa txeu ku kel-li. Sô ser un bon amigu. (Pro. 17:17) Pâpia ku kes irmon di idadi antis ô dipôs di runion. Bu pode pergunta-s kal ki é testu ki más es gosta ô fla-s pa es konta-u algun kuza ki es faze kantu es éra mininu i ki ta pô-s ta ri. Bu pode konvida-s pa odja prugrama di JW Broadcasting^® djuntu ku bo. Tanbê bu pode faze alguns kuza pa es ki es ka ta konsigi faze es sô. Pur izénplu, bu pode djuda-s atualiza ô diskarega kes últimu publikason na ses telemóvel. Un irman, ki txoma Karol, fla: “Faze kes kuza ki bu gosta djuntu ku kes irmon di idadi. Enbóra dja N sta algen grandi inda N gosta di pruveta vida. N gosta di faze kónpra, kume djuntu ku amigus i vizita lugaris bunitu.” Tanbê, un irman ki txoma Maira, fla: “Un di nhas amiga ten 90 anu. El ta leba-m 57 anu, má alvês N ta skese di kel-li pamodi nu ta ri i nu ta odja filmi djuntu. I óras ki nu ta pasa pa prublémas, nu ta pidi kunpanheru konsedju.”

16. Pamodi ki é bon bai djuntu ku kes irmon di idadi pa dotor?

¹⁶ Bai djuntu ku kes irmon di idadi pa dotor. Alén di da-s buleia, tanbê bu pode fika djuntu ku es duránti konsulta pa odja si dotor ô infermeru sta ta trata-s dretu i si es sta ta da-s kel ajuda ki es meste. (Isa. 1:17) Tanbê bu pode djuda-s toma nóta di kes kuza ki dotor fla-s. Un irman di idadi ki txoma Rute, fla: “Normalmenti óras ki N ta bai mi sô pa dotor, es ka ta kridita na kes kuza ki N ta fla. Kes dotor pode fla-m kuzas sima: ‘Nha ka sta duenti, sô nha sta ta imajina ma nha sta duenti.’ Má, óras ki un algen ta ba djuntu ku mi, kes dotor ta trata-m midjór. N ta agradese nhas irmon ku irmans ki ta tra ténpu pa bai djuntu ku mi pa dotor.”

17. Di ki maneras bu pode prega djuntu ku kes irmon di idadi?

¹⁷ Sai ku kes irmon di idadi na pregason. Alguns irmon di idadi ka tene forsa más pa sai na pregason di kaza en kaza. Pur izénplu, bu ta pode konvida un irman di idadi pa nhos ba da tistimunhu ku karinhu? Bu pode ti mésmu ranja un kadera pa el xinta si el ka ta konsigi fika di pé. Ô bu ta pode konvida un irmon di idadi pa ba faze un studu di Bíblia djuntu ku bo, talvês ti mésmu na se kaza? Si ta da, ansions pode ranja manera pa faze runion pa pregason na kaza di kes irmon di idadi, asi ta fika más fásil es sisti kes runion. Bale péna faze kalker sforsu pa da ónra pa kes irmon di idadi. — Pro. 3:27; Rom. 12:10.

18. Kuzê ki nu ta ben pâpia di el na kel otu studu?

¹⁸ Kel studu li, lenbra-nu ma Jeová ta ama i el ta da kes irmon di idadi valor. I tanbê, nos tudu na kongregason nu ta ama-s i nu ta da-s valor! É ka fásil lida ku bedjisa, má ku ajuda di Jeová bu ta pode kontinua ku alegria. (Sal. 37:25) É bon sabe ma kuzas midjór sta pa frenti, ka pa tras! Má i kes ki ta kuida di un algen di ses família ki dja sta algen grandi, un mininu ô un amigu ki sta duenti? Modi ki es pode kontinua ku alegria? Nu ta ben responde kes pergunta li na kel otu studu.