Kuzê ki Bíblia ta fla sobri kes duénsa ki ta spadja na mundu?

Respósta di Bíblia

Bíblia dja flaba ma na ténpu di fin ta tinha txeu duénsa prigozu, ki ta inklui kes duénsa ki ta spadja na mundu. (Lucas 21:11) É ka Deus ki ta kastiga-nu ku kes duénsa li. Na verdadi, ka ta dura, através di se Reinu, Deus ta ben kaba ku tudu prubléma di saúdi, ki ta inklui kes duénsa ki ta spadja na mundu.

Bíblia dja flaba ma ta ben tinha kes duénsa ki ta spadja na mundu?

Profesias di Bíblia ka ta fla nómi di duénsas ki spadja na mundu sima COVID-19, SIDA ô Gripi Spanhóla. Má, dja el flaba ma algen ‘ta duenseba rixu’ i ma ta tinha ‘duénsas ki ta mata’. (Lúkas 21:11, BPK; Apocalipse 6:8) Kes kuza li ta faze párti di kes sinal di ‘ténpu di fin’, ki tanbê ta txomadu di ‘fin di es sistéma’. — 2 Timóteo 3:1; Mateus 24:3.

Algun bês Deus dja kustuma kastiga algen ku duénsa?

Bíblia ta pâpia di alguns bês ki Deus uza duénsa pa kastiga pesoas. Pur izénplu, el poi alguns algen ta ten lépra. (Números 12:1-16; 2 Reis 5:20-27; 2 Crónicas 26:16-21) Má, kes situason li ka éra duénsas ki spadja na mundu nen es ka panha na kes algen ki ka tinha kulpa. Envês di kel-li, kes situason li éra kastigu ki Deus da kes algen ki rabela klaru kóntra el.

Kes duénsa ki sta spadja na mundu na nos ténpu é kastigu di Deus?

Nau. Alguns algen ta fla ma Deus ta uza kes duénsa ki ta spadja na mundu i otus duénsa pa kastiga-nu gósi. Má, Bíblia ka ta apoia kel ideia li. Pamodi?

Un di kes motivu é ki alguns algen ki ta adora Deus, na nos ténpu i na pasadu, tanbê panha duénsas. Pur izénplu, Timótiu, ki éra un ómi fiel, ‘ta duenseba txeu bês.’ (1 Timóteo 5:23) Má Bíblia ka ta fla ma kel-li kontise ku el pamodi Deus ka staba kontenti ku el. Oji tanbê, alguns sérvu fiel di Deus ta fika duenti ô es ta panha duénsas. Txeu bês, kes algen li sô ta sta na mau lugar i na mau óra. — Eclesiastes 9:11.

Otu motivu é ki Bíblia ta inxina ma inda ka txiga kel ténpu ki Deus ta kastiga kes algen mau. Na verdadi, nu sta ta vive ‘na un dia di salvason’ ô na un ténpu ki Deus sta ta konvida ku amor tudu kes algen ki krê bira se amigu i salva. (2 Coríntios 6:2) Un di kes manera ki Deus ta uza pa konvida tudu algen é através di pregason ki ta fazedu na mundu interu i ki ta leba un mensaji puzitivu, ki é ‘notísias sábi di Reinu’. — Mateus 24:14.

Algun dia kes duénsa ki ta spadja na mundu ta ben kaba?

Sin. Bíblia ta pâpia di un ténpu ki, ka ta dura, ningen ka ta ben fika duenti. Através di se Reinu, Deus ta ben kaba ku tudu prubléma di saúdi. (Isaías 33:24; 35:5, 6) El ta kaba ku sufrimentu, dór i mórti. (Apocalipse 21:4) El ta poi kes algen ki dja móre ta ben vive otu bês asi pa es pode ben vive ku bon saúdi li na Téra, ku tudu kuza perfetu. — Salmo 37:29; Atos 24:15.

Testus di Bíblia ki ta pâpia sobri duénsas

Mateus 4:23: ‘[Jizus] anda pa tudu Galilea, ta inxina na sinagógas, ta prega notísias sábi di Reinu i ta kura tudu tipu di duénsas.’

Kuzê ki kel-li krê fla: Kes milagri ki Jizus faze pa uns poku algen ta mostra kuzê ki Reinu di Deus ta ben faze já já pa tudu algen.

Lúkas 21:11, BPK: “Gentis... ta ben duense rixu.”

Kuzê ki kel-li krê fla: Kes duénsa ki ta spadja faxi ta faze párti di kes sinal di ténpu di fin.

Apocalipse 6:8: ‘I N odja un kabalu diskoradu. Kel ki staba montadu na el, se nómi éra Mórti, i Sipultura staba ta bai se tras, pértu di el. Es dadu autoridadi... pa es mata... ku duénsas ki ta mata’.

Kuzê ki kel-li krê fla: Kel profesia sobri kes kuatu ómi montadu na kabalu, ki Apocalipse ta pâpia di el, ta mostra ma na nos ténpu ta tinha duénsas ki ta spadja na mundu.