NU MANTE SIENTI!

Kuzê ki Bíblia ta fla sobri pesoas ta uza armas pa mata algen na mundu interu?

ATUALIZASON: 27 di abril di 2023

Kes disgrasa ki sta ta kontise pamodi pesoas ki ta uza armas pa mata algen sta ta bira kada bês más txeu na mundu interu. Odja sô alguns izénplu.

“Mérka é kel pais na mundu ki algen ta more más txeu na matansas, ta matadu un algen pa simana.” — 21 di abril di 2023, The Guardian.
“10 algen di mésmu família, 7 mudjer i un rapazinhu di 13 anu, matadu na un kaza na Áfrika di Sul.” — 21 di abril di 2023, AP News.
“Na sidadi di Hamburg, na Alimanha, un ómi armadu mata 6 algen, dipôs el mata se kabésa na un Salon di Reinu di Tistimunhas di Jeová.” — 10 di marsu di 2023, Reuters.

Bíblia ta konsola kes algen ki sta sufri pamodi disgrasas sima kes-li. Pa bu odja un izénplu ki kontise, odja vídiu DeJanerio Brown: Korason tristi má ku speransa.

Bíblia tanbê ta djuda-nu intende pamodi ki disgrasas sima kes-li ta kontise. Pa sabe más sobri kel asuntu li, odja vídiu Pamodi ki Deus ta dexa maldadi ku sufrimentu kontise?.

Duránti mês di julhu di 2022, pesoas uza arma pa mata algen na mundu interu di un manera ki dexa algen spantadu:

“Matadu kel pulítiku más konxedu di Japon [Shinzo Abe, ki éra primeru ministru] i kel-li poi país ta fika tristi i algen na mundu interu fika spantadu, prinsipalmenti pamodi na Japon ka ten txeu violénsia i es ten lei duru sobri uza armas.” — 10 di julhu di 2022, The Japan Times.
“Pesoas na Dinamarka fika txeu spantadu kantu un ómi uza un arma pa mata três algen na un séntru komersial na Copenhagen.” — 4 di julhu di 2022, Reuters.
“Áfrika di Sul: 15 algen móre dipôs ki ómis armadu da tiru na un bar na sidadi di Soweto. ” — 10 di julhu di 2022, The Guardian.
“Na feriadu di 4 di julhu, más di 220 algen matadu ku tiru na Mérka.” — 5 di julhu di 2022, CBS News.

Ten algun speransa ma kel tipu di violénsia li ta ben kaba? Kuzê ki Bíblia ta fla?

Violénsia ta ben kaba

Bíblia ta fla ma nu sta ta vive na “ténpu di fin,” un ténpu ki algen ta ajiba ku violénsia, ta sérba runhu i sima animal. (2 Timótiu 3:1, 3) Kes manera violéntu di konporta li ta poi pesoas ta vive ku medu. (Lukas 21:11) Má, Bíblia ta promete un ténpu ki violénsia ta ben kaba i pesoas ‘ta ben mora na un lugar ki ten pas, na kazas suguru i na lugaris di diskansu trankilu.’ (Isaías 32:18) Modi ki violénsia ta ben kaba?

Deus ta ben kaba ku maldadi i kaba ku tudu arma.

‘Má kes algen mau, ta ben tradu di Téra; i kes traidor ta ben rinkadu di el.’ — Provérbios 2:22.
‘[Deus] ta kaba ku géra na Téra interu. El ta kebra arku i el ta kebra lansa padás-padás, karus di géra el ta kema-s na lumi.’ — Salmo 46:9.

Deus ta ben inxina pesoas vive na pas i di kel manera li el ta ben kaba ku tudu violénsia.

‘Ka ta fazedu ninhun stragu nen distruison na nha monti santu, pamodi Téra ta intxi di konhisimentu di Jeová sima agu ta kubri mar.’ — Isaías 11:9.
Mésmu gósi, Deus sta ta inxina pesoas pa para di ser violéntu i di uza arma, i ‘es ta ben transforma ses spada na aradu, i ses lansa na kuzas pa poda.’ — Miqueias 4:3.

Pa bu sabe más sobri kel promésa di Bíblia di un mundu undi ki pesoas ta ben vive sen medu, lé artigu “Nu ta pode ben vive sen medu?”

Pa bu sabe más sobri kel promésa di Deus di ben kaba ku violénsia, lé artigu “Ta ben ten pas na téra!”