Kuzê ki Bíblia ta fla sobri kes 6 milhon di algen ki dja móre pamodi COVID?

Di akordu ku Organizason Mundial di Saúdi (OMS), ti dia 23 di Maiu di 2022, 6 milhon i 270 mil algen dja moreba pamodi COVID-19. Má, na un notísia ki sai na dia 5 di Maiu di 2022, OMS kalkula ma nunbru di kes algen ki móre é mutu más txeu. El fla ma duránti kes anu di 2020 i 2021, “nunbru di kes algen ki di manera dirétu ô indirétu móre pamodi COVID-19 é kuazi 14 milhon i 900 mil.” Bíblia ta fla algun kuza sobri kes trajédia tristi li?

Bíblia dja flaba sobri kes duénsa terível ki ta spadja

•  Jizus dja flaba ma ta ben tinha duénsas ki ta spadja, ô ‘duénsas terível’, duránti un ténpu ki ta txomadu ‘ténpu di fin’. — Lucas 21:11, Contemporary English Version; 2 Timóteo 3:1.

Kel profesia di Jizus sta ta kunpri oji. Pa sabe más, odja artigu “Kal ki é sinal di ténpu di fin?”

Bíblia ta konsola-nu

•  ‘Deus di tudu konsolu ta konsola-nu na tudu nos prubléma’. — 2 Coríntios 1:3, 4.

Txeu algen atxa konsolu na Bíblia kantu es perde un algen ki es ta ama. Pa sabe más, odja kes artigu “Modi ki bu pode lida ku dór — Kuzê ki bu pode faze” i “Midjór ajuda pa kes ki perde un algen”.

Bíblia ta fla ka-l ki é soluson

•  ‘Faze bu Reinu ben. Pa bu vontadi fazedu na Séu, asi tanbê na Téra.’ — Mateus 6:10.

Ka ta dura ‘Reinu di Deus’ ta ben garanti ma ‘ningen ka ta ben fla: “N sta duenti.”’ (Marcos 1:14, 15; Isaías 33:24) Pa sabe más sobri kel govérnu ki sta na séu i kuzê ki el sta ben faze, odja vídiu Kuzê ki é Reinu di Deus?

Nu ta konvida-u pa bu prende más sobri kuzê ki Bíblia ta fla, asi pa bo ku bu família pode tra pruvetu di kes bons konsedju i di kes promésa ki ta da-nu speransa.